Read South Giziga ISA 14 Bible Online

ISA 14 - South Giziga bible

ISA 14

¹Ircece a sa ga Bumbulvuŋ ti dideˀ ngi Zakopoyo. A sa wina Israyeleye ava ma. A sa cifa taŋ asi ruwuy taŋ. Mulakay a sa jumom ng'avi taŋ, Joˀ a sa jumom gar ng'avi mizli ngi hay Zakopoy.

²Mizli a sa tiɓaka taŋ, a sa moko taŋ ng'ar hirwuy nga taŋ. Mizli Israyeleye, a sa wunkaka taŋ, ar hirwuy ngi Bumbulvuŋ, ɓa a tiram beke taŋ mizile ati mongosohoy. Israyeleye, mizli mijaka taŋ zleˀe nga ruwuy mulak tuwa, taŋ a sa jaka taŋ aya, yo mizli muguzuvuraka taŋ zleˀe na, taŋ a sa tikaka taŋ ˀay aya.

³Israyeley, a dirba bonoy kum, duhur kum, waɗ a dirba kum migam beke, da Bumbulvuŋ misa vulukum muska vu le na,

⁴Ki sa zlaka dimis hana da buy madiɗa ngi Babiloŋ. kisa zlaka na: Mbur muguzuvura vu tuwa, a muc ngbaŋ kwa? Huhumo vu naŋ tuwa, a kiɗ mi le sukwa?

⁵Bumbulvuŋ a ngila ganday ngi mizli misi moˀoreheye le. A ngila tokom ngi mitikaˀay da mizli le.

⁶Taŋ makiɗam di mizli ti moˀore, a kiɗaka mizli ti naŋ mbak le ta. A tikakaˀay da mizli ti himaˀ fõh fõh, a guzuvuraka taŋ kuy ta wãˀ.

⁷Hirwuy kurzluˀ gar ara pul vu muduba. A ra jam salalay muduba.

⁸Ko widis migidaŋ mimezlehay kwana, ara mumulom vur gwat migi avu ka na. Miter ngi Libaŋhay a ɓam: «Diga ka mici hirnga kulaˀ ar vigiɗ na, mbur maso kiɗa ndra zle tuwa, anta sa bo mata.»

⁹Hirwuy ngi mizli mumucahaya, zle ti naŋ micina ki ra ru na, ara wus haɓar haɓar ngi kutuk ɗike. A ra puɗuko mizli mumucahaya, mizli madiɗa ngisi ruwuyoyo gar, buy madiɗa ngi sukwi ngi mizli, ara putukuso taŋ avra tir janga taŋhaya, hana gar na, vur ka.

¹⁰Taŋ gar taŋ a ɓam: «Ka vuna kwana, k'ani munja gidaŋ kaɓa ndra tuwa ya, ki tiri le rak rak ati ndra.

¹¹Gidaŋ ɗik ngi buyo, a po sar le ng'ar li ngi mizli mumucahay, asi hurum ngi garaya ɗikeye. matala ngi hin ɗike, i mumuyuŋhoy, yo muzurɗuɗuhoy, i borgo ɗiki.»

¹²Ka, wurzlaŋ mawucuɗu, bangay ngi wuna li, ki diɗo ti muŋ mbri mbri maka? Ka mangizla sukwi ngi mizli tuwa, a pukuw haŋ nga ruwuyo mbri mbri maka?

¹³Ki ɓi zleˀe: «I sa jiɗ sesẽŋ a muŋ, janga ɗu ngi buyo, i sa ɗuva njuroŋ a hirnga wurzlaŋ ngi Buymisemuŋhoy. I sa cifi a hirnga muwã ngi mizli ngi muŋhoy makusom a diga, ar li vay muŋ mira kiɗo mi ndoko.

¹⁴I sa jiɗ sesẽŋ ar kiɗa mi ngi gazlavay, i sa tiri rak rak ati Bumbulvuŋ Buymisemuŋ Mimadiɗa.»

¹⁵Ani ki pi sar le ng'ar li ngi mizli mumucahay, sesẽŋ ar mijileŋ ngi vigiɗi.

¹⁶Mizli mapurukuw na, a ɗuvaka hiri taˀ ng'ar ka, a purukuw bleŋ bleŋ, a ɓam: «Misenna i mbur mawusa ruwuyo ngbir ngbir, yo maputukuso zuma buyoy tuwa ya?

