Read South Giziga ISA 26 Bible Online

ISA 26 - South Giziga bible

ISA 26

¹Ti hin nah na, asi ruwuy Zuda, a sa zlaka dimis ani: Ndra ti walahay migidaŋ. Ɓa ngi wi di vu na, mohol gun gun waɗ gun gun mekelem ma.

²Wunaka mizlingreheye, sukwi ngi mizli mijeŋŋehey, mindiram teŋteŋ na, pulaka taŋ ɓa a cam.

³Buymisemuŋ, ki cici le zlak, ki ra vula zuy da sukwi ngi mizli, asi a vulukuw mevel taŋ le da ka.

⁴Vulaka mevel kum ngi wãˀ da Bumbulvuŋ, da Buymisemuŋ, mandazlay ngi sete.

⁵Asi a pa haŋ le da mizli ngir li miɗingireye, yo walahay macam ng'ara gu ta, a mbizla le wãˀ a ruwuyo, ngrof ngrof ar mereɓe.

⁶Mizli mihina hirngahay ati mizli hĩhĩyahaya, a sa kirpaka asi sar.»

⁷Buymisemuŋ, jiviɗ ngi mbur mijeŋŋe aru cirre, ki sinira jiviɗ micirre ngi mbur mijeŋŋe.

⁸Haˀaw Bumbulvuŋ, ar jiviɗ ka mawuɗ i sipaka na, i ra njaham hiri asi ka, gwat ndra mawuɗama, i zila slimiɗ ɗik a muŋ.

⁹Ti duvuɗo, wuluk ɗu a ro taˀ ar ka, yo yi ra supuw ti membezleŋ ngi vu ɗu. Ka maga kiita da ruwuyo, ki ra ga gwat nah na, naɓa mizli ngir duniya a dubunaka gi jeŋŋe.

¹⁰Amma da ara pram ircece da mbur misi moˀore na, naŋ anta sa dubuna gi jeŋŋe ta. Angi ruwuy magam gwat mikaslsla kwana, naŋ a sa gi di i malambaˀ na si, yo naŋ anta pura dudok ngi ɗik, ka Bumbulvuŋ ta.

¹¹Bumbulvuŋ, ki puka haŋ le pak ngbaŋ, t'anta puraka ta, amma ti taŋ masa puraka wirwir ɗik ngi cika vu ar mizli na, a sa pam mesem, vu mubula hĩˀĩ vur mesene ɗikeye, a sa zumataŋ.

¹²Aw Bumbulvuŋ, ki ra vula ndra zuy, gwat ndra magaka gar na, makiɗa mi naŋ i ka vuna.

¹³Bumbulvuŋ Buymisemuŋ ndra, buy mekelemey mbak ka le na, ara tikam ndra ˀay, amma ndr'i zilam di i slimiɗ ɗik tewle.

¹⁴Ani mumucahay anta moko ti siifa mata, vagay ngi mizli anta slikiɗam mata na, i ka miga ɓa a ngizlaka taŋ, ko gwat ɓa a wulkaka taŋ keŋ ava na, ki susuyumo taŋ le avra.

¹⁵Ki gila sukwi ngi mizli le, Bumbulvuŋ, ki gila sukwi ngi mizli le, ki biga dudok ɗike le, ki budaha maakway ngi ruwuyo le cek ceke.

¹⁶Bumbulvuŋ, da ndra ar bonoy na, i zilukuw ɓa ki kilo widi ndra. Da ki ra kuta ndra ti bonoy na, i mbuɗam mevel, i diram dibiɗi.

¹⁷Bumbulvuŋ, ndra zleˀe a mbuŋ ɗike, kaɓa ngwas misi ti hur, gweˀ ngi yi, matuwuy gidaˀas gidaˀas ti ji naŋ.

¹⁸Ndra kwana, i gam hur le ya, yi naŋ a ja ndra le ya, amma kaɓa i yam ar deɗe ngi zuŋ i himiɗi: i soko ti laha vu asi ruwuyo ta, i soko ti mizli nawayahay ngi cifi asi ruwuyo ta ma.

¹⁹Mizli ɗikey mumicama, a sa moko ti siifa a muŋ, vagay taŋhay a sa slikiɗam. Kum mizli ngi ruwuyoy, puɗukom, jam salalay, asi wulngar ɗike, i wulngar ngi li minjahha, yo hirwuy a sa vula siifa da mizli mumucahay a muŋ.

²⁰Mizli ɗuwoy, mam ngi hay kumoy, gicaka miviŋheye kap kap ng'ar kum. Ɗumom ngi zik neˀe, ɓa Buymisemuŋ a tisla mevele ɗagay.

²¹Ani Bumbulvuŋ ara bo tir hay naŋ, ɓa a cufuɗa ɓi ngi mungra taŋ madiɗahay na, avu mizli ngisi ruwuyoy, ɓa a slufakaŋ di. Joˀ ruwuy a sa ngulo pumbusu, a sa pula sumbuto mizli mikiɗahaya.