Read South Giziga ISA 32 Bible Online

ISA 32 - South Giziga bible

ISA 32

¹Dar buy madiɗa a sa zuma buyo kasl kasl asi ɓi mijeŋŋe, buyoy a sa waka li kasl kasl, asi ɓimujuwa mitaˀ gar.

²Mbur gar a wuzla taŋ, a sa tiri kaɓa li ɗum ti himiɗ mibiwbiw, kaɓa li ɗum ti vuŋ misi burkataŋ. A sa tiram kaɓa yam maɓul ar li muˀuloŋ, kaɓa susuɗuk ngi gidigil muwã ar papala.

³Hiri mapuro, anta sa tiɗi tiɗeˀ le mata, slimiɗ macine, a sa cin kuy kuy.

⁴Mizli gilawaya, a sa slaka wala ngi ɓi, yo miɓi mi midədəheye, a sa ɓam calala, a cin kwaŋ kwaŋ.

⁵Mbur manja lesle, anta sa cakaŋ slimiɗ ngi buyoy mata, yo anta sa ɓaka mbur migi gilaw da mizli, ki vul ti gula ti hazum mata.

⁶Naŋ kine, mbur manja lesle, a ɓi nga na, i ɓi ngi gilaway, yo misi a mevele, i wuluk ngi malambaˀ. A gi gwat ngi misi moˀorehey, a ɓi ɓi ngi za Bumbulvuŋ. A pula mbur may majaŋ na, kwacay njoŋ, yo a ngum vula gwat ngi si da mbur misi ar madalyama ta.

⁷Mbur magi gilaw da mizli, gwat ngi gi naŋ i mungra madiɗaŋ. Hirak ti misi murgahay mira slufaka ɓi taŋ na, a ɗiyi ɓi ɗiyeˀ ɗiyeˀ, a ja taŋ ɓi gbiŋ gbiŋ lambaˀ ngi ziza mizli migeˀ ircece tayna.

⁸Amma mbur mavul ti gula ti hazumo, naŋ ti wuluk mupuɗaw, yo a gi nga naŋ i gwat mupuɗaway.

⁹Ngwas manja lesley, cinaka mingiɓi ɗu! Ziri mongoso manja wulukoy, jikam slimiɗ vur ɓi ya mawuɗ i ɓa na.

¹⁰Vi pal nga mbuŋ aka na, kum manja wulukoyo, kisa ɓurgam njam njam, asi mike na, ngila gudubun a sa kiɗ mi, dar gwat ngi sifi a sa kiɗ mi.

¹¹Kum ngwas manja lesley, jijikam kirkir, kum manja wulukoy, wusam jaɓ jaɓa. Cukoko zanahay avra, ndiram gulndiŋ gulndiŋ, juwam zanahay wak wak a virzi.

¹²Niˀicam haŋ sek a hirnga, vur guva mezlehey ati gudubun misi yi locok locok na.

¹³Tuwam vur hirwuy ngi mizli ɗuwoy, sisim masirta na, yo vur hayay mamumulom gar, misi ar walahay magi muguzlum na.

¹⁴Hay ngi buyo, i mupula le fuk, walahay magi mi wuwwo, a ndir le ɗoɗok. Slala Ofel ati mohol ngi jiɗa li, a sa tiram butumoy ngi wãˀ, ɓa zungu ngi ɓuhoy a zluzluɓam ara, waɗ gineweye,

¹⁵hã Buymisemuŋ a slino ndra ˀUf naŋ ti muŋ. Dar li papala mikirɗak kirɗaka, a sa tiri i li misi widis ngi zumoy, yo li misi widis ngi zumoyo jak na, a sa tiri li misi widis ho gar ngiriɗ.

¹⁶Ɓimujuwa mitaˀgara, a sa ndir a wuzlaɓuh, yo ɓi mijeŋŋe a sa gi ar li misi widis ngi zumoy.

¹⁷Migir ngi ɓi mijeŋŋe, i cifi zuy zuy: ɓi mijeŋŋe a sa bo ti cifi misetete waɗ li pula vu.

¹⁸Mizli ɗuwoy a sa cifam zuy zuy ar li misi ko gwat a ga taŋ ta, ar li misetete ngi musuka vu.

¹⁹Amma widis mingiriɗe, yam a sa mbuzlo taŋ nga ruwuy, yo walahay a sa wuh kuɓac kuɓac cay.

²⁰Kumo kisa mumulom: ar li misi yam gar, kisa zligaka gwata, kisa pulaka sla ati zungu kumoyo manja masapata.