Read South Giziga ISA 22 Bible Online

ISA 22 - South Giziga bible

ISA 22

¹Tila mi vur hurjijiŋ mupura ti kleŋ. Zeruzalem, mizli ɗikey a jiɗam gar nga hirnga viŋ na, i mi migi ka?

²Ka, walahay muwuwwo, widi ngirzliŋŋe, ki ra gi muguzlum ndrehhe na vur mike? Mizli ɗikey mumicam na, a kiɗaka taŋ ti maslalam ta, a kiɗaka taŋ ar vurum ta.

³Soje madiɗa ɗikey a kilam le ceke. A tikaka taŋ ˀay ti luvutu, a jaka taŋ cek ng'ar dangay. A kilam le zleˀe kileŋ, amma muluma muluma na, a jaka taŋ le cek ng'ar dangay.

⁴Wurenna i ɓukum na: «Ki kam slimiɗ ar ya mata, pulikiy i kuɗuma tuwuy. Vur mingizlaka walahay ngi mizli ɗuwoy na, ki giram vu kum ngi tikiniy ar li tuwuyo ta.

⁵Asi i hin ngi ziza vu, ngi ngizla vu, hin ngi zluwun. I Bumbulvuŋ, misi gidaŋ wãˀ mislino ndra di. Ar hurjijiŋ mupura ti kleŋ, mohol ara mbizli, mizli a wudam ngir ti muwã.»

⁶Elamay a juwam gulum, mota ngi vurumoy ti mizli ar taŋ, yo soje Kirey a boko ti mbarayay.

⁷Zeruzalem, li micay mezle ɗikey, i minaha taŋ le ti mota ngi vurumoy, misi pilisey a roko piyõˀ a mizlingreheye.

⁸Micika vu ar Zuda anta mata. Ti hin nah na, ki puram hiri le ng'ar li ɗiya gwat ngi vurumoy, misi ar hay mazilaka wuzlaɓuh mingiriɗi,

⁹yo ki puraka na, walahay ngi Davite, mifiliw avu moholo haɗa. Ki wam vu le ti yam ar li ngi wi vu ti yam vay ruwuyo.

¹⁰Ki slufaka hay ngi Zeruzalameye le, ki mbizlaka hayaya, ɓa ki ndiram taŋ mohol gun gun.

¹¹Ki ndiram li tiɓi yam le ar wala ngi mohol mucuwoyo, ngi jina yam ngir li magala. Amma mbur magi slra ar gwat tayna vuna gar na, ki puram hiri ng'ava ta, mbur magi slra diga zlezle vuna, ki puraka ta.

¹²Tapasa, Bumbulvuŋ Buymisemuŋ, misi gidaŋ wãˀa, a ɓukum ɓa ki tuwam, ki tuwam irslik irslik, ɓa ki hijaka hirngahaya, yo ɓa ki kam zana ngi vagayay.

¹³Dambalaka i mumul ati cira hiri jaka: a kiɗam slahay, a slam ˀay ngi tumuŋhoy, a zumam ˀuse, a sam mbaazla. Ki ɓam: «Zumukum, sukum, asi tipirike, i sa micam.»

¹⁴Bumbulvuŋ misi gidaŋ wãˀ, a njikiy mingiɓi ani: «I ya Bumbulvuŋ Buymisemuŋ, misi gidaŋ wãˀ mahudum. Da ki micam t'aruŋ na, mungra kum hana, y'anta sa pulukum di ta ndiɗaˀ wãˀ.»

¹⁵Bumbulvuŋ Buymisemuŋ, misi gidaŋ wãˀ, a ɓi na: «A ra lumo buy miwi li Sepna, buy miwi mugum nah vuna.

¹⁶Ɓaŋ na: ‹Gwat ɗik i mi aka ka? Muy ɗik i wa aka, ɓa a luw vigiɗ ngi dik ɗike, a luw zivi njuroŋ ar li miɗigir, ɓa a guruw li hin a hur mandazlay na, i wa aka ka?

¹⁷Na da kine na, Bumbulvuŋ a sa hiruw har avra buy ɗu, a sa juwuw kaˀ kaˀ lugudoŋ,

¹⁸a kicuw kwic, ki kukur kaɓa kukutu, kini nga ruwuy mupuɗak puɗaka. Ki sa muc a diga, a diga, avu mota ngi vurumoy magukuw dudok, waɗ hay ngi buy ɗik ka muvuso na.

¹⁹I sa ɓuluw tir li ɗik avra, i sa slikiɗuw tir li ɗik avra.

²⁰Dar ti hin nah so na, yi sa ka zil da gawla ɗu Eliyakim, mangal ngi Hilkiya.

²¹I sa kaŋ jibe ɗiki, i sa juwaŋ kwacaya ti kanda ɗike, gidaŋ ɗik ngi buyo, i sa vula asi haŋ naŋ. A sa cifi cine ngi mizli Zeruzalemey waɗ ngi hay Zudahay.

²²I sa vula lakle ngi hay ngi Davite da naŋ, Da a wuna le na, ko mbur masa gica anta, da a gica le na, ko mbur masa wuna anta.

²³I sa ca yik kaɓa ponti ar li migidaŋ, dar a sa tiri i li cifi ngi vula ɗongor da hay ngi cine naŋ.»

²⁴Dudok ngi hay cine gar, a sa luwam docok ava, kaɓa mihaŋ ngi widis ati giziŋhey, kaɓa taasahay gar, zle avu kop hã avu sukwi ngi kukulumoy gar.

²⁵«Ti hin nah na, ponti midira ar li migidaŋ tuwa, a sa muɗ, a ngil, a diɗ, dar gwat milaw law ava tuwa, a sa hiryam, asi ya Bumbulvuŋ i ɓi le. I ya Bumbulvuŋ, misi gidaŋ wãˀ miɓa.»