Read South Giziga ISA 36 Bible Online

ISA 36 - South Giziga bible

ISA 36

¹Ar vi mukuruˀ nga mufaɗ naŋ ngi Ezekiyas mazum buy na, Senakerip, buy madiɗa ngi Asiri a sawa, walahay ngi Zudahay muguno ti moholo gar na, a zla taŋ ngi kiɗa vu, a tiɓa taŋ.

²Buy Asiri a slino mbur soje naŋ micawwa ti Lakise nga Zeruzalem, ng'avu buy Ezekiyasa. Soje micawwa ngi buy Asiri vuna, naŋ ɓaˀ a mbuŋ sojehey haɗa. A cici deŋ a mi baray ngi futuŋ vay muŋ, ar jiviɗ maru ng'ar guva ngi mubuna zanahay.

³Eliyakim, mangal ngi Hilkiya, i madiɗa ngi hay buy, Sepna i mutoho gwat waɗ Yoha, mangal ngi Asaf, macici a mbuŋ buyo, a soko ng'avu mislin ngi buy Asiri tuwa.

⁴Soje micawwa ngi buy Asiri tuwa, a ɓa taŋ: «Buy madiɗa ngi Asiri a ɓuw na: ‹Ki pula mevel ɗike taˀ ar mike?›

⁵Ki ɓi na: ‹Anja i lum mingiɓi neˀ ɓa ngi luuma kuti ati gidaŋ ngi gi vurumo.› Na ki njih hiri ar mi ɓa hã ki slikiɗ ɓi avu ya na ka?

⁶Ani ki vula mevel ɗike le da Ezipte, lavaɗ mingila le nah. Na ko wa gar miginisl di le na, a ci yik, a slinaŋ haŋ gor njoŋ. Buy madiɗa ngi Ezipte, naŋ kanah avu mbur muvulaŋ mevele le gar.

⁷I si na le kisa ɓiy: ‹I vulaka mevel ngi ndra le da Bumbulvuŋ Buymisemuŋ ndra.› Amma li miɗingir ɗingir naŋhay ati li ngi gi mikuli naŋhaya, mususuyumo taŋ, joˀ ki tika ˀay da mizli Zudahay ati Zeruzalemeye, ɓa a hurkom sey a mbuŋ li ngi gi mikuli ngi Zeruzalem na, i ka Ezekiyas vuna tawa?

⁸Inga wam mi ati kumani ɗu, Buy Asiri na so! Da ki lum misi piliseye gu na, i sa vuluw pilisey durmuk durmuk cuw.

⁹Gawla pal, meciɗek miwãˀ ngi buy ɗu, ki ɓula gu ta mana, joˀ ki njih hiri ar Ezipte, ɓa ngi luuma mota ngi vurum ati mizli ngir naŋhay na, mbri jak maka?

¹⁰Na zle, ya mara ngizla walahay hana na, manja Bumbulvuŋ a ngum kwa? Miɓiy: ara zliram dibiɗ ati walahay hana, ngizla kap na, i Bumbulvuŋ vuna.»

¹¹Eliyakim, Sepna ati Yoha, a ɓaka soje micawwa ngi buy Asiri: «Ambuh, inga ɓa gawla ɗikeye ti mi A ram takwa, asi ndr'i sinaka mi nah na le. Amma anja ki ɓa ndra ti mi Hebere ta, asi mizli misi ar moholoy na gar, ara jikoko slimiɗe.»

¹²Soje micawwa ngi buy Asiri a mbiɗaŋ di: «Buy ɗu a slino ya ti ɓi hana da buy ɗik ati ka tew kwa? A slino ya ng'avi mizli misi ar moholoy vuna ta walkwa? Na zle a sa zumam zay taŋ, yo a sa sam kwanay taŋ ka kum vuna ya kwa?»

¹³Soje micawwa ngi buy Asiri, a cici deŋ, dar a ɓi ti gidaŋ ti mi Hebere: «Cinam mingiɓi ngi buy Madiɗa ngi Asiri ani.

¹⁴Buy a ɓukum na: ‹Anja Ezekiyas a tukunukum ta, naŋ anta luhukum gu ta.

¹⁵Naŋ a ɓukum ɓa ki vulaka mevel kumo da Bumbulvuŋ masa luhukum. A ɓukum mana: ‹Bumbulvuŋ a sa luhukum gisiŋ, walahay hana, anta sa diɗ asi haŋ ngi buy Asiri ta.

¹⁶Ki cinaka mi da Ezekiyasa ta, asi buy Asiri a ɓi na: jam ngama ti ya, vulaka vu kumo da ya, ɓa mbur gar a sa zum yi ngi gudubun nga naŋ, ngi uruf nga naŋ, waɗ a sa si yam ngir futuŋ naŋ.

¹⁷Ɓa hã i sa ra hulukum nga hirwuy misi kaɓa ngi kum vuna, i hirwuy misi alkamari ati gudubun haɗa, yo ɗaf ati mbaazla a diga haɗa ma.

¹⁸Ɓa Ezekiyas a tukunukum: Bumbulvuŋ a sa laha ndra na, anja a tukunukum kanah ta. Kuli ngi sukwi mekelemeye, a tikikiy le ngi ja haŋ avu ruwuy taŋhaya kwa?

¹⁹Kuli ngi Hamat ati ngi Arpata t'amaka? Kuli ngi Sefarvayime t'amaka? A lahaka hirwuy Samari le tisi haŋ ɗu kwa?

²⁰A wuzla kulihey na, milaha hirwuy naŋ tisi haŋ ɗu ada kwa? Na Bumbulvuŋ a sa laha Zeruzaleme tisi haŋ ɗu mbri mbrike?›»

²¹Mizli a taˀaka mi siriw, ko a mbiɗakaŋ mi pal ta. Asi buy Ezekiyas a ɓa taŋ zleˀe kanah: ‹Ko ki mbiɗakaŋ mi pal ta.›

²²Dar Eliyakim, mangal ngi Hilkiya, madiɗa ngi hay buy, Sepna mutoho gwat waɗ Yoha mangal ngi Asaf, mbur macici a mbuŋ buyo, a moko ng'avi Ezekiyasa, zana yaraɓ yaraɓ, a mbiɗakaŋ mingiɓi ngi soje micawwa ngi buy Asiri tuwa.