Read South Giziga ISA 27 Bible Online

ISA 27 - South Giziga bible

ISA 27

¹Ti hin nah na, Bumbulvuŋ, maslalam naŋ mitataɓ tataɓ, madiɗa, migidaŋ na, a sa cici di zlak ng'ar Leviyataŋ, kaw masumuɗu, ng'ar Leviyataŋ, kaw micirmisl cirmisl na. A sa kiɗa ngoŋngoŋ ngir mubibliye vagay.

²Ti hin nah na, kisa zlam dimis ngi hunuma gudubun magi mbaazla mundum.

³«Ya Bumbulvuŋ, yi mijigin naŋ, i paŋ yama, ar hin naŋ weˀe weˀe. I jigina duvuɗ ti papas vur mizli macam ɓiyoh ngi hiriyaŋ.

⁴Mevel anta jiy mata, da i lum hadaw ati sisim le ara na, i sa ɗuva taŋ vu a wuram.

⁵Amma mbur masa gi ti ya li ɗum naŋ na, a sa ndir zuy zuy ati ya, gisiŋ, a sa ndir zuy zuy ati ya.»

⁶Ti mbuŋ na, mizli ngi Zakopoy a sa pam dimbasl, Israyel a sa hil mufuyuk, a sa ɗiɗi pircici, a sa nahaka ruwuyo ti yi taŋ.

⁷Buymisemuŋ a kiɗa mizli makiɗaka taŋ na, kaɓa naŋ mikiɗa mizli makiɗaka taŋ zleˀe na ya kwa? A ngizla mizli mangizlaka taŋ na, kaɓa naŋ mingizla mizli mangizlaka taŋ zleˀe na ya kwa?

⁸Ĩˀĩ, a sla kiita taŋ, a ɓula taŋ, a bi taŋavra. A ɓula taŋ ti himiɗ mibiw biw ngi balam naŋ, ar hin purla si, ti burgataŋ ngisi pas ngi mipriki.

⁹Yo mungra madiɗa ngi mizli Israyeleye, a sa susuyum kanah ya. Yo migir ngi pula mungra taŋhaya, n'ani: a sa wahaka ɗugur ngir li gi mikuliheye cek, kaɓa mawaham burkoɗok ngi kur da gwata, kuli ɓamtalay ati li wura ˀurdiheye, anta sa ng'aka taŋ mata.

¹⁰Walahay muguno ti moholo, a sa ndir daŋdaŋ, a sa tiri li zum ngi ginewey, mupula kirɗak kaɓa li papala. Ziri slahay a sa zumam a diga, a hinam a diga, yo a burutom mihaŋ ngi widisey a diga.

¹¹Ti mihaŋ ngi widisey misa muˀulom le na, a sa ngilaka taŋ, ngwasay a sa soko, a ɗuvaka taŋ vu. Haˀaw, mizli hanayna, sli wala ngi gwat anta avu taŋ ta. Vurˀe, mbur miga taŋ na, ko ircece anta gaŋ ti taŋ ta, mbur migi taŋ, ko anta ga taŋ mezle neˀ le ta.

¹²Ti hin nah na, Bumbulvuŋ a sa ɗugo gwat ngi sifi naŋ, zle a Efrat mizaw madiɗa hã sesẽŋ a mizaw Ezipte. Na kum ziri ngi Israyeley na, a sa jukum cesl cesl kaɓa magam holoko.

¹³Tapasa, a sa faka tulum madiɗa toot. Mizli mizizahay misi zleˀe a Asiri ati mizli muɓulahay zleˀe nga ruwuy Ezipte na, a sa moko, dar a sa hurukom huruk huruk a mbuŋ Bumbulvuŋ, ar muwã mipal , a Zeruzalem.