¹⁷Duniya kurzluˀ gar, matiri di li papala kirɗak, mangizla walahayaya pay, yo mizli dangayaya, a mi taŋ ngi hay taŋhaya mata tuwa ya?»

¹⁸Buy ngi sukwi ngi mizli keɗeɗe gar, ara muskam vu ti ɗuva hirnga, mbur gar sumtah sumtah ar zivi naŋ.

¹⁹Amma ka, a hizigukuw le kileŋ avu zivi ɗike, kaɓa zuŋ mipa ti pi, mukuy ngi pur avu hiri ta wãˀ. Vu ɗik gar i waˀa, mislina le njoŋ njoŋ ti maslalam, ɗiɗeˀ ɗiɗeˀ ɓaˀ ka ng'ar ɗugur ngi mi zivi, kaɓa vagay ngi mbur mikirpaka le asi sar.

²⁰Amma anta sa dukukuw ati taŋ ta, asi ki hirya hirwuy ɗike le, asi ki kiɗa mizli ɗikeye le vagay vagay. Anta sa zilaka slimiɗ ngi misi moˀoreheye mata ndiɗaˀ wãˀ.

²¹Juwam vu ngi kiɗa ziri sunok sunoko, asi cine taŋhay migam malambaˀ madiɗa na, vur taŋ maslikiɗam a muŋ, a tiɓaka ruwuyo, a nahaka duniya ti walahay madiɗahay.

²²Bumbulvuŋ misi gidaŋ wãˀ a ɓi na: «I sa cici zlak ng'ar mizli Babiloŋhoyo, i sa susuyumo slimiɗ taŋ ati baraf taŋ avra, i sa susuyumo degezer taŋ ati mizli ngi dirba taŋhay gar avra. I ya Bumbulvuŋ maɓi.

²³I sa tiri di zlazlar, li hin ngi cemcemehey, I sa fuca Babiloŋ ti suluk mafuca li leɗeɗ wãˀ. I ya Bumbulvuŋ misi gidaŋ wãˀ maɓi.»

²⁴Bumbulvuŋ misi gidaŋ wãˀ a hudum le zleˀe, a ɓi na: «Hadam, gwat ya mujuwa le a mevele, a sa gi, gwat ya muwuɗ le ngi gi na, a sa gi.

²⁵Hirwuy Asiri, i sa kiɗa tisi ruwuy ɗu avra. I sa njirsla ti sar ar muwã ɗuwoyo. Galalaŋ ngi Asirihey mines ar taŋ na, i sa cuko taŋ di avra. jijir ngir pepesl taŋ na, i sa zuɓa taŋ di avra.»

²⁶Ɓimujuwa vur ruwuy kurzluˀ gara, i nah so, i ngi guco mi da sukwi ngi mizli gar.

²⁷Da Bumbulvuŋ misi gidaŋ wãˀ a juw ɓi le a mevele na, masa ngila ɓi naŋ i waka? Da a puka haŋ le ng'ar mburo na, masa maŋ di ng'aruwuy i waka?

²⁸Mingiɓi hana, naŋ zle ar vi ngi muc ngi buy Ahasa, a ɓi na:

²⁹Kum Filistihey taˀ gar, vur tokom a ngil le na, ki mumulom vurˀe ta, asi kaw a sa bo tir musufut ngi kawa, yo tir kawa kwana, ŋgoŋgoŋ maslikiɗ ti zlara a sa bawa.

³⁰Mizli migeˀ irceceheye, a sa ndiram ar li zum kaɓa ginewey ar li zum taŋ. Misi murgahaya, a sa pulam vu kuy kuy, amma kum Filistiheye, i sa nguzlukum pay ti may, yo mizli misa ndiram le ti siifa na, i sa kiɗa taŋ vagay vagay.

³¹Kum mizlingreŋ ngi walahayay, niˀicam, walahay muguno ti moholoy, wudam, Hirwuy Filistihey taˀ gar a hĩhĩy le, asi cunju matirsliko tir vay muŋ na, ko mbur loŋ micifi baˀ pal avu jum ngi mizli naŋhaya anta.

³²Mislin ngi Filistihey na, i mbiɗaka taŋ di mbrike? I sa ɓaka taŋ na: «Bumbulvuŋ a pa ruwuy Siyoŋ le ti haŋ naŋ.» Yo mizli naŋhay mihina hirngahaya, a roko pulam vu a diga.