Read South Giziga Sir 9 Bible Online

Sir 9 - South Giziga bible

Sir 9

¹Cifi ati ngwasay (Pura 25.21-26, Sluf5.12-15, Kuc 5.1-20, 6.24-35, 7.5-27) Ki gi suloŋ ti ngwas ɗik ka mawuɗ haɗa ta, vur ka madubunaŋ guw malambaˀa.

²Ko ki pula vu ɗik da ngwas ko loŋ ta, vur naŋ matukuw ˀay.

³Ki bubuɗ ti ngwas burvula ta, wi vu vur ka maci ar kwar naŋ.

⁴Ki pura zuŋ diyli cum cum ta, vur naŋ makuw mi.

⁵Ki ndir ti hiri taˀ angi zuŋ diyli ta, vur naŋ macuw ar ɓi mutuwaˀ.

⁶Ki pula vu ɗik da ngwas sulome ta, vur ka mahirya zlili ɗike lambaˀ.

⁷Ki pur hiri wal wal wal, ar jiviɗey misi ar walahaya ta, ki ci yik ar li mukulkuc, silaŋ pal ɗike ta.

⁸Mbiɗi duba avi ngwas mukuy haɗa, gwat mukuy, i ngi ɗik ta na, ki pura cum cum ta. Kuy ngi ngwasa, a zizi mizli le haɗi si, wuɗo a tiɓi a mevele ka vu.

⁹Ki cifi kap avi ngwas misi zile ta ndidaˀ wãˀ, ar muguzlumo, ki cifam arleˀe ngi si gwata ta, vur mevel ɗik mahin aseˀe, yo may gwat maguw vokoɗ vokoɗo, a huzuguɗuw, ki zizi. Cifi ati mizli mekelemey

¹⁰Ki pula ngama ɗik magala fuk ta, asi ngama ɗik muwurenna, a ndila magala ta. Ngama nawayaŋ, i mbazla mideɗeke, da a nih le so na, ki sa ti mumul.

¹¹Mbur migi mungra miga gwata le gu na, ki ŋhiya ta: ki sina bonoy makutukoŋ ar kiɗa mi naŋ ta.

¹²Mbur mizirɗa mi miga gwata le gu na, ki ŋhiya ta, Wuluk keŋ ɗi, kiita taŋ a zli zle a ruwuy aka.

¹³Cici zar kileŋ avi mbur mikiɗa hirnga, naɓa zluwun ti muco, anta sa guw mata. Amma da ki kirih le ngava na, ki zluɓ ɓi neˀ ta, vur naŋ makuɗuw vagay. Sina sin le, ka marudigi na, awuzla diɓeley, ka kaɓa mbur mabi nga duba gala matika hiri ngi walahay.

¹⁴Da a gi na, a ra pura mbur cil ɗike, ngilam wuy ati mizli misi sin mijileŋhey.

¹⁵Kiɗam slir ati misi lesley, anja kiɗa slir ɗik gar na, i Ɓi muɗuva ngi Buymisemuŋ Mimadiɗa.

¹⁶Anja ki zumam ar sikiɗ purla ati mizli mijeŋŋeheye, jijih ngi ɗike, asi ki ra zluwun ti Bumbulvuŋ. Miwi mizli

¹⁷Gwat mezle misi avi miɗiya gwataya, i gwat taŋ miɗiyaka tahaŋ taŋ, avi buy ngi sukwi ngi mizli kwana, i mingiɓi taŋ maɓaka ti sin mijileŋ.

¹⁸Mbur magi mi haɗa na, mizli ngir walahay naŋhay a zluwunam di. mbur maɓi ɓi haɗa na, a hirsaka mingiɓi naŋ.