Read South Giziga ISA 34 Bible Online

ISA 34 - South Giziga bible

ISA 34

¹Sukwi ngi mizli kirohoko ɓa ki cinam, mizli, jikam slimiɗe. Anja ruwuy ati gwat ngi raˀahay gar a cinam, anja duniya ati gwatay magilam ara gar a cinaka.

²Mevel ngi Bumbulvuŋ a ro fõh fõh ng'ar sukwihey gar, a zuɓ himaˀ le ar sojeheye cek. A wuɗ a ngizla taŋ pay, a kiɗa taŋ sunok sunok.

³A sa hizigaka mumucahaya saɓaɓa, vagay taŋ a sa zĩˀĩ tititi, yo pumbus a sa ɓul vil vil a muwãhaya.

⁴Wurzlaŋ ngi muŋhoy a sa waham, muŋ a sa fuɗ faɗ faɗ ar leˀe, dar wurzlaŋhay a diɗoko kaɓa kalaf ngi gudubun malla ngi uruf mapi.

⁵A muŋ a diga, maslalam ngi Bumbulvuŋ a ro pumbus pal naŋ. Ani ara kiɗ di mizli Edomoy, waɗ mizli naŋ mawuɗ ngizl taŋ tuwa.

⁶Maslalam ngi Bumbulvuŋ a ro pumbus cih cih, mal ngiˀ ngiˀ. A ro cih kaɓa ti pumbus ngi ziri tumuŋ ati ngi bazuwayay. A ro ngiˀ ngiˀ kaɓa ti mal ngi ɗugur duba ngi zlengerekey. Asi mike na, Bumbulvuŋ a gi mikuli madiɗa le a Bosra, a ngizl mizli le haɗa a Edomo.

⁷A sa kiɗ sla ɓuhoyo ma, a kiɗ gusoŋati pilisey, hã ruwuy a wi ti pumbuso, yo hã murɓuk a mbi ti mala.

⁸Avi Bumbulvuŋ, i hin ngi pula cuwal, i vi ngi slufa zluɓ ngi mizli Siyoŋhoy.

⁹Yam miciɗak ciɗak a Edomo, a sa tiri hindrik ka gudroŋ, yo mereɓ kwana, a sa tiri kaɓa baruɗu. Hirway Edom a sa tiri kaɓa gudroŋ mawur vu.

¹⁰Duvuɗ ati papas gar, anta muc pam le ta. Cunju naŋ a sa ngis mbak le ta. A sa ndir diŋ ngi set, ko anta sa cohom ti raˀa mata.

¹¹A sa ndir i li ngi biizim ati cemcemehey, kurek ati magakgakay a sa cifam ara. Bumbulvuŋ a sa juwa ti zeweɗ ngi ngizla vu, a sa siɗila siɗil siɗil kirɗak.

¹²Mizli micawwahay anta sa zilam slimiɗ ngi buy mata, buyoy gar a sa susuymom.

¹³Walahay naŋhay muguno ti moholo, sisim a sa pus ara, ar hay migidaŋhaya, i titif ati hadaway masa pusoko. A sa tiri i li hin ngi sunɗuhoy, li ngi maduulihey.

¹⁴Magama ngi ɓuh a sa zliram ati lungum a diga, li zlir ngi bazuwayay a diga. Maliyam mongoso a sa cifi a diga ya, a sa musuk vu a diga.

¹⁵Kaway a sa ɗiyam hay taŋhay a diga, a pam tesley, a jiginaka taŋ, yo a sa ɗumoko taŋ hã a jam. Mogodokoy a sa kusom a diga ma, mogodok gar ti cil naŋ.

¹⁶Da ki wunaka ɗerewol ngi Bumbulvuŋ le na, kisa lumaka a tohoko ani: «Ko mbur pal asi taŋ masa ndir a dirba anta, ko mbur masa gi weleleˀ ti cil naŋ anta, asi i Bumbulvuŋ miɓa ɓi naŋ ɗaˀ ti balam naŋ, i ˀUf naŋ mukuso taŋ.

¹⁷Naŋ vuna a gi ceregezleŋ ngi vula taŋ li da mbur gar. A sa tiri inga taŋ ngi wãˀ a sa pam ara ngi samadin.»