Read South Giziga ISA 2 Bible Online

ISA 2 - South Giziga bible

ISA 2

¹Mingiɓi, Bumbulvuŋ miɓa ɗaˀ le da Ezayi, mangal ngi Amot, vur walahay Zuda ati ngi Zeruzalem.

²Hin a sa sawa, muwã, hay ngi Bumbulvuŋ misi anga na, a sa gi dum hirnga muwãhay gar, yo a sa funa li miɗigireye gar. Sukwi ngi mizli gar a sa ram nga diga.

³Mizli haɗa a sa ram, yo a sa ɓam: «Soko! Juɗukum nga muwã ngi Bumbulvuŋ, ngi hay Buymisemuŋ ngi Zakopo. A sa dubuna ndra gwat ngi gi naŋhay, ndr'i sa sipam jiviɗ naŋ.» Naŋ kine, gwat ngi dubun avu Bumbulvuŋ, a bo ti Siyoŋ, yo mingiɓi naŋ, a bo ti Zeruzalem.

⁴A sa tiri migi kiita ar wala ngi sukwi ngi mizli, a sa tiri miɗiya ɓi ngi mizli haɗa. Maslalam taŋhaya, a sa vuɗ taŋ gulekey, ziwit taŋhaya, a sa vuɗ taŋ slagwayay. Sukwi ngi mizli anta sa pukam maslalam ng'ar sukwi mekelem mata, anta sa dubunaka gi vurumo mata.

⁵Dideˀ ngi Zakopoy, soko, akum ar li minjaha ngi Bumbulvuŋ.

⁶Aw Bumbulvuŋ, mizli ɗikey, dideˀ ngi Zakopoyo, ki pula taŋ le. Mizli ngi si pas ngi miprikey, a roko hoyo hoyo a diga, mupura daˀasaya, taŋ fineˀ Filistiheye, asi ziri ngi mulakay a diga haɗi wãˀ.

⁷Hirwuyo, i minaha le ti ɓiri bara waɗ ti ɓiri tapasl tapasl, zlili anta sluf ta. Hirwuyo i minaha le ti pilisi, mota ngi vurumoy anta slufam ta.

⁸Hirwuy i minaha le ti kulihey: mizli gar ara hurukom a mbuŋ gwat taŋ mindiraka taŋ, a mbuŋ gwat, mbur titira miɗiya ti haŋ naŋ.

⁹Vurˀe, sey mizli titirahay a huruk hurukam, mbur titira, sey a huruk huruk a ruwuy. Buymisemuŋ, ko ki pula taŋ mungraˀahaya ta.

¹⁰Bumbulvuŋ a magi zluwun, yo slimiɗ naŋ mazil fineˀ gidaŋ na, kilam ng'ar mandazlayay, ara ɗumom a ruwuy.

¹¹Mizli mahuhumom vu na, a sa maka taŋ nga ruwuy, mizli manjurom vu na, a sa maka taŋ a ruwuy: ti hin nah na, a sa hunumam i Bumbulvuŋ pal naŋ.

¹²Asi Bumbulvuŋ, i misi gidaŋ wãˀa, hin naŋ ada pal, ti hin nah na, mizli mapuraka vu taŋ kaɓa taŋ gidaŋ, taŋ fineˀ mizli na, a sa ga taŋ kiita, ɓa a vuso taŋ, ɓa a mataŋ nga ruwuy.

¹³A sa ga kiita da miter mijek, suburo ngi Libaŋhay, waɗ da widis madiɗa kaɓa miter ngi Basaŋhay,

¹⁴a sa ga da muwã madiɗahay, waɗ da li miɗingirey,

¹⁵a sa ga da hay musuburohoy waɗ da mohol matuwuɗam tira gu ta,

¹⁶a sa ga da palalam madiɗa ngi yamay, ati palalam hirngahay.

¹⁷Mbur mahuhum vu gar na, sey a huruk huruk, yo mbur majijihi gar na, sey a huruk huruk a ruwuy. ti hin nah, a sa hunumam i Bumbulvuŋ pal naŋ.

¹⁸Dar kulihey gar a sa susuymom.

¹⁹Bumbulvuŋ magi zluwun, yo slimiɗ naŋ mazil mifineˀ gidaŋ na, ti naŋ masa ga zluwun da ruwuyo, cam ng'ar butumoy, yo ara ɗumom ar vigiɗ ngi ruwuy.

²⁰Ti hin nah, kuli mipa ti ɓiri bara ati ɓiri tapasl tapaslay, ɓa a huruk hurukam a mbuŋ taŋ na, mizli a sa hizigaka taŋ da munduwaŋhay ati gujumoy.

²¹Bumbulvuŋ magi zluwun, yo slimiɗ naŋ mazil mifineˀ gidaŋ na, ti naŋ masa ga zluwun da ruwuyo, mizli a sa kilam ng'ar butumoy, waɗ ng'ar poporohoy.

²²Ki ɗuvaka wuluko taˀ ar mbur titira mata. I musuwun mabo fẽh ti hutuŋ naŋ tewle. Naŋ na i mi yaka?