Read South Giziga Sir 8 Bible Online

Sir 8 - South Giziga bible

Sir 8

¹Wi vu Ki tiram ati mbur micawwa ngisi ruwuyo ta, Vur naŋ masa lumuw pas mekelem asi haŋ naŋ.

²Ki tiram ati mbur misi zlili ta, asi ka kefilew lambaˀ a mbuŋ naŋ. Asi ɓiri hirnga a zizi mizli le haɗa si, ko buyoy kwana, a hirya taŋ mevele le.

³Ki tiram ati mbur magi mi haɗa ta, ki caŋ dum asi mingiɓi naŋ matiɓi ka vu na ta.

⁴Ki gam mi ngi wuya ati mbur migila soroˀ lambaˀa ta, vur naŋ mazuw jum ti dideˀ ɗikeye.

⁵Mbur mazil marava vur mungra naŋhay na, ki mbuɗaŋ hirnga ta. wuluk keŋ ɗi, ndra gar i migi mungrahay.

⁶Ki hirsa mburo, asi a gi midigila le ta, asi mizli cah asi ndra a ra gam midigila vuna ya.

⁷Da mbur a muc le na, anja ki mumul ta, wuluk keŋ ɗi, ndra gar i ngi mucoy vuna.

⁸Ki hirsa dubun ngi misi sin mijileŋheye ta, amma vula vu ɗik taˀ ngi dubuna mi taŋ maɓaka ti kucuwul na jaka. Asi gwat ngi dubuno, naŋ avi taŋ, dubuna gi gawla ngi mbur madiɗa kwana, naŋ avi taŋ ma.

⁹Ki cifi kileŋ avi dubun ngi midigilahaya ta, asi taŋ vuna kwana, a dubunoko di avi cine taŋhaya ya. Ki sa dubuna sli wala ngi gwat avi taŋ, yo mbur mira ɓuw na, ki lum mi ngi mbuɗaŋ di kutum.

¹⁰Ki pami da mbur migi mungra ta, naɓa ki bul di vu ngi sa wura vu ɗik tehhe amuŋ.

¹¹Ki gi kikircik avi mbur misi moˀore ta, vur naŋ mabuguw di ŋcooˀ, ki ɓi lambaˀ.

¹²Ki vul dala ngi duvus da mbur madiɗa ar ka ta, da ki vulaŋ le na, pura kaɓa ki zliɗa na ng’ar veɗe.

¹³Ki gi sedewo ngi duvus mufunuw le ta, da ki ga le na, wi vu ɓa ki wurkaŋ.

¹⁴Ki zilam vu ar kiita ati mbur migi kiita ta, asi a sa ram ti mi tiseˀe, vur naŋ i migi kiita tuwa.

¹⁵Mbur mazluwun ti mendere ta na, ki zuɓam mulak ati naŋ ta, vur naŋ malumuw ɓi. Asi a sa gi kaɓa wuɗ naŋ joˀ gi gwat ngi mibirnga naŋ na, a sa zuzukum hutuŋ.

¹⁶Anja gwat a zlurukum ati mbur misi moˀore ta, ki kisaŋ nga wuzla ɓuh ta. Asi avi naŋ na, kiɗa hirnga i ɓi ngi sefel, ar li zliv mbur ngi kulo widi ɗik anta na, a sa juw nguɓoc.

¹⁷Ki juw ɓi ngi gi gwat ati mbur gilawa ta, asi n’anta sa ɗumo ɓi miyaŋŋa misi ar wala kum na gu ta.

¹⁸Ki gi gwat miyaŋŋa mur mbur mulaka ta, asi ki sina gwat ka masa lum ava ta.

¹⁹Ki wuna mevel ɗik ko da waka gar ta, asi ko mbur masa gu sise aseˀe anta.