Read South Giziga ISA 31 Bible Online

ISA 31 - South Giziga bible

ISA 31

¹Mizli ara ram nga sipa jini ˀis a Ezipte, kay! I bonoy avu taŋ. A ɗuvaka wuluk taŋ taˀ ar pilisey, a pulaka vu taŋ da mota ngi pilisey asi taŋ haɗa, waɗ da misi pilisey asi taŋ migidaŋ. Amma a ɗuvaka hiri taˀ le ar Buymisemuŋ mipal ngi Israyele ta, t'anta sipaka Bumbulvuŋ ta.

²Naŋ vuna ya kwana, gwat ngi gi na, a si na le: a so ti mendere gu. Mi naŋ miɓa le na, anta mbiɗa ta. Yo misi moˀorehey ati migi malambaˀhay, mizli mazilaka ngi kila widi na, a kiɗam vu ati taŋ.

³Eziptehey i mizli titirahay tewle, taŋ manja gidaŋ ngi Buymisemuŋ, pilis taŋhaya taŋ ti useˀ ngi vu si, taŋ manja musuɗuku. Ti Bumbulvuŋ masa puka haŋ naŋ na, milaha vu a sa bi sar joˀ mbur milaha a diɗ: a micam cuw taŋ.

⁴Bumbulvuŋ a ɓiy na: «Da mobor mizile malla mongoso ara tuwuy asi gwat naŋ mija na, mijiginey a soko kip, a wudam kwana, ko widi ati mi taŋ magaka na, anta zluwunaŋ ta. Da ya Bumbulvuŋ, misi gidaŋ wãˀ i sa po sar le nga hirnga muwã Siyoŋ, ng'ar li miɗingir ɓa ngi gi vurum na, a sa gi kana ya.»

⁵Bumbulvuŋ, misigidaŋ wãˀa, a sa ɗumo Zeruzalemey kaɓa ɗiyuwoy manjiraka kirpasl taŋhay na. A sa ɗumo taŋ, a purto taŋ, a sa bo taŋ tir vurumo waɗ a laha taŋ ma.

⁶Israyeley, kum mimbiɗam diba wãˀ avu Bumbulvuŋ na, moko ng'ava so.

⁷Ti hin nah, kuli ngi ɓiri bara ati ngi ɓiri tapasl tapasl, mbur gar mindra ti haŋ naŋ na, a sa hiziga avra.

⁸Asirihey a sa ngizlam ti maslalam misi i ngi mbur titira ta. Maslalam ngi mbur titira anta sa zuma taŋ ta. A sa kilam ti maslalama, dar a sa jaka soje taŋhaya ngi gi slra mitakˀay.

⁹Vur himaˀ tuwa na, migidaŋ wãˀhay a sa kilam, sojeheye, didak a sa muɗa taŋ. I ya Bumbulvuŋ miɓa. Naŋ misi irne vu naŋ a Siyoŋhoy, yo daliivu naŋ a Zeruzalem na.