Read South Giziga ISA 28 Bible Online

ISA 28 - South Giziga bible

ISA 28

¹Kay bonoy! Samari walahay mugudurak kaɓa loppol tuwa, ara cira hiri da mizli Efrayimey muwam le ti mbaazla. Samari naŋ ar ɗigar, a hirnga sozo magi gwat haɗa, gwat ngi wuya naŋ mukuy teˀe, i mufuyuk muɓuto le, a bam vu ati mbaazla miwa mizli le ɓaˀɓaˀa.

²Puraka soje migidaŋ ngi Bumbulvuŋ ani, naŋ kaɓa vuŋ misi yam, kaɓa burgataŋ mingizla gwatay. Naŋ kaɓa vuŋ mazuɓ mekepel, a juruf ti gidaŋ. Buymisemuŋ, ti gidaŋ naŋ, a hina gwataya cek a ruwuy.

³Loppol ngi jijih ngi mizli Efrayim muwam le ti mbaazla tuwa, a sa kurpaka asi sar,

⁴yo mufuyuk muɓutohoy, gwat ngi wuya naŋ, misi a hirnga sozo magi gwat haɗa tuwa, a sa tiri mepiɗece ngi uruf, manih daf angi sife: mbur a pura le na, a zuɓa, a nda suɗuk.

⁵Ti hin nah na, Bumbulvuŋ misi gidaŋ wãˀ a sa tiri loppol miwilik wilik, i loppol waɗ gwat ngi wuya ngi mizli naŋhay mindiram ti siifa.

⁶A sa vula wuluk mijeŋŋe da mbur magi kiita mijeŋŋe, a sa vula wirwir da mizli maɓulaka mesene taŋhay misi a mizlingre ngi walahaya.

⁷Naŋ kine, masayay ati mijiviɗeye, mbaazla ara ziza taŋ ya. A ram zaway zaway, asi a sam barasa le. Baraasa ara ziza taŋ, mbaazla ara zuma taŋ, a ram zaway zaway, asi a sam baraasa le. Pura gwat taŋ ti kleŋ, ara ziza taŋ, Da ara gam kiita na, a zluɓaka zlaɓ zlaɓ.

⁸Li zuma gwat taŋ, i vunuh cek cek, a zĩˀĩ kuy ta wãˀ, ko li feŋ a ndir ta.

⁹Joˀ a ɓam: «Izayi vuna, a wuɗ a dubun gwat da waka? A wuɗ a mbiɗa pulaˀvra ngi gwat Buymisemuŋ minjikaŋ di vuna da waka? Da ziri mitikaka taŋ ar ɗuwa wureˀ aruŋ kwa? Da bede bedehey mupulaka ɗuwa wureˀ aruŋ kwa?

¹⁰A sulɓokoŋ mi, a ɓam: A gi mi gozlogozlo lambaˀ, wuyta kini, wuyta kini lambaˀa si.»

¹¹Naŋ kine, hana i mi taŋ macinam ta, Bumbulvuŋ a sa ɓa mizli hanayna ti mi ngi mulakay.

¹²Naŋ a ɓa taŋ zleˀe na: «Muska vu ani, pulaka mbur migir le, a musuk vu, tisla mevel ani.» Amma taŋ a ngumom cin naŋ ta.

¹³Na mingiɓi ngi Bumbulvuŋ, a sa tiri vur taŋ: «Gozlogozlo lambaˀ, wuyta kini, wuyta kini lambaˀa si.» Dar taŋ mira laˀam na, a sa ndilam ɗakak ɗakak, a sa ngilaka duba, a sa ndiram ɓaˀ ɓaˀ kaɓa mijahay le ar kwar.

¹⁴Kum mizli migi mi ngi wuyahay, kum mawaka mizli Zeruzalemey na, cinaka mingiɓi ngi Bumbulvuŋ so.

