Read South Giziga ISA 25 Bible Online

ISA 25 - South Giziga bible

ISA 25

¹Bumbulvuŋ, ki Buymisemuŋ ɗu, i ra ngil ti ka wuy, yo i ra hunuma slimiɗ ɗike ti dimis, asi ki ga gwat mupuɗaway, ka mujuwa taŋ ngi gi na le, a roko diga zlezle, taŋ gidaŋ gidaŋ, ko t'anta mbuɗam ta.

²Walahaya, ki tiri di ɗugur le kos kos zikitiŋ, walahay muguno le ti moholo, ki tiri di diŋ le. Hay suburo ngi mulakaya, i hay mata, ko anta sa ndiraka hiri naŋ mata ndiɗaˀ wãˀ.

³Vurˀe, mizli migidaŋhay, ara gukuw dudoko, walahay mimezle ngi sukwi ngi mizli migi gwat ti gidaŋhaya, ara ɗuvukuw hirngaŋ.

⁴Asi ki li ɗumo mbur hĩhĩy, li ɗumo misi murga misi ar bonoy, li ɗum vur vuŋ, susuɗuk ngi niˀi vur pasa, asi himaˀ ngi mbur magi gwat ti gidaŋ na, naŋ kaɓa burgataŋ madumbusla mohol,

⁵kaɓa pas micãˀ cãˀ ar li muˀulo. Mi muwuwwo ngi mulakaya, ki taˀa siriw, kaɓa digizlir ar pasa. Ki taˀa dimis ngi migi gwat ti gidaŋhaya siriw.

⁶Ar muwã Siyoŋ, Bumbulvuŋ a di ɗaf ngi muguzlum da mizli gar, a sa di ˀuse misi mal waɗ mbaazla mundum. A di use munuffo misi mal waɗ mbaazla miɗelelle.

⁷Zana ngi vagay misirit ar mizli gar, waɗ hohoy mupuyaka da sukwi ngi mizli na, a sa turo taŋ ar muwã Siyoŋ.

⁸A sa kiɗa muco ngi wãˀa. Bumbulvuŋ Buymisemuŋ a sa sõhõ tuwuy ngi hiri mizli gar, yo a sa ɓula mesem ngi mizli naŋhaya, asi ruwuy keɗeɗe. Naŋ Bumbulvuŋ a ɓa le.

⁹Tapasa, i sa ɓam: «Buymisemuŋ ndra i naŋ. I njaham hiri le aseˀe, ani a laha ndra le. Naŋ i Bumbulvuŋ, ndra minjaham hiri aseˀe na. Zluzluɓukum, mumulukum, asi ara laha ndra.

¹⁰Gidaŋ ngi Bumbulvuŋ a ro ar muwã hana. Amma Moˀapa, a sa njirslaka daˀ arleˀe, kaɓa mahumusom giziŋ ar vigiɗ misi zay ngi ginewey.

¹¹Adiga, a sa hiziga haŋ, kaɓa mahizigaka ngi ki yam. Ti huhumo vu naŋ na, a sa hin hirngaŋ, asi Buymisemuŋ ara gi slra ti haŋ naŋ.

¹²Moˀap, mohol ɗikey misi mbur a tuwuɗa ta wãˀ na, Bumbulvuŋ a sa mbizla taŋ, a waha taŋ, a tiri ngirnin ati ruwuyo, jom ati mereɓe.