Read South Giziga ISA 3 Bible Online

ISA 3 - South Giziga bible

ISA 3

¹Haˀaw, zumabuy ngi Zuda ati ngi Zeruzaleme, gwat mavula taŋ ɗaf ati yam gar na Bumbulvuŋ migidaŋ wãˀa, a sa muɗa taŋ di avra yo gwat majina taŋ gar na, a sa zuɓa taŋ di avra.

²Mizli migidaŋhay ati mizli ngi vurumoy, migi kiitahay ati mijiviɗey, mipi daˀasay ati mizli micawwahay,

³madiɗa ngi sojehey ati mizli madiɗahay, mukuti vuhoy ati misina pura daˀasay, waɗ misina ɓi ngi cucukoyo, a sa muɗa taŋ gar avra.

⁴Bumbulvuŋ a ɓi: «I sa vula taŋ ngi buyo i ziri memeɗehey ɓa a sa waka taŋ ka mawuɗam.»

⁵Mizli a sa guzuvuram vu ar wala taŋ, mbur gar a guzuvur cala. Zuŋ, a guzuvur midigila, mbur kesefe, a guzuvur buyɓi.

⁶Mbur a sa ja sukum naŋ, muy mikaslsla, a ɓaŋ: «Ka, zana ada avu ka, kisa cifi buy ndra. Anja ɓi mibiyãˀbiyãˀ ndra hana, a ndir asi haŋ ɗiki.»

⁷Mbur numuŋ a sa ɓaŋ ti ˀay bok: «Yi mumbulo mizli ta, yo a hay ɗu gwat ngi zum anta, zana ngi ki anta. Ki cifikiy buyo ta.»

⁸Zeruzalem a mbizli le, Zuda a diɗ le. A ra mbiɗam hirnga avu Bumbulvuŋ ti mingiɓi taŋ waɗ ti gwat ngi gi taŋ. Yo ara hirsaka dudok naŋ.

⁹Mihiri taŋ a njika taŋ le, a ɓaka ɓi ngi mungra taŋhaya kaɓa mizli Sodomoy na ya, ko anta ɗumoko ta. Kay, ara soko ti mendere nga hirnga taŋ.

¹⁰Kum ɓam: mbur mijeŋŋe ara mumul, asi hiri a sa ciraŋ ti gwat ngi gi naŋ.

¹¹Amma mbur misi moˀore, naŋ ar bonoy, asi a sa gam di weˀe avu gwat ngi gi naŋ.

¹²Bumbulvuŋ a ɓi: Aw mizli ɗuwoy! Buy mihimaˀ kumo, i zuŋ meciɗeke. Yo i ngwasay mawukum. Aw mizli ɗuwoy! Miji hirnga kumoy ara zuzukum. Yo ara ngizlam ti kum avu jiviɗ kum masipaka.

¹³Bumbulvuŋ a ro weˀ vu ngi gi kiita, a ro deŋ ngi gi kiita da mizli naŋhay.

¹⁴Bumbulvuŋ ara ru ti micawwa naŋhay ati buy ngi mizli naŋhaya ng'ar kiita. A cufuɗa taŋ: «Guva ngi gudubuno, i kum mihiryaka, yo hay kumoyo, ki nahaka taŋ le ti gwat kum mutuɓoko taŋ avu misi murgahay.

¹⁵Ki kirahaka mizli ɗuwoy avra vur mike? Yo misi murgahaya, ki kurpaka taŋ asi sar vur mike?» I ya Bumbulvuŋ Buymisemuŋ misi gidaŋ wãˀ maɓi.

¹⁶Ya Bumbulvuŋ i ɓi na: «Ziri diili ngi Siyoŋhoy, ara huhumom vu, a laˀam ˀay kaˀ a muŋ, a puram vu ti dangwal ngi hiri. A ram ciɗkeˀciɗkeˀ, ti hurumo ɓalaŋ ngi sartaŋhaya.»

¹⁷Bumbulvuŋ a sa ga taŋ movroko a hirnga, yo a sa hijaka taŋ hirnga kuleɗ kuleɗ [1]

¹⁸Ti hin nah, Bumbulvuŋ a sa cuko gwat ngi wuya taŋhay avra: i mawiyerey, virzle hiri paatu, dangwa,

¹⁹gwat ngi slimiɗey, ɓalaŋ, zana memeɗe ngi sirta hiri,

²⁰loppoloy, virzle memeɗe ngi ˀay, kanda mislipa, muhurlum mutufa, laya.

²¹dangwa, gwat ngi hutuŋ,

²²zana ngi muguzlumoy, adikuhoy, zana ngi luw asi ˀay, gabal ngi haŋhay,

²³darogalay, zana mija ti gugumay mislirkeɗey, lafayehey waɗ zana ngi tuwuɗa hirnga.

²⁴Ar deɗe ngi ˀurdi, i zĩˀĩ mitititi, ar deɗe ngi kanda, i zeweɗe, ar deɗe ngi slupa hirnga, a sa hijaka taŋ, ar deɗe ngi zana ngi gugumay mislirkeɗe, i zana ngi vagay, ar deɗe ngi kuy ngi vu, i dumvu mukuy ta.

²⁵Zeruzalem, a sa kiɗaka mizli ɗikeye pay ti maslalam, soje ɗikey a sa micam ar kiɗa vu.

²⁶Walahay gar a sa niˀic, yo a sa tuwuy. Joˀ kisa cifi kupuyah ti lik, kaɓa ngwas miziza ziri naŋhay le cek.