Read South Giziga ISA 30 Bible Online

ISA 30 - South Giziga bible

ISA 30

¹Bumbulvuŋ a ɓi: «Kay! Kum ziri micina mi tahay, i bonoy avukum. Ki ɗiyam ɓi ngi gi slra misi mabo tivi ya ta, ki jumom ˀay ati mizli munja a ram ati wuluk ɗu. Kanah na, ki ra ɗupam mungrahay ɗap ɗapa.

²Ki zuɓam mulak nga Ezipte munja ki cufuɗikiy, Kumo, ki ram ɓa ki cifam setette, ar li ngi Farawoŋhoy, muguno ti mohola, ɓa ki ɗumom ar susuɗuk ngi Ezipte.

³Amma, li ngi Farawoŋhoy, muguno ti mohola, a sa pukum mesem, yo li dum ngi susuɗuk ngi Ezipte, a sa pulukum ɗokok.

⁴Ani, buy kumoy a roko zlezle a Tanis, mislin ngi buy kumoy a ndilam le a Hanese si.

⁵Taŋ gar taŋ, mizli a sa paka taŋ mesem. Mizli tayna, anta sa gam gwat ati taŋ ta, anta sa kiloko widi taŋ ta, a sa gam gwat ati taŋ ko neˀ ta, amma, a sa paka taŋ mesem ati hiriya vu.»

⁶Tila mi: Ginewey ara ram kini tir vay muŋ. A ra tuwuɗam li ngi bonoy, li ngi lik ati li mikirɗak, gidaŋ gidaŋ. I li ngi mobor mizile ati mongoso, ngi kwecesl ati ngoŋngoŋ maslikiɗ ti zlara. Mizli ara ram ti zlili taŋhay, ara ram gwat ngi lum taŋhay, ɓaˀ ɓaˀ a duba zungu ati zlogomohoy. A ram taŋ da mizli magam gwat ati taŋ tahay.

⁷Ezipte a jina taŋ ti himiɗ ati ɓi lambaˀ, vurˀe i sa caŋ slimiɗe ‹Mizlira dibiɗ magi slra ta›. Ki mumuyuŋ ngi zay sla a slimiɗ vur hin ngi mbuŋ

⁸Buymisemuŋ a ɓa Ezayi: «Wurenna, a mbuŋ taŋ mizli Israyeleye, toho ɓi hana toh toh ar dum mikambraˀa kambraˀa, toh toh mekelem ma, ɓa sa tiri i sedewo ngi mbuŋ, hã ngi sete.»

⁹Haˀaw, i mizli miɓiɗi hirngahay, i ziri mitikina vuhoy. Gwat Bumbulvuŋ madubuna taŋ di na, t'anta wuɗam cin naŋ ta.

¹⁰A ɓaka mupur ti kleŋheye: «Anja ki puram ti kleŋ vuna mata», yo a ɓaka mijiviɗeye: «Ki tilam ndra mi ti ɓi ngi gwat mijeŋŋe mata, ɓam ndra ɓi ngi gwat mundumoy, tilam ndra mi ti ɓi ngi gwat ngi slirey.

¹¹Mbuɗam duba avu licuho, baˀam a jiviɗe. Buymisemuŋ mipal ngi Israyel na, susuymom ndra di avra.»

¹²Dambalaka, Buymisemuŋ mipal ngi Israyel a ɓi na: «Ani ki hizigaka mingiɓi ɗu avra, ki vulaka vu kumo da migi vurumoy, yo ki jaham ti migi slirey.

¹³Mungra hana, a sa tiri avu kum kaɓa mohol madiɗa micir le: da a gi le hogokko na, a mbizli grip kutum si.

¹⁴A wuh meɗ meɗ, ko a juɓoko gu mata, kaɗa kukulum muwuh le, ar memeɗe naŋhay na, ko gaˀay ngi zuɓa vu malla ngi nuwa yam ar zlazlar kwana a lumam ta.»

¹⁵Bumbulvuŋ Buymisemuŋ, misi gidaŋ wãˀ a ɓi na: Ɓa kisa laham na, sey ki mbuɗam mavel yo sey ki cifam lek leke. Ɓa kisa lumam gidaŋ na, sey ki cifam teˀ teˀ yo sey ki vulikiy vu kumo da ya. Amma kumo ki ngumom ta.

¹⁶Kumo ki ɓam: «Ĩˀĩ, ndr'i sa kilam ti pilisey», Naŋ kine, kisa kilam. Na mana ki ɓam: «I sa hilam mota ngi pilis muwusa vuhoy», Haˀaw, amma misipi kumoy a sa wusam vu fineˀ taŋ ma.

