Read South Giziga Sir 7 Bible Online

Sir 7 - South Giziga bible

Sir 7

¹Kuti misi vur hin gar Ki gi malambaˀ ta, naɓa malambaˀ anta sa ndiluw ta.

²Kirih kileŋ avi ɓi mijeŋ ta, ɓi mijeŋ ta, a sa kirih kileŋ avi ka.

³Ɓi mijeŋ ta na, ki zliga hilfa naŋ ta, vur ka masa ga sifi naŋ makaw tarnaˀa.

⁴Ki cufuɗ gidaŋ ngi wi mizli avi Bumbulvuŋ ta, yo cifi misi ti dudoko, ki cufuɗ avi buyo ta.

⁵Ki gi kaɓa mbur mijeŋŋe a mbuŋ Bumbulvuŋ ta, yo a mbuŋ buyo, ki gi kaɓa misi sin mijileŋ ta.

⁶Da gi gwat mijeŋ ta, ki tika gu ta na, ki pur jiviɗ ngi cifi mbur migi kiita ta. Da kine na, naɓa mbur madiɗa a sa tikinuw, k’anta ki sa ga gwata ti jiviɗ naŋ kaɓa misi zle mata.

⁷Ki ga malambaˀ da mizli mitaˀ ngisi ruwuy ɗike ta, naɓa ki ma vu ɗike le nga ruwuy a mbuŋ taŋ ceke.

⁸Ki ma hiri ngi malambaˀ misi purla is cuw ta, asi ka miga mudumbuŋ vuna si na, ki zluɓa le si.

⁹Ki ɓi: «Buymisemuŋ Buymisemuŋ Mimadiɗaa, a ra pura gwatay mihaɗa ya mavulaŋ taŋ na, gwat ya masa vulaŋ di gar a sa tuɓa, na ki ɓi ta.

¹⁰Ki diradibiɗe ti vagas ta, ki gi sefel ti vula gwat da misi murgahaya ta.

¹¹Ko ki singir ar mbur masin bonoyo ta ndidaˀ wãˀ, Asi Buymisemuŋ mama mbur a ruwuy na, a gaŋ ɗongor gu ma.

¹²ki kiluw slir kilaw kilaw ar sukum ɗike ta, gwat misi kanah, ki ga da ngama ɗike ta.

¹³Ji lesl avi slir ko wanaka gar, sirika slire, anta suw ti ɓi mezle loŋ ta.

¹⁴Ar kus ngi mizli madiɗahaya, ki ɓi tosl tosl ta, ki ma mingiɓi misi purla ar diradibiɗ ɗike ta.

¹⁵Ki hirsa slra mutuwaˀa ta, slra ngi huv, Mimadiɗa miga na, ki hirsa ta.

¹⁶Ki ci awuzla cikil ngi migi mungrahaya ta, wuluk keŋ ɗi, himaˀ ngi Buymisemuŋ anta mur ta.

¹⁷Ma vu ɗik nga ruwuy wãˀ, asi mbur misi moˀore, a sa kutaka ti vu waɗ mumuyuŋhoy. Ngama ɗik malla mbur ngi hay ɗik na, ki vula asi ɓi ngi zlili ta

¹⁸Ki ziza ngama ɗike asi ɓi ngi dala ta, zuŋ ngi munuko, ki zizaŋ asi ɓi ngi ɓiri hirnga pal naŋ ta.

¹⁹Ngwas mezle misi sin mijileŋ na, anja a lih avi ka ngi ngwasa ta, asi leleŋ misi ava na, a funa ɓiri hirnga le.

²⁰Gawla ɗik miteŋteŋ ar slra na, ki gaŋ malambaˀ ta, migi slra ngi dala, maga ti mevel purla na, ki gaŋ malambaˀ ta.

²¹Da k’ada ti gawla ɗik misi lesl na, wuɗaŋ ti mevel purla, da a ra wuɗ a pusuk vu na, ki tikaŋ ta.

²²K’ada ti gezleŋ ngi ginewey kwa? Jigina taŋ. Da t’ada a pulukuw gir na, wi taŋ vu.

²³K’ada ti ziri kwa? Sirika taŋ ti jiviɗ mezleŋ, zla kuti taŋ zle ti zuŋ, ɓa a cinam mi.

²⁴K’ada ti ziri mongosohoy kwa? Jigina taŋ kuy kuy avi gawlahaya, ko ki pula taŋ hiri babara ta.

²⁵Vula zuŋ ɗike da zil, naɓa ki gi gwat madiɗa le, amma so na, vula da mbur misi lesle.

²⁶Ngwas ɗike, i ngwas ngisi mevel ɗik kwa? Na ki ɓula ta. Amma ngwas ka mawuɗ ta na, ki vulaŋ mevel ɗike ta.

²⁷Ɗuva hirnga da bunuko ti mevel purla, yo ki puyuk hirnga ti munuk migi ti ka bonoy na ta.

²⁸Wuluk keŋ ɗi, muyukuw i taŋ, gwat taŋ mugukuw di na, ki sa wurka taŋ di mbri mbrike? Gwat ngi gi da masayay

²⁹Ga mikuli da Bumbulvuŋ ti mevel purla, yo cina mi da masayaya,

³⁰Mbur muguw vana, wuɗ ti gidaŋ ɗik wãˀ, ki pula mizli madiɗa naŋhaya ta.

³¹Ŋsaˀa [2] Bumbulvuŋ, yo ɗuva hirnga da mijiviɗ, vulaŋ gwat mi nga naŋ, kaɓa mutohoko ɓi naŋ: gwat micikiɗeffe ngi mi gam, mikuli ngi ɗiya ɓi, pepere ngi gwat migam di mikuli, is ngi gwat ngi mikuli ngi mi gamay waɗ gwat mezlehey mawam taŋ vu da Buymisemuŋ. Gwat ngi gi da misi murgahay

³²Vul ti gula ti hazum da misi murgahaya, ɓa Buymisemuŋ a ɗuwuluw mi kuy kuy.

³³Ga mezle da mizli misi ti siifahay gar ti vula gwat ɗiki, ko mizli mumucahay kwana, ki pula ga taŋ mezle ta.

³⁴Ki mbuɗi duba avi mizli matuwama ta, Gi bonoy ati mizli magam mbonoyo.

³⁵Ki zum vu ngi pura misi jijiheye ta, da ki ra gi kanah na, mizli a sa wuɗukuw.

³⁶Ar gwat ka maga gar na, wuluk ar kiɗa mi ngi hine kwaɗay, naɓa ko k’anta sa gi mungra ta.