Read South Giziga ISA 15 Bible Online

ISA 15 - South Giziga bible

ISA 15

¹Tila mi vur walahay Moˀap. Ngi duvuɗ, ti taŋ mingizlaka walahay Moˀap na, walahay Ar-Moˀapa, a susuyumoko ar duvuɗ purla si. Ngi duvuɗ, ti taŋ mingizlaka walahay Moˀap na, Walahay Kir-Moˀapa, a ngizlaka ngi duvuɗ purla si.

²A Diboŋ, mizli ara jiɗam nga tuwuy ar hay ngi Bumbulvuŋ, waɗ ar li miɗingirey. Mizli Moˀapay ara kuɗumaka tuwuy a Nebo, waɗ a Medeba. Hirngahay gar i mihijahay le kurzluˀ kurzluˀ, mazlamayay gar i mislahay le.

³A jiviɗeye, mizli ara kam zana ngi vagay. A hirnga viŋhey waɗ ar li ngi lumahaya, mizli gar ara tuwam kaɗam kaɗam, tuwuy miˀirslik ˀirslik.

⁴A Heseboŋ waɗ a Elale, mizli ara wudam, widi taŋ a cin sesẽŋ a Yahasa. Soje ngi Moˀapay mawudam cərəwcərəw na vurˀe, yo membezleŋ ngi vu taŋ a hĩhĩy le.

⁵I ra zil mikila widi nga jina Moˀapay. Mizli naŋhay ara kilam le nga Soˀar, hã sesẽŋ a Eglat-Selisiya. Li miɗingir ngi Luhite, a tuwuɗaka bal ti tuwuy. Dar a tuwam cərəwcərəw ar jiviɗ ngi Horonayime.

⁶Miyam Nimrime, a ndir le ɗoɗok. Giziŋ a muˀul le, anta gil mata, gwat tukuzohoy anta diga mata.

⁷ˀIs ngi zlili taŋhay mindirama, a ram taŋ sesẽŋ a duba mizaw Sole.

⁸Widi taŋ, a cinaka, walahay Moˀapa zlar wãˀ. Niˀic taŋ a cin sesẽŋ a Eglayim, hã sesẽŋ a miyam Elim.

⁹Mizaw maɓul ti Dimoŋ na, i pumbus pal naŋ. Bumbulvuŋ a ɓi: «I sa so ti mendere mekelem nga ruwuy Dimoŋ. Mobor a sa kiɗam vu ati Moˀapay, ati mizli ngi si ruwuyoy mindiram ti siifa na.»