¹⁷Mesene kum purla a sa sa bonoy da mizli kumoy durmuk. Mizli zlum a sa sukum bonoy, kisa kilam taŋ. Ar kiɗa mi naŋ na, mizli mindramay a sa cikilam huluk kaɓa gwat mabigi gwat a hirnga muwã, kaɓa gwat ngi pura gwat ava ar li miɗingir.

¹⁸Amma so na, Bumbulvuŋ ara kutuk hin ɓa a luhukum, a wuɗ a bugukum naŋ mapur ircece na kutum, asi mike, Bumbulvuŋ i Buymisemuŋ mijeŋŋe. Mizli manjaham hiri ar naŋ na, taŋ ar mumul.

¹⁹Ĩˀĩw kum mizli Siyoŋhoy, kum misi a Zeruzalem na, kum anta sa tuwam mata. Da ki wudam le ng'avu Buymisemuŋ na, a purukum ircece. Naŋ micin le sina, a zulukum mi.

²⁰Da may ara jukum na, a sa vulukum gwat ngi zum, da madalyam ara gukum na, a sa vulukum yama. Naŋ madubunukum gwat tuwa, naŋ anta sa ɗum mata, joˀ kisa puraka ti hiri kum.

²¹Da ara ɓukum ngi ru ti hazum malla ti gula na, kisa cinaka ˀay naŋ masa ɓukum di a dirba kumo: «Jiviɗe n'ani, aru ti ra.»

²²Li ngi ɓiri bara ati kuli kumoy miciɗa ti ciɗey, yo kuli misirita ti ɓiri tapasl tapasl waɗ kuli mipa ti pihey na, sey ki puraka taŋ kaɓa i misi dilihey. Ki sa hizigaka taŋ avra kaɓa gwat mihiryahay le, joˀ ki ɓaka taŋ: «Dilihey».

²³Da ki zligam gwat ngi hilfahay le na, Buymisemuŋ a sa vulukum vuŋ. Hirwuy a sa gi gwat ngi zum haɗa yo i mundumoy ma. Ti hin nah, ginew kumoy a sa zumam ar li zum taŋ miciɗak ciɗaka.

²⁴Sla ati zungu ngi hufoyo a sa zumam murbuc milemme, minjika le a ruwuy ti dum slimiɗe.

²⁵Ti hin ngi ngizla vu madiɗa, hay migilahay masa mbizlam na, yam a sa gi haɗa a hirnga muwãhay waɗ ar li miɗingireye.

²⁶Ti hin Bumbulvuŋ masa mbiza waˀa ngi mizli naŋhay, yo naŋ masa kufa taŋ di na, kiya a sa pusluɗ kaɓa pasa, pas a sa pusluɗ is tarnaˀ fineˀ misi zleˀe, kaɓa ngi hin tarnaˀ

²⁷Puraka Bumbulvuŋ zle kileŋ, ara so ti haŋ naŋ. Mevel aro njim njim ka vu, mi ngi balam naŋ i ɓi ngi himaˀ, irne naŋ, naŋ kaɓa irne ngi vu mazum li.

²⁸Himiɗ naŋ, kaɓa mekepel mazuɓ maso taˀ ti ˀay. A sa dingila sukwi ngi mizli ti kata ngi mendere, yo a sa ci lejeŋ a balam mizli ɓa ngi ziza taŋ.

²⁹Kum Zeruzalemey, kisa zlam dimis kaɓa ar duvuɗ ngi muguzlum, kisa mumulom, kaɓa mbur maru bal ti cine ˀay ngi bozloro, kini nga muwã ngi Bumbulvuŋ, ng'ar mandazlay ngi Israyeley.

³⁰Bumbulvuŋ a sa ga ɓa ˀay naŋ ngi buy na, a cin, dar a sa biga gidaŋ ngi hirbazla naŋ. Mevel naŋ, a sa biga a wuzla irne vu mazum li, jom ti vuŋ misi ti yam.

³¹Asiri masa cine ˀay ngi Bumbulvuŋ na, a sa jijik ti zluwuno asi makiɗakaŋ ti tokom.

³²Bumbulvuŋ mikiɗa le gar na, A sa kiɗa jãw jãw ati gujuvur. yo naŋ masika haŋ gar na, a gi vurum ati taŋ.

³³Vu i miɗiya le zleˀe si, naŋ vur buy vuna ya. A kusom dum ndit ngi ɗiy naŋ, ar li miligidaˀa. ˀUf ngi Bumbulvuŋ misi kaɓa mekepel ngi himiɗna, a sa bula vu.