Read South Giziga ISA 12 Bible Online

ISA 12 - South Giziga bible

ISA 12

¹Kum mizli diimuhoyo, ti hin nah, kisa ɓam: «Bumbulvuŋ, i ra gukuw sise, asi ki ji mevel le ar ndra zleˀe, amma, ki tisla mevele le, ki ra tikina ndra ɓa i taˀaka tuwuyo.

²Buymisemuŋ Milih ndra n'ani, i vulakaŋ mevel ndra le, yo ndr'anta zluwunam mata. Haˀaw, gidaŋ ndra ati dimis ndra, i ka Bumbulvuŋ! I ka milih ndra.»

³Vurˀe, kisa nuwam yam bal ti mumul ar miviɗiviɗi ngi laha vu.

⁴Joˀ kisa ɓam ti hin nah: «Hunumaka Bumbulvuŋ ti dimisi, zilaka slimiɗ ngi Buymisemuŋ kumo ti gidaŋ. Gwat naŋ miga taŋ le gar na, ɓaka da mizli gar, ɓaka ava ma, naŋ madiɗa haɗa.

⁵Hunumaka Bumbulvuŋ ti dimis, asi a gi gwat madiɗahay le. Anja a njahaka ɓi naŋ asi ruwuy gar.»

⁶Kum misi a Siyoŋ na, jam salalay, jiɗam mececẽleŋ, Asi Buymisemuŋ mipal ngi Israyele, misi a wuzla kum na, naŋ madiɗaŋ!