Read South Giziga ISA 37 Bible Online

ISA 37 - South Giziga bible

ISA 37

¹Buy Ezekiyas micina mingiɓi nah cin cin na, a ngira zana naŋ ngi vu vuhoyo, a ki zana ngi vagay, aru ng'ar hay ngi Bumbulvuŋ.

²A dirba nah, a slina Eliyakim, mbur madiɗa ngi hay naŋ ati Sepna, mbur mutoho gwat waɗ masay magala hay ng'avu mijiviɗ Ezay, mangal ngi Amos. Taŋ gar ti zana ngi vagayay ɓaˀ ɓaˀ avu vu,

³ɓa ara ɓaka Ezayi na: «Ezekiyas a ɓuw na: Hin misi dana, i hin ngi ndurɓo hiri, hin ngi kuti ti bonoy, yo i hin ngi pi mesem ma. Mangala, a ɗuvo hirnga le ngi bawa, amma mumuŋ, gidaŋ naŋ ɓa ngi niˀico di anta.

⁴Soje micawwa ngi buy Asiri, buy naŋ vuna a slino di, ɓa a za Buymisemuŋ misi ti siifa. Asinta, Bumbulvuŋ, Buymisemuŋ ɗike, a cine mingiɓi naŋhay na le gar, yo a sa kutaŋ ti bonoy aseˀe kwani? Anja ka mijiviɗe, ki tumbulo Buymisemuŋ asi mizli mindiram ar siifa neˀ na so.»

⁵Dar gawla ngi buy Ezekiyasaya, a ndilam avu Ezayi so.

⁶Akẽh na, Ezayi kwana a ɓa taŋ: «A ram, ara ɓaka buy kumo: Bumbulvuŋ a ɓuw na: ‹Mingiɓi ka micina, gawla ngi buy Asirihey mizikiy ti naŋ na, anja a guw zluwun ta.

⁷Buy Asiri a sa cin labara: a sa mi nga hirwuy naŋ. Yo i sa ga ɓa a kiɗaka vagay ti maslalam angi hirwuy naŋ tehhe a muŋ.›»

⁸Soje micawwa ngi buy Asiri tuwa, a cine na, buy naŋ, aru le baɗ ti Lakise nga kiɗa vu ati walahay Lipna. Joˀ aru nga lumaŋ a diga so.

⁹Buy Asiri tuwa, a cine na, Tiraka, mbur Etiyopi, i buy madiɗa ngi Ezipte, ara supo buy Asiri, ɓa a zlaŋ ngi kiɗa vu na, buy Asiri a slin mizli ng'avu Ezekiyas, a ɓa taŋ:

¹⁰«A ra ɓaka Ezekiyas, buy Zuda na: ‹Zeruzalem anta sa so asi haŋ ɗu buy Asiri ta› kini na, ki ɓi kana ta. Buymisemuŋ ɗik, ka manjih hiri aseˀe haɗa fineˀ gidaŋ le tuwa na, anja a guw gilaw ngi ɓi kahana ta.

¹¹Gwat, buy Asirihey migaka da hirwuyoy gar na, ki si na le takwa? A ngizlaka taŋ le, ko a pulam pal le ta. Ka ki wa na, kisa lih sukwani?

¹²Mizli ngi si ruwuy Gozaŋ ati ngi Haraŋ waɗ ngi Resefeye, dideˀ ɗu mudumbuŋhoy a ngizlaka taŋ le, waɗ mizli ngi Telasaray, walahay hirnga ngi dideˀ ngi Edenheye. Kuli ngi sukwi ngi mizli ngi si ruwuy tayna vuna, a lahaka taŋ le sukwani?

¹³Buy ngi Hamat, buy ngi Arpat, ngi Layir ati ngi Sefarvayim, waɗ buy ngi Hena ati ngi Ava, t'amaka?»

¹⁴Ezekiyas a tiɓa letir tuwa tivi haŋ mislineye, a slufaŋ. A dirba nah, a jiɗ di ng'ar hay ngi Bumbulvuŋ. A puska letire a mbuŋ Bumbulvuŋ.

¹⁵Joˀ a dir dibiɗ a mbuŋ Bumbulvuŋ, a ɓi:

¹⁶«Bumbulvuŋ misi gidaŋ wãˀ, Buymisemuŋ ngi Israyel, ka mua duba Kerubeŋhey, angi zumabuy ngir duniya gar na, Buymisemuŋ i ka pal ɗik tewle. Asi miga muŋ ati hirwuy i kaha.

¹⁷Bumbulvuŋ ɗu, jiko slimiɗ, cin. Bumbulvuŋ ɗu, wuna hiri ɓa ki pur. Cina mingiɓi ngi Senakerip mislino di nga zuw ka Buymisemuŋ misi ti siifa na.

¹⁸Haˀaw Bumbulvuŋ, i sinaka le, buy Asirihey a ngizlaka sukwi ngi mizli le jom ati hirwuy taŋhaya gisiŋ gwaɗ naŋ.

¹⁹A zlizliraka kuli taŋhaya le ar vu. Na zle, kuli tayna vuna i ka Buymisemuŋ zleˀe ta si. I gwatay mizli miɗiyaka taŋ ti ɗiyi, i dumoy ati ɗuguroy. Dar buy Asirihey mizlizliraka taŋ ar vu.

²⁰Na ka, Bumbulvuŋ Buymisemuŋ ndra, laha ndra tisi haŋ ngi buy Senakerip na takwa. Kanah na, mizli mazumam buy ar duniya gar na, a sa sinaka, ka Bumbulvuŋ, Buymisemuŋ i ka pal ɗiki.»

