Read South Giziga ISA 1 Bible Online

ISA 1 - South Giziga bible

ISA 1

¹Izayi mangal ngi Amoto, a pur gwat ti kleŋ, i ɓi ngi zumabuy ngi Zuda ati ɓi ngi walahay Zeruzalem. Naɓa ti Oziyas, Yotam ati Ahas waɗ Ezekiyas, a zumam buy le asi cala asi cala a Zuda.

²Ya Bumbulvuŋ i ɓi na: «Muŋ, cin! Hirwuy, jika slimiɗe! I gil ziri le, i sirka taŋ le, amma taŋ, a slikiɗam ɓi le avu ya.

³Ko sla kwana, a si na buy naŋ, yo zungu, a si na li zum naŋ nga hay buy naŋ le, amma Israyeley a sinam gwat ta. Mizli ɗuwoy anta slaka wala ngi ɓi ta.»

⁴Sukwi migi mungrahay, kum ar bonoy, mizli migi mungra madiɗahay, sukwi ngi migi malambaˀay, kum i ziri mitikinahay le. Ki pulaka Bumbulvuŋ le, Buymisemuŋ mipal ngi Israyel na, ki hirsakaŋ, ki mbiɗakaŋ duba le.

⁵Kum maslikiɗam ɓi ti gidaŋ vuna, ɓa a kuɗukum ar wana aruŋ maka? Hirnga taˀ i waˀa, mevele fuk ti jiji.

⁶Zle a hur sar hã a hirnga na, gwat mukuy kuy anta mata. Ngurut ti ka, waˀa ti ka, vu pulot pulot, ko ki tukuɗaka taŋ ta, ki mbizaka taŋ ta, ki paka taŋ mal ta ma.

⁷Hirwuy kum a ndir le daŋ daŋ, walahay kumoy i muwurahay le. Hirwuy kumo, mulakay ara zumaka a mbuŋ kumo. A ndir le daŋ daŋ kaɓa Buymisemuŋ a pula le asi haŋ ngi mulakay, ɓa a hiryakaŋ gwataya.

⁸Sey Siyoŋ walahay madiɗa mindir pal naŋ kaɓa mazlaɓ ar guva ngi gudubun, kaɓa guɗuk ar guva ngi tatiyak, kaɓa walahay mindaha le.

⁹Da Bumbulvuŋ, misi gidaŋ wãˀa, a pula mizli ndraˀahaya zleˀe, a laham cah ta na, anja ndra kaɓa walahay Sodom, rak rak ati walahay Gomor.

¹⁰Kum misi ka madiɗa ngi Sodomoy, cinam mingiɓi ngi Bumbulvuŋ. Kum misi ka mizli Gomoroy, jikam slimiɗ ar gwat Buymisemuŋ ndra madubuna ndra di na.

¹¹Bumbulvuŋ a ɓi: «Mikuli kumoy mihaɗa vuna, i sa gi taŋ mike? Mikuli kum ngi tumuŋ mizlam zlam wãˀ ati mungul ngi ziri slahay na, a ɓuliy mi le. Pumbus ngi gusoŋhoy, ngi ziri tumuŋ ati ngi bazuwayay na, y'anta wuɗ mata.

¹²Kum masoko nga mbuŋ ɗu na, i ɓukum le kirpaka mamay ɗu kwa?

¹³Gwat ngi mikuli ngi pula gir ta tayna, anja ki soko taŋ mata, cunju ngi mikuli na, anta giy kuy mata. Ngi gi muguzlum ngi kiya weɗeɗ, ngi hin sabat ati ngi zila vu ng'ar kusoy na, gwat ngi vul kum mijahaɗ jahaɗ ti malambaˀ, ɓa ngi gi muguzlum kumoy na, y'anta tiɓa mata.

¹⁴Muguzlum ngi kiya weɗeɗ ati kus madiɗahaya, yi pura taŋ hiris le. A tiram le avu ya kaɓa jijir, a girikiy le, i ɓusa taŋ gu mata.

