Read South Giziga ISA 29 Bible Online

ISA 29 - South Giziga bible

ISA 29

¹Kay bonoy da Ariyel, da Ariyel, walahay ngi Zeruzalem, Davit muguno gun ngi kiɗa vu na. Anja vi mekelem a mbuɗo ng'avi hana na, jom ti sila ngi muguzlumoyo gar.

²Buymisemuŋ a ɓi na: «I sa cuh baɗ tir Ariyel, a sa lik, a sa niˀici, a sa tiri avu ya kaɓa ariyel.

³I sa pa walahay guɗuk ɗu gun hirnga naŋ kaɓa Davit mipa na ya. I sa gucuw giceˀ ng'ar li muguc, I sa so ng'avu ka ti mizli migidaŋhay.

⁴Ki sa ŋihiy ɓaˀ a ruwuy, kisa ɓo ti ruwuy. mingiɓi ɗik muvuso, a sa bo kaɓa tisi mereɓ, ˀay ɗik a sa bo ti ruwuy kaɓa ngi mbur mabo ti wuzla mumucahay, yo mingiɓi ɗike, a sa bo tisi mereɓe, kaɓa fuyuku.

⁵Mesene ɗikey mizigiduw taˀ na, a sa tiram kaɓa lagwada, zigiduw ngi mizli misi moˀoreheye, a sa tiram kaɓa haslaɓ, himiɗ makil di.» Dar gurjik si na,

⁶Bumbulvuŋ misi gudaŋ wãˀ a sa ga kiita naŋ ar vuŋ mandisli, ar ruwuy mawus, burgataŋ, musure, ar vuŋ ati irne vu mazum li.

⁷Zigiduw ngi mizli mazlaka Ariyele zleˀe ngi kiɗa vu, mizli gar makiɗam vu zleˀe ati naŋ, magunokoŋ ti moholoy yo maɓucokoŋ ɓuc ɓuc na, a sa cohom kãk kaɓa musuwun, kaɓa kleŋ ti duvuɗu.

⁸Zigiduw ngi mizli makiɗam vu ati muwã Siyoŋ na, a sa gi vur taŋ kaɓa mbur, may majaŋ, a musuwun kaɓa ara zum, amma a sa puɗuk na, kwacaya njoŋ, malla kaɓa mbur, madaliyam magaŋ, a musuwun kaɓa ara si yam, amma a sa puɗuk na, mumburloko moˀol moˀol.

⁹Ndiram teteˀ teteˀ, cifam ngirkik, tiram dangaray yo ndiram di kine, wam, amma ti mbaazla ta mbula, ara ti zaway zaway, amma vur kisam mbaazla le ta mbula.

¹⁰Asi Bumbulvuŋ a pukum musuwun ngi gukum vu guluɓ guluɓ le. Kum mijiviɗey, a tuɗukum hiriheye le, kum mupur ti kleŋhey, a juwukum hirngahaya le.

¹¹Taŋ munjukukum ɓi hanayna, avu kumo, naŋ kaɓa mingiɓi mutoho ar ɗerewol mujuwa kaˀ kaˀ, mavulaka da mbur misina sluf le, a ɓakaŋ: «Slufa gwat ani.» Naŋ a ɓi: «I slufa gu ta, asi ɗerewol i mujuwa le.»

¹²Joˀ a sa vulaka da mbu misila sluf ta, a ɓakaŋ: «Slufa gwat ani.» Naŋ a ɓi: «I si na slufo ta.»

¹³Bumbulvuŋ a ɓi na: «Mizli, a kircohoko ng'avi ya ti mingiɓi si, a hunumikiy daˀ avu mi si, amma mevel taŋ naŋ kileŋ avu ya. Taŋ maɓam ara sluwunam ti ya vuna, i gwat ngi sirik ngi mizli titrahay, mudubuna ti dubun.

¹⁴Vurˀe, i sa ga taŋ gwat migam ɗaˀ tahay ava ma, hã sinmijileŋ ngi mizli misi siney a sa zizi ara, yo lesl ngi mizli misi lesley a sa ɗum.

¹⁵Mizli tayna a gam slra ti yaŋ yaŋ ɓa gwat taŋ mawuɗam gi naŋ na, a ɗumoko avu Bumbulvuŋ. A ɗumom nga susuɗuk, a ɓam: «Mapura ndra i waka? misina gwat ndra magaka na, i waka?»

¹⁶Ani ki ra gaka gilaw da vu kumo so! Ada gam ti mindira gwata, kaɓa hohoy makwa? Gwat naŋ mindira le na, ada ɓaŋ: «I ka mindiriy ta» kini makwa? Tutuŋ ada ɓa mbur mindira gwata: «Ki sin gwat ta» kini makwa?

¹⁷Hin neˀkini nga mbuŋ na, li mingriɗ ti widis a Libaŋ, a sa tiri ngiriɗ ti widis mayam zingahay. Amma li mingriɗ ti widis mayam zingahay, a sa tiri ngiriɗ ti widis hõ gar takwa?

¹⁸Ti hin nah, midigizlahay a sa cinam maslufaka ɗerewolo, yo dangaray a sa boko tir li mitimbiɗim titira, dar hiri taŋhay a sa puram.

¹⁹Bumbulvuŋ a sa ga ɓa hĩhĩyahay a ciram hiri nga mbuŋ nga mbuŋ, yo misi murgahay a sa zluzluɓam mbele Buymisemuŋ mipal ngi Israyeley.

²⁰Asi mike na, a sa so i kiɗa mi ngi mizli misi moˀorehey, misingir ar mizli a sa ngizlam pay, yo mizli mawuɗam gi malambaˀa, a sa ngizlam pay.

²¹Akeŋ, mizli magam kiita ngi muc da mbur, ti mi ngi balam taŋ, mizli mapam mazaɓ da mizli ar li ngila mi ar kiita, yo a tikinaka ɓa mbur migi gwat ta si na a diɗ ng'ar vigiɗ na, taŋ gar a sa ngizlam.

²²Vurˀe, Bumbulvuŋ Buymisemuŋ ngi dideˀ ngi Zakopoy, milaha Abrahama a ɓi: «Zle dana, dideˀ ngi Zakopoy anta sa vus mata, mihiri naŋ anta hĩhĩy mata.

²³Asi mike, taŋ ati ziri taŋhay masa puraka gwat ya miga a wuzla taŋ na, a sa sinaka yi Buymisemuŋ mipal, yi Buymisemuŋ mipal ngi Zakopo. A sa jijikam a mbuŋ ya Buymisemuŋ mipal ngi Israyele.

²⁴Mizli misina ɓi tahay, a sa lumam lesl, yo mingilamihey a sa tiɓaka ɓi madubunaka taŋ di na.»