Read South Giziga ISA 33 Bible Online

ISA 33 - South Giziga bible

ISA 33

¹Ka mbur mihiriya li, manja a hiriyukuw, ka mavul mizli ngi ji, manja a jukuw na, kay! Ka ar bonoy. Ka misa pula hiriya li le na, a sa hiriyukuw ka ya, ka misa pula vula mizli le ngi ji na, a sa jukuw ka ya.

²Aw Bumbulvuŋ, pura ndra ircece. Ndr'i ra njaham hiri asi ka. Anja ki vula ndra gidaŋ vur miprik gar, yo anja ki laha ndra ar hin ngi bonoyo.

³Da mizli a cinaka ˀay ɗik misi ka vuŋ mandisle le na, a kilam, da ka mislikiɗ le na, sukwi ngi mizli a waham ngbuw.

⁴A kusoko gwat ngir vurumo, kaɓa makusumom yuku, a wusam vu ng'ara kaɓa jaray mawus vu.

⁵Bumbulvuŋ naŋ a hirnga gwatay gar, asi naŋ ar li miɗingir. A naha Zeruzaleme le ti ɓimujuwa mitaˀ gar waɗ ti gi jeŋŋe.

⁶Kum mizli ngi Buymisemuŋhoy, kisa cifam setette. Sinmijileŋ ati si na Buymisemuŋ, i kum milaham wãˀ na. Yo zluwun ti Bumbulvuŋ, zlili kum i nah.

⁷Puraka ɗi: mizli Ariyeley ara wudam a jiviɗ madiɗahay, mijiviɗ misi ɓi ngi zuyoyo, ara kuɗumaka tuwuy.

⁸Jiviɗey a roko daŋ daŋ, mizli anta ar li cuhu mata. Jumoˀay a kiɗ le, walahayay i mupulahay le, anta njaham hiri asi taŋ mata.

⁹Hirwuy ara tuwuy vagay, ara zizi. Muwã Libaŋ, a ro ti mesem, widis ngi raˀahay ara guvoˀom. Li micay ngi Saroŋ naŋ kaɓa li papala, Basaŋ ati Karmele, widisey anta mata.

¹⁰Bumbulvuŋ a ɓi: «Wurenna, i sa slikiɗi, wurenna, i sa cici deŋ ti deŋ, wurenna, i sa biga dudok ɗu.

¹¹Slra kum muɗuvaka ngi gi na, naŋ ka murbuc, da ki gaka le na, naŋ kaɓa giziŋ, musuwun ngi hutuŋ kumo, i vu mazumukum.

¹²Mizli mekelemeye, vu a sa zluma taŋ ka fucu. A sa tiram kaɓa hadaw munguma le, matiɓi vu.

¹³Kum mikileŋ kileŋhey, cinam ɓi ngi gwat ya maga! Kum migweˀ gweˀhey, sinaka gidaŋ ɗu.»

¹⁴Angi ruwuy Siyoŋ, migi mungrahay ara zluwunam, miziriɗa mihey ara jijikam. A ɓam: «I vu mazum li, masa cici zlak asi ndra gu i waka? I vu minjulili, masa cici zlak asi ndra gu i waka?

¹⁵Sey i mbur magi gwat mijeŋŋe, maguno ɓi ti gun ta, mawuɗ gwat mitiɓa ti gidaŋ ta, mangum a hiɗikakaŋ ngi gi gwata ti dala ta, madisla slimiɗe, ɓa mi ngi kiɗa hirnga na, a cine ta, a tiɗa hiri, ɓa a pura gwat malambaˀa ta.

¹⁶Mbur nah, a sa sifi ar li miɗigaray, wala muwã, i li ɗum naŋ, a sa vulakaŋ gwat ngi zumo, yam anta sa kicaŋ ta.»

¹⁷Ki sa pura mezle ngi buyo ti hiri ɗiki, kisa pura hirwuyo kurzluˀ gar.

¹⁸Ki sa wulkam ar gwat magukum zluwun zleˀe, joˀ kisa ɓam: «Mitiɓi laadahaya t'amaka? musluf naŋhaya t'amaka? Buy ɓi ngi walahay muguno ti moholoy tuwa, t'amaka?»

¹⁹Mizli muhuhumo vuhoy, mizli misi mi ngi irne taŋ a zli ta, miɓi mi motropohoy, yo misi mingiɓi taŋ a sli wala ta na, kum anta sa puram mata.

²⁰Singilaka Siyoŋ, walahay ndra ngi muguzlumoy, Zeruzalem, walahay misetette, kisa puraka ti hiri kum, i guɗuk masa puwaka mata. Anta sa muɗaka ɓamtal naŋhaya mata ndiɗaˀ, anta sa puskaka zeweɗ naŋhaya mata.

²¹Bumbulvuŋ masa biga ndra kuy naŋ na a diga. I li misi mizaw madiɗa, mizaw mifirndiwey macam ng'ar mubuliy, amma ko palalam pa makukuroko ti dum a cuh ti raˀa ta, palalam madiɗahay anta sa tuwuɗaka ta.

²²Haˀaw, Bumbulvuŋ i migi kiita ndra, maɗuva ndra ɓihey i naŋ. Bumbulvuŋ i buy ndra madiɗaŋ, milih ndra i naŋ.

²³Zeweɗ mujuwam taŋ mesenehey a kuslurom le, anta ja ɓamtal ngi palalama mata, anta njiraka gabaga ngi hirnga palalama mata. Dar a sa wunkaka gwat mitiɓa ar vurumo ndit nditi, ko jegwerey kwana, a sa hilam gwat ngi vurumo ti haŋ taŋ ya.

²⁴Ko mbur Zeruzalem masa ɓi: «Ya gu ta» na, anta mata. Mungra ngi mizli ngi digahaya, a sa puy avra.