¹⁵Kum mira hilaka haŋ hoc nga muŋ ngi diradibiɗ na, yi sirta mihiri ɗu sirit. Ko ki diram dibiɗ is mbeˀmbeˀ kwana, y'anta cine ta, asi haŋ kumoyo cih cih ti pumbusu.

¹⁶Bunam, zuɓaka dili kumoy avra. Gwat malambaˀ kumoyo, zuɓaka taŋ ti mihiri ɗu avra, pulaka gi gwat malambaˀa.

¹⁷Dubunaka gi gwat mezle, sipam gi gwat mijeŋŋe. Mbur maguzuvur vu na, bigakaŋ jiviɗ mezle, gaka gwat mikaslsla da mutuhu. Ngwas widiga, jinam is aseˀe.»

¹⁸Ya Bumbulvuŋ i ɓi: «Soko i kiɗam slir. Da mungra kumoy taŋ cihhe na, a sa pusluɗam ndazl ndazl kaɓa yam. Da taŋ ndez ndez wãˀ na, a sa tiram kaɓa ngwic ngi tumuŋ babaraŋ.

¹⁹Da ki ra cinikiy mi na, kisa zumam gwat mimezle ngi ruwuy hana.

²⁰Da ki ngumom ta, ki ra slikiɗam ɓi nga mbuŋ nga mbuŋ na, maslalam a sa zumukum hiri.» Hana i mingi ɓi nga ya Bumbulvuŋ.

²¹Mizli miteŋteŋ ngir walahay, yo migi gwat mijeŋŋehey tuwa, a tiram sulomehey mbri mbri maka? I mizli migi gwat mikaslslahay zleˀe, na wurenna, a tiram mikiɗa hirngahay mbrike?

²²Zeruzalem, ka kaɓa ɓiri bara mitiri mongofok le, kaɓa mbaazla mundum milihiɗa ti yam.

²³Buy ɗikey i mislikiɗa ɓihey, yo i muɗumo muhuloy. Taŋ cek a wuɗam gwat ngatara, ar gwat gar na, a wuɗam sey haŋ sik le. Anta gam gwat mijeŋŋe da mutuhu ta, yo anta cinam widi ngi ngwas widiga ta.

²⁴Vurˀe, ya Bumbulvuŋ, Buymisemuŋ misi gidaŋ wãˀ, Bugawla ngi Israyel i ɓi na: «Kay! Mizli mazliram ti ya tahay na, i sa mbiɗa taŋ hirnga, yo mesene ɗuwoyo, i sa pula cuwal ɗu ar taŋ.

²⁵Zeruzalem, i sa zuɓa haŋ ng'ar ka: mongofok ɗik na, i sa bi ti malambaˀ naŋ ar vu, gwat malambaˀ ɗikeye, i sa susuyumo taŋ gar avra.

²⁶Buy ɗikeye, i sa tiri taŋ kaɓa misi zleˀe a muŋ, mukuti ɗikeye, i tiri taŋ kaɓa misi zleˀe a muŋ. Joˀ a sa zulukuw ‹Walahay-Mijeŋŋe›, yo ‹Walahay-Miteŋteŋ›»

²⁷Walahay Siyoŋ a sa lih asi naŋ magi gwat mijeŋŋe, yo mizli ngi raˀahay mimbiɗam mevel na, a sa laham asi taŋ magaka gwata kasl kasla.

²⁸Amma mislikiɗa ɓiheye, a sa zizam jom ati migi mungrahay. Mizli mumbiɗaka duba le da Bumbulvuŋ na, a sa ngizlaka taŋ pay.

²⁹Mezegwel kumoy, kum mawuɗam gi taŋ haɗa ar wulgirey na, a sa pukum mesem, yo si virzi ngi widis tayna, kum muwunaka ngi gi mikuli kum malambaˀhay na, a sa gukum mesem.

³⁰Asi kisa tiram kaɓa widis mipa kalaf le, yo kaɓa jarne misi yam a hisikle.

³¹Mbur migidaŋ, a sa tiri giziŋ muˀulo, yo slra naŋ a sa tiri kaɓa ndisl ngi vu. A sa wuram cuw taŋ, ko mbur ngi muc naŋ anta.