Read South Giziga ISA 17 Bible Online

ISA 17 - South Giziga bible

ISA 17

¹Tila mi vur walahay Damas. Damasa, anta sa so i wuzla walahay mata, a sa ndir i hohoy ngi diŋ timbirim timbirim.

²Prok naŋhaya, a sa ndiram mupula le fuk fuk ngi wãˀ. Ginewey a sa zumam ara, a sa musukam vu anga, ko mbur masa ga taŋ ngaˀa anta.

³A ruwuy Efrayime, mohol a sa so anta mata, yo zumabuy ngi Damas a sa kiɗi. Mizli Sirihey mindirama, taŋ puɗaw fineˀ Israyeleye ta. I ya Bumbulvuŋ misi gidaŋ wãˀ maɓi.

⁴Tapas nah, Israyeley a sa hĩhĩyam, yo taŋ mikwiliɗ kwiliɗ tuwa, a sa zaham zah zah.

⁵A sa gi kaɓa njiko daw alkamari, a hilaka hirnga naŋ dir dir ti haŋ. A sa gi kaɓa makusom daw alkamari ar sozo ngi Refayay,

⁶masa ndir sey i holoko, yo kaɓa mazluvam yi ngi tutumbur ti dum mijek, yi naŋ cuw malla makir mindiram ar metetengeɗe, yi naŋ mufaɗ malla zlum mindiram avu mihaŋ naŋhay. I ya Bumbulvuŋ Buymisemuŋ ngi Israyel maɓi.

⁷Ti hin nah na, mizli a sa mbiɗam hiri ng'avi migi taŋ, a sa puraka Mipal ngi Israyele ti hiri taŋ.

⁸Li ngi gi mikulihey, taŋ miɗiyaka taŋ ti haŋ taŋ na, t'anta sa ɗuvam hiri avu taŋ mata. Kuli ɓamtalay ati li wura ˀurdihey, taŋ miɗiyaka taŋ ti haŋ taŋ na, t'anta sa ɗuvam hiri avu taŋ mata.

⁹Tapas Israyeley mindilam na, walahay ngi ɗum ar taŋ, a sa pulaka taŋ daŋ daŋ, kaɓa mupulaka walahay ngi Hivihey ati ngi Amorihey na.

¹⁰Asi ka Israyele, ki puyuk hirnga le ti Buymisemuŋ milih ɗike. Mandazlay muwã, li ɗum ɗike, ki wulka keŋ mata. Vurˀe ki hirvi gwat mundumoy, yo ki zligi hilfa gwat ngi mulakay.

¹¹Tapas ka mira hirvaka taŋ na, ki pura taŋ ara gilam, yo zle ti miprik sina, ki pura a gil le, amma hin ngi luuma yi naŋ so na, yi naŋ a pi kwatak, ko slalak ngi tik naŋ anta.

¹²Mizli misikiniy, mabucam ɓar ɓar, a zuɓ ngiɗ ngiɗ kaɓa mubuliy mahurum. Sukwi ngi mizli a mbiɗam hirbis hirbis, mi wuwwo kaɓa mekepel majuruf a mizaw.

¹³Sukwi ngi mizli a mbiɗam hirbis hirbis, kaɓa mizaw madiɗa majuruf. Amma Buymisemuŋ a guco taŋ mi, a kilam kileŋ, kaɓa cekwesl, himiɗ ngir muwã makil di, kaɓa musuure mahila murɓuk.

¹⁴Ti pastaˀa, i muɗa didak, yo ng'avi miprik mana, gwat anta neˀ le mata. Migir ngi mizli masliram ndra gwataya, yo migir ngi mizli mahilam ndra gwataya, i nah so.