²¹Ezayi mangal ngi Amoto, a slin mizli ng'avu Ezekiyasa, ɓa ara ɓakaŋ na: «Bumbulvuŋ, Buymisemuŋ ngi Israyel a ɓi na: ‹Ka midir dibiɗ vur Senakerip, buy Asiri na, i cine le.›

²²Cina mingiɓi ɗu ya Bumbulvuŋ maɓa vur Senakerip ani: Hirwuy Siyoŋ zuŋ diili mungbuˀo kine na, ara hirsuw, ara singir ar ka, Zeruzalem zuŋ diili na, ara hizigiɗ hirnga ti dirba ɗike.

²³Ka mizi na i waka? Ka miɓi ɓi malambaˀ na, ar waka? Ka mubuc na, i waka? Yo ka mupur hiris le na, i waka? I ya Bumbulvuŋ mipal kine ngi Israyel na takwa?

²⁴Ki ɓa mislin ɗikeye, ɓa a zikiy ya Bumbulvuŋ, joˀ ki ɓi na: Ya ti mota ngi vurumoy mbeˀmbeˀe, ya hã a hirnga muwã, a wuzlaɓuh misindik ngi Libaŋ, ɓa ngi nguma dum mimezle ngi miter naŋhay, ati dum ngi migidaŋ mimezle musubur naŋhaya, yo ya sesẽŋ ar naŋ mikiɗ mi ndok wãˀ, sesẽŋ ar widis naŋ mingiriɗ wãˀ na.

²⁵Yi li vigiɗ ngi yamay le, yo yi si yam nah le. Zlazlar ngi mizaw Ezipteheye, i hisika taŋ le kããk asi sar ɗu!›

²⁶I toho ɓi nah a kwacay ɗu, zleˀ nga dana ta, mukicuwa taŋ diga zlezle ɓa a gam i ya na, ki si na takwa Senakerip? Wurenna, yi ra kiɗa mi taŋ muduba. Walahay muguno le gun gun ti moholoyo, masa waha taŋ ɓa a tiram ɗugur zikitiŋ zikitiŋ i ka.

²⁷Mizli ngi digahaya, i mikekewel haŋhay, a zluwunam kirkir, yo a pam mesem. Taŋ kaɓa giziŋ ar guvahay, kaɓa giziŋ musulup sulup, kaɓa kalaf magil a hirnga gbale, waɗ a ɓuh, mabi kufuyoh manja a gi.

²⁸Da ka mira cifi, ka mira bi, da ka mira ci ngi hay, yo da ka mira slikiɗ himaˀ fõh fõh ar ya gar na, i si na le.

²⁹Asi ka mislikiɗ himaˀ fõh fõh ng'ar ya, yo ya micina huhumo vu ɗik na cin cin na, yi sa cuw ɓiri avu hutuŋ, waɗ lejeŋ kulaˀ a mi, joˀ yi sa mi ti ka ngi hay ɗike, tir jiviɗ ka muso zleˀe ti raˀa na a muŋ.

³⁰Ezekiyas, gwat mabigi gwat masa gi na, n'ani: Tumbulumna, mizli a sa zumam alkamari, hiri naŋ mupuso pal naŋ. Didirba kwana, kanah ma. Amma vi mimakir naŋ so na, kisa zligam, kisa gam sifi ngi gwataya, yo kisa huvam gudubuno, joˀ kisa zumam yi naŋ.

³¹Mizli mindiram ti siifa ar sukwi ngi Zuda, mupulahay na, a sa diram dimbasl gidaŋ gidaŋ a muŋ, yo a sa yam ngweɗeŋ ngweɗeŋ a muŋ.

³²Asi mizli is ngi mizli a sa boko ti Zeruzaleme, yo mizli a sa ndiram ti siifahay, a muwã Siyoŋ. Masa ga kanah gar na, i wirwir ngi Bumbulvuŋ misi gidaŋ wãˀ.»

³³Vurˀe, Bumbulvuŋ a ɓi vur buy Asiri ani: «N'anta sa ci ng'ar walahay hana ta, naŋ anta sa lih luvut ng'ara ta, naŋ anta sa ci ti mbaraya, nga zlir dibiɗ ati naŋ ta, yo naŋ anta sa zih muyuŋ zit a ciki moholo, ɓa a jiɗ ti raˀa ta.»

³⁴Jiviɗ naŋ muzuɓa na, a sa mi ti raˀa a muŋ, naŋ anta sa ci kulaˀ le ng'ar walahay hana ta. I ya Bumbulvuŋ maɓi.

³⁵I sa cik vu ar walahay hana, i sa lahaŋ, mbele ya Bumbulvuŋ, yo mbele teŋteŋ ngi gawla ɗu Daviti.

³⁶Modro ngi Bumbulvuŋ a ci ng'ar walahay guɗuk ngi soje Asiriheye, a kiɗ mizli durmuk skat ti kukur dangafaɗ nga zlum. Ngi miprike, mizli mindiramay a slikiɗam, keɗ na, vagay ngi mizli mumucahay tuwa saɓaɓaɓa.

³⁷Senakerip, buy Asiri a slikiɗa walahay guɗuk naŋ, a mi nga Niniv, a cifi a diga.

³⁸Ngi pas numuŋ ada na, Senakerip ara dir dibiɗ ar hay ngi kuli naŋ Nisrok. Akẽh na, ziri naŋ mizilehey cuw, Adramalek ati Sareser, a kiɗaka vagay ti maslalam, a kilam nga hirwuy Ararat. Dar Asarhadoŋ mangal naŋ, a zuɓa li naŋ.