Read South Giziga ISA 19 Bible Online

ISA 19 - South Giziga bible

ISA 19

¹Tila mi vur ruwuy Ezipte. Puraka Bumbulvuŋ ara sawa nga Ezipte. Naŋ ar gazlavay maru kutum. Kuli ngi Eziptehey ara jijikam a mbuŋ naŋ, yo mizli Eziptehey ara hĩhĩyam.

²«I sa pa mi da Ezipteheye, ɓa a zliram dibiɗ ar wala taŋ, ɓa sukumuŋ a kiɗam vu ati sukumuŋ, mbur gar a sa kiɗ vu ati cala, walahay a kiɗam vu ati walahay cala, zumabuy a sa kiɗam vu ati zumabuy cala.

³Eziptehey a sa hĩhĩyam, yo gwat taŋ mawuɗam ngi gi na, i sa hirya bimbiɗ bimbiɗ. A sa ra puram kulihey, misi cucukoy, waɗ mupura daˀasay.

⁴Ezipteheye, i sa vula taŋ asi haŋ ngi buy mutuwaˀhay, buy migidaŋ a sa wa taŋ. I ya Bumbulvuŋ Buymisemuŋ, misi gidaŋ wãˀ miɓa.»

⁵Yam a sa susuyum ar mubuliye, mizaw a sa hisik kããk, a sa muˀul cay.

⁶Zlazlaray a sa zãˀãm kuyta wãˀ, mizaw Nil ngi Ezipte a sa sa yama, a sa hisik kããk, lavaɗay ati petewey a sa ɓutom.

⁷Silaɓɓa mizaw Nil ati li naŋ mizliram ati mubuliy na, gwat magil a mi mizaw madiɗa nah gar na, a sa muˀul, himiɗ a sa kil di. Ko gwat masa ndir loŋ anta.

⁸Miji kilifey a sa niˀicam, mizli makam kunayel a mizaw Nil gar, a sa tuwam irslik irslik, miki zuvahay ar yama, a sa zizam.

⁹Mizli misira gugumay mislirkeɗey, a sa ndiram mesem mesem, ngwas miɗiya gugumayay ati miji gabagahaya, lik a sa pusluɗa taŋ ndazl.

¹⁰Muvurɗo gwat ngi sihey, a sa giram kupuyah kupuyah, midi mbaazlahay a sa hĩhĩyam.

¹¹Buy ngi walahay Soˀaŋ i gilaway. Mizli misi sin, muvula kuti da buy madiɗa ngi Ezipteheye, i jum ngi munja lesley. Na, ki ɓaka buy madiɗa ngi Ezipte ma na: «Yi mbur misi sinmijileŋ, mbur ngi si buy misi zleˀehey» mbri mbri maka?

¹²Buy madiɗa ngi Ezipte, misi sinmijileŋ ɗikeye taŋ amaka? Anja ani a dubunukuw gwat, ɓa ki sina gwat Bumbulvuŋ, misi gidaŋ wãˀ mujuwa a mevele ngi gi da Ezipte na.

¹³Buy Soˀaŋhay, a tiram gilawahay le, buy Memfiseye, ara gam biyãˀ biyãˀlambaˀ, Taŋ, mizli mupuɗaw puɗaw ngi Ezipte mana, ara zizaka Eziptehey.

¹⁴Bumbulvuŋ a ga ɓa hirnga, a ga taŋ vĩh vĩh, a ga Ezipteheye, zuway zuway ar gwat ngi gi taŋ gar, zuway zuway kaɓa mbur miwi le, mavunuhu.

¹⁵Mbur masa gi gwat a Ezipte ko loŋ anta mata, mbur ngi mbuŋ ta, ngi dirba ta, mihaŋ ngi dibinoji ta, lavaɗ ta.

¹⁶Ti hin nah na, Eziptehey masa puraka Bumbulvuŋ misi gidaŋ wãˀ mazuɓa haŋ ng'ar taŋ na, a sa tiram ka ngwasay, a zluwunam, a jijikam kirkir.

¹⁷Hirwuy Zuda, a sa ga zluwun da Ezipte. Taŋ misa ɓaka ɓi ngi Zuda le avu Ezipte gar na, a sa jijik kir kir, asi gwat Bumbulvuŋ misi gidaŋ wãˀ mujuwa a mevele ngi ga taŋ di na.

¹⁸Ti hin nah na, angi hirwuy Ezipte, walahay zlum a sa ɓam mi Heber, yo a sa jumom ng'avu Bumbulvuŋ misi gidaŋ wãˀa, ti hudum. Walahay pal asi taŋ, a sa zilaka Walahay-pasa.

¹⁹Ti hin nah na, a sa ndiram li gi mikuli da Bumbulvuŋ, a wuzla hirwuy Ezipte, waɗ a sa ngam ɗugur ngi Bumbulvuŋ gweˀ avu maakway naŋ.

²⁰Hana a sa tiri i gwat mabigi gwat, yo sedewo mabiga Bumbulvuŋ misi gidaŋ wãˀa naŋ da a Ezipte. Da Eziptehey a sa wudam le ng'avu Bumbulvuŋ, asi mesene taŋhay maguzuvuraka taŋ na, a sa slino taŋ milih masa jiniˀis asi taŋ, yo a laha taŋ.

²¹Dar ti hin nah na, Bumbulvuŋ a sa biga vu da Eziptehey, Eziptehey kwana, a sa sinaka Bumbulvuŋ ya. Dar a sa huruk hurukam a mbuŋ naŋ ti gi mikuli waɗ ti gwat ngi vuloy. A sa ɓam ɗaˀ ɗaˀ le a mbuŋ Bumbulvuŋ, a jaka mi nah cummo.

²²Akẽh na, da Bumbulvuŋ a kiɗa Ezipteheye le haɗa na, a sa mbulo taŋ. Taŋ a sa moko ng'avu Bumbulvuŋ, a sa tiɓa mi taŋ, dar a mbulo taŋ.

²³Ti hin nah na, jiviɗ a sa bi ti Ezipte hã seŋ seŋ a Asiri. Asirihey a sa soko nga Ezipte, Eziptehey kwana, a sa ram nga Asiri ya. Eziptehey ati Asiriheye, a sa huruk hurukam a mbuŋ Buymisemuŋ mupurla.

²⁴Ti hin nah, a dirba Eziptehey ati Asirihey na, Israyeley i mimakir taŋ. Buymisemuŋ maɗuwula mi da ruwuy na, kanah so.

²⁵Bumbulvuŋ misi gidaŋ wãˀ a ɓi: «I ra ɗuwula mi da Ezipte, mizli ɗuwoyo, da Asiri, ya miga ti haŋ ɗu, waɗ da Israyel, mi ngaya.»