Read South Giziga ISA 24 Bible Online

ISA 24 - South Giziga bible

ISA 24

¹Puraka Bumbulvuŋ ara ngizla ruwuyo, ara nguɓuco wãˀ, ara mbiɗa ruwuyo, ara zliɗa hirnga ngi mizli ngi raˀahaya.

²I gwat misi purla masa gi, avu masayay, kaɓa avu mizli, avu buy, kaɓa avu gawla naŋ, avu ngwasa, kaɓa avu migi slra naŋ ngwasa, avu migi terere, kaɓa avu mihiɗika gwat, avu muvula duvuso, kaɓa avu mididiɗa duvusu, avu misi duvuso, kaɓa avu mbur muvulaŋ di.

³Hirwuy a sa ngizl kuɗup, a sa vaka gwat ngi raˀahaya pay wãˀ, kaɓa Bumbulvuŋ ɓi micica ɓi naŋ na.

⁴Hirwuy ara gi vagay, ara tiri diŋ, Duniya keɗeɗe ara zizi, ara tiri diŋ, muwãhay ara zizam ati hirwuyo.

⁵Hirwuy a hiryi le asi sar ngi mizli ngi raˀahay vuna, asi ara ngilaka ɓimujuwahaya, ɓi ngi sirikeye, a mbiɗaka taŋ le, jumoˀay taŋ ngi wãˀ ati Buymisemuŋ na, a ngilaka le.

⁶Vurˀe, hirwuy ara wur, asi Buymisemuŋ minisaŋ, bonoy naŋ, naŋ a hirnga mizli ngi raˀahay. Vurˀe, mizli ngisi ruwuyo, ara wuram, ko a ndiram haɗa mata.

⁷Mbaazla si a ro ar li vagay, gudubun ara ɓutu. Mizli mezle mindiram ar siifa, ara niˀicam.

⁸ˀAy ngi jãw jãw maci asi vu, a tiˀi le, ˀay muwuwwo ngi mizli ar muguzlum tuwa, a kiɗ mi le, ˀay ngi gujuvur maci asi vu, a tiˀi le.

⁹Anta sam mbaazla ti dimise mata, mbaazla miɗalakaya, a tiram le kwerek kwerek avu misi naŋhaya.

¹⁰Walahay diŋ, a mbizli le wãˀ, hayay gar i migicahay, ko a cam ng'ar taŋ gu ta.

¹¹A ra cufuɗam mbaazla a jiviɗ madiɗahaya, mumul a kiɗ le wãˀ, cira hiri a kiɗ le asi ruwuyo.

¹²Mindire, sey i walahay ɗoɗok, yo mizlingreŋ i mingila le, ara ndil.

¹³Asi ruwuy waɗ a wuzla mizli, gwat mindire, sey ngi zluv ti zluv kaɓa yi ngi tutumbur, kaɓa magam holok ngi gudubun, a dirba ngil naŋ mikiɗ mi le.

¹⁴Na mizli mindiram ti siifa, ara zuɓaka ˀaya nga muŋ, ara hunumaka Bumbulvuŋ mimadiɗa. A ra jam salalay kini tisi pas ngi pastaˀa.

¹⁵A ɓam: «Mizli ngi si pas ngi miprikey, gaka dudok da Bumbulvuŋ, zilaka slimiɗ ngi Bumbulvuŋ, Buymisemuŋ ngi Israyele, ar matura ngir mubuliye.»

¹⁶I ra cinam dimis ani mabo tir kiɗa mi ngi ruwuy: «Ɗuvaka hirnga da Buymisemuŋ mijeŋŋe!» Amma yi ɓi: «Yi zizi le, yi zizi le! I bonoy avu ya.» Muvula mizli ngi jihey, a vulikiy le ngi ji. Vul ngi ji! Muvula mizli ngi jihey, a vulikiy le ngi ji.

¹⁷Makutukukum, kum mizli ngisi ruwuyo, sey i zluwun, vigiɗ waɗ zuva.

¹⁸Mbur masa kil ti zluwuno, a sa diɗ ng'ar vigiɗ, mbur mubo le tir vigiɗe, a sa jakaŋ ti zuva. Fenetir ngi muŋhoy i muwunahay le, sivirzi ngi ruwuyo, ara wusu.

¹⁹Hirwuy ara ndisli, hirwuy ara wuhu, ara wus ti gidaŋ kikit kikit.

²⁰Hirwuy ara gi zaway zaway kaɓa mbur miwi le, a wus kikit kikit kaɓa guɗuku. Mungra naŋ a ro risl a hirnga naŋ, a diɗ le, naŋ anta sa slikiɗ mata.

²¹Ti hin nah na, Bumbulvuŋ a sa jiniˀis a muŋ a diga, asi wurzlaŋ ngi muŋhoy, waɗ a ruwuyo, asi buy ngi ruwuyoy.

²²A sa kusoko taŋ kos kos, kaw kaw taŋ ng'ar vigiɗi, waɗ giceˀ taŋ ar dangay. A dirba taŋ mizikam le so na, sey a slufaka ɓi taŋ.

²³Kiya, a sa hin hirnga, pasa, a sa gi mesem. Haˀaw, Bumbulvuŋ misi gidaŋ wãˀa, i buy a hirnga muwã Siyoŋ waɗ a Zeruzaleme, naŋ ti dudok a mbuŋ mizli micawwahaya.