¹⁵Ki ɓam: «I ɗiyam ɓi ngi jumo ˀay le ati muco, i slam ˀay kiri le ati li ngi mizli mumucahaya. Bonoy masa ndilo na, a sa cuh, ko a luuma ndra ta, asi slire, i tiram di li ɗum ndra le, yo gi gwat ti kwacay cuwo, i li ɗum ndra.»

¹⁶Vurˀe, ya Bumbulvuŋ Buymisemuŋ i ɓukum na: «Ani, a Siyoŋ, i ra ki ɗugur ngi ci a kwacay kum, i ɗugur ngi jaha mivay ngi hay, ɗugur mupuɗaw, mika hĩˀĩ ngi ndira sivirzi ngi hay. Da mbur ara ginisl di na, gwat anta sa gaŋ ta.

¹⁷Ɓimujuwa mitaˀ gara, i zeweɗ ngi wi gwat, yo ɓi mijeŋŋe, i ngi wi gwat cay rak raka. Joˀ yam a sa waha li ɗum ngi slire, yo yam a sa kil ti li cifi kumoyo.»

¹⁸Jumoˀay kum ati muc tuwa, a sa susuyum, sli ˀay kiri kum ati li ngi mizli mumucahay tuwa, anta sa ru ta. Bonoy masa ndilo na, a sa ngizlukum pay.

¹⁹Naŋ mira gi gar na, a ndilukum ndil le. Asi a sa gi ti miprik, ti pastaˀa, ti papas waɗ ti duvuɗo ma, na, da mizli a sa cinaka ɓi nah le na, zluwun a sa gi vu haɗa.

²⁰Kaɓa kicuwul maɓi, arngawo, a sa tiri gbusl kini ngi murɗo sara, borgo a sa tiri serre ngi sirit avu vu.

²¹Haˀaw, Bumbulvuŋ a sa slikiɗ kaɓa naŋ mislikiɗ zleˀe a muwã Perasim. A sa ɓuruk jaɓ jaɓ ti mevele kaɓa naŋ muɓuruk ar li micay ngi Gabaˀoŋ, ti naŋ mawuɗ a kiɗa mi ngi gwat gi naŋ gwat ngi gi naŋ mufuna wuluk ngi mbur. ti naŋ mawuɗ a kiɗa mi ngi slra naŋ, slra naŋ ngi zuma hirnga na.

²²Wurenna, ki ɓam mi ngi maraɓa mata, vur jum kum masa nguw, asi yi cin avu Bumbulvuŋ Buymisemuŋ misi gidaŋ wãˀ na, ɓi ngi ngizla ruwuy gar na, a juwa ɓi nah le si.

²³Jikam slimiɗe, cinaka mingiɓi ɗu. jam lesl, cinaka ya maɓi na.

²⁴Mbur muhufo, da a wuɗ le ɓa a zligi gwat na, a ndir hiipas ar li huf, ar li guruw waɗ ar li sinira li si kwa?

²⁵A sinira li naŋ ɗagay, a dirba nah, a zliɗa hilfa ngi nizele , a zliga kumeŋ , a zliɗa alkamari ati daw giziŋ waɗ hilfa daw mekelem a mi guva.

²⁶Dambalaka, madubunaŋ gwat, yo masirkaŋ jiviɗ ɓa a sipa na, i Buymisemuŋ naŋ.

²⁷Anja sar ngi mota ngi ru ar yam a ngruwa nizele ta, yo sar ngi mota ngi pilis a cuh baɗ ar kumeŋ ta, amma, a ɗugoko nizele ti tokom, yo a ɗugoko kumeŋ kwana, ti bonoy.

²⁸A ngirwaka alkamari le kwa? Ĩˀĩ, anta ndiram ar li ɗugo alkamari ta. A cohom ti sar ngi mota ngi pilis ara jom ti pilis naŋ ɓula, amma, anta ngirwaka ta.

²⁹Nah vuna kwana, a bo tivu Bumbulvuŋ misi gidaŋ wãˀ vuna ma, a bugo vu kaɓa muvula kuti mezleŋ waɗ misin gwat haɗa.