Read South Giziga ISA 23 Bible Online

ISA 23 - South Giziga bible

ISA 23

¹Tila mi vur walahay Tir. «Palalam ngir mubuliy madiɗahay, wudam cǝruw cǝruw, asi a ngizlaka hirwuyo le pay, ko hay anta mata!» A cinaka labara nah, ti taŋ masoko tir matura ngi Sipre.

²Mizli ngi ciki mubiliyey, migi terere ngi ruwuy Sidoŋhoy, misi mislin taŋhay, matuwuɗam mizaw madiɗa na, cifam teˀ teˀe.

³Ti duba yam madiɗahay, hilfa gwat ngi mizaw Nil, gwat magaka sifi naŋ a ciki mizaw madiɗa na, i li lum ngi ruwuy Sidoŋ. A tiri luuma ngi sukwi ngi mizli le.

⁴Sidoŋ, walahay muguno le ti mohol ngir mubuliy, mesem takwa! Mubiliy a zla a ɓi: «Kwacay a jiy ngi yi ta, i yi ta, i gil gawlahay ta, i gil diilihey ta.»

⁵Ti Ezipte masa cine labara ngi gwat migi a Tir na, a sa jijik kirkir.

⁶Mizli ngi ciki mubuliyey, tuwuɗam mubuliye sesẽŋ a Tarsis, a wudam cǝruw cǝruw.

⁷Walahay kum misi zlezle, muwuwwo zleˀe, yo maslin mizli nga pi ruwuy mikileŋ kileŋhey na, i walahay hana vuna kwa?

⁸Hirwuy Tire, a wuɗuk loppol ngi buyoy zleˀe, na mujuwa ɓi ngi ngizla ruwuy Tire i wa ska? Migi terere naŋhaya, i yarmahay, migi cikili naŋhaya, i mizli madiɗa ngisi ruwuyoy.

⁹I Bumbulvuŋ, misi gidaŋ wãˀ mujuwa ɓi nah, ɓa ngi ngila sliŋ ngi muhuhumo vuhoy, mizli maɗuvaka taŋ hirnga haɗa na, ɓa ngi ma gidaŋ ngi mizli madiɗahay gar a ruwuy.

¹⁰Hirwuy Tir, huva guva ɗik misilaɓɓa kaɓa mizaw Nil, asi li pi sar ngi palalam ɗikey anta mata.

¹¹Bumbulvuŋ a zuɓa haŋ ng'ar mubuliye, ɓa a gucoŋ mi, a ga ɓa zuma buyoy a jijikam kirkir. A pula jiviɗ da Kanaˀanay ɓa a susuyumoko walahay taŋhay muguno ti moholoyo avra.

¹²A ɓi na: «Mizli Sidoŋhoy, kum kaɓa zuŋ diili mungbuˀo mihiryaka le, kum anta sa mumulom mata. Slikiɗam, a ram kutum nga Sipre, a diga kwana, kum anta sa musukam vu ta na si.

¹³Puraka hirwuy ngi Babiloŋhoy na ɗi: mizli tayna t'anta mata. Asirihey a vulaka taŋ le da magamak ngi ɓuhoy, a ndiram hay musuburoy le ngi kiɗ taŋ, a wahaka hay mezleheye, dar a tiram taŋ diŋ cay.

¹⁴Palalam ngi Tarsisey, wudam kaɗam kaɗam, asi walahay kum muguno ti moholo, i muwaha le.»

¹⁵Ti hin nah na, Tire, a sa puyukom di hirnga ngi vi kukur tarnaˀa. I zik ngi vi ngi buy purla si. A dirba vi kukur tarnaˀ na, gwat migi ar dimis mizlaka da ngwas burvula tuwa, a sa gi muduba.

¹⁶Ngwas burvula mupuyukom di hirnga le, zuɓa gujuvur ɗike, guno walahaya. Kiɗa migidaŋ ɗiki, mahiri ngi dimis ɗikeye, ɓa a wulukukuw keŋ.

¹⁷Ar kiɗa mi ngi vi kukur tarnaˀ na, Bumbulvuŋ a cik vu ar Tire. Dar Tire, a sa mi ng'ar lum naŋ a muŋ. A sa gi sulome ar zuma buyoy misi asi ruwuyo gar.

¹⁸Amma migir naŋ ati gwat ngi lum naŋ gar, a sa vulaka da Bumbulvuŋ. Anta sa hilaka taŋ ta, anta sa kusoko taŋ ta. Migir naŋhaya, a sa vulaka da mizli misi a mbuŋ Bumbulvuŋ na, ɓa a zumam, a mbam, yo ɓa a vulaka taŋ zana hirngahay.