Read South Giziga ISA 35 Bible Online

ISA 35 - South Giziga bible

ISA 35

¹Anja li papala ati li muˀulo a mumulom, anja li mikirɗak kirɗaka a zluzluɓu yo a hil mufuyuku.

²Anja a pus giziŋ, anja a jiɗ mececẽleŋ, a ɓuruk yo a ji salalay. Buymisemuŋ a vulaŋ dudok ngi muwã Libaŋ le da naŋ, Muwã Karmel mimezle ati li micay ngi Saroŋ na, a vulaŋ di le ma. Dar mizli a sa puraka dudok ngi Bumbulvuŋ, ati mezle ngi Buymisemuŋ ndra.

³Hirbazla migirahay na, vulaka taŋ gidaŋ, poprok muguluɓ guluɓoyo gaka taŋ solok.

⁴Mizli mira maka gidaŋ taŋhaya nga ruwuy na, ɓaka taŋ: «Ndiram gidaŋ gidaŋ, ki zluwunam ta, Buymisemuŋ kumo n'ani. A ra so ngi pulukum cuwal. A so ti haŋ naŋ ngi lih kum.»

⁵Dar hiri ngi dangaray a sa puram kweŋ kweŋ yo slimiɗ ngi midigizlahay a sa wunam.

⁶Mizli jegwerey a sa jiɗam kaɓa muuni, musluwa mihey a sa jam salalay. Ar li mikirɗak kirɗaka, yam a sa bo col col, ar li papala, mekepel a sa zuɓ.

⁷Li muyuŋ a sa tiri mubuliy madiɗa, li manja yam a sa tiri miviɗi viɗi ngi yam. Li, sunɗuhoy mahinam ara, a sa pus lavaɗ ati lelewey.

⁸Ar li nana, a sa kam jiviɗi, a sa zilaka ‹jiviɗ mubaˀ pal›. Mbur misi dili anta sa ru ti raˀa ta asi i Bumbulvuŋ vuna ti haŋ naŋ masa ka mbuŋ, mizli manja lesley anta sa zizoko hirnga ng'ara ta.

⁹Ar jiviɗ nana, mobor anta, gwat miŋsah mi miji vuhoy anta ram ti raˀa ta, ko anta sa lumam loŋ ta. Mizli ngi Bumbulvuŋhoy a sa zuɓam di i jiviɗ nah na so.

¹⁰Mizli Bumbulvuŋ milaha taŋ le na, a sa moko ti ra, a sa ram sesẽŋ a Siyoŋ bal ti ji salalay. A mihiri taŋ i cira hiri makiɗ mi ta. A sa zluzluɓam, a ciram hiri, lik ati niˀic a sa kilam kileŋ avu taŋ.