Read South Giziga ISA 38 Bible Online

ISA 38 - South Giziga bible

ISA 38

¹Angi hin tayna, Ezekiyas a ki jiji breˀ breˀ ngi mucu. Mijiviɗ Ezayi, mangal ngi Amot, a so lumaŋ, a ɓaŋ: «Bumbulvuŋ a ɓi na: Ɓi ɓi ɗaˀ le da mizli ngi hay ɗikeye, asi kisa mucu, k'anta sa slikiɗ tir jiji ɗik na ta!»

²Ar nah na, Ezekiyas a mbiɗa hiri pulaˀ ng'avi dalam, dar a tumbulo Bumbulvuŋ, a ɓaŋ:

³«Aw Bumbulvuŋ ɗu, ya micifi a mbuŋ ɗik na, ti jiviɗ naŋ kaslsla, ti mevel mezle, yo yi gi di i gwat macuruw hiri. Ambuh, wulka ŋkeŋ takwa!» Dar Ezekiyas a tuwuy kaɗam kaɗam.

⁴Bumbulvuŋ a ɓa Ezayi na:

⁵«Mi, ara ɓa Ezekiyasa: Bumbulvuŋ, Buymisemuŋ ngi dunuk Davite, a ɓuw na: ‹Yi cine diradibiɗ ɗike le, yo yi pura tuwuy mangalaw ɗike le. Hin ngi siifa ɗike, yi sa murɗuw di vi kuruˀ nga zlum nga mbuŋ ava.

⁶I sa lihuw ka ati walahay misenna tisi haŋ ngi buy Asiri. I sa jigina walahay hana.›»

⁷Pura ɗi, Bumbulvuŋ a buguw di gwat ani. Bumbulvuŋ a sa ga cummo. A ɓi na:

⁸Ar li jiɗ ngi hay Ahasa, susuɗuk a muruɗ le si, i sa mi di nga dirba sar taˀ taˀ kuruˀu.» Dar pas a jiɗ sar taˀ taˀ kuruˀ ng'ar li ngi susuɗuk mimi nga dirba sar taˀtaˀ kuruˀ tuwa.

⁹Hana i dimis ngi Ezekiyas buy Zuda, naŋ mizla a dirba naŋ mumbul.

¹⁰Yi ɓi zleˀe na: i zik le ar siifa kasl ti ya, mindir sey i cuh le. Vi ɗu mindir nga mbuŋ na, sey i ra kiɗa mi naŋ ar li ngi mizli mumucahay.

¹¹Yi ɓi na, y'anta sa pura Bumbulvuŋ a ruwuy ngi mizli misi siifahaya mata. A wuzla mizli ngisi ruwuy misi gwatay gar a sa kiɗam mi na, y'anta sa pur hiri ngi mbur titira blew mata.

¹²Siifa ɗu, a tiɓaka le avu ya, a kilam di le kileŋ, kaɓa guɗuk ngi mijigin. Yi fuɗa siifa ɗu le tay mi naŋ kaɓa miji caka mafuɗ gabaga, ani gugumay naŋhay a mburucam le. Buymisemuŋ, zle ti papas hã a ndila duvuɗ na, ɓi ɗik anta ati ya mata.

¹³Hã ti miprik na, i tiri gwat ngatara le. Buymisemuŋ a wihiy tesleye le ngurof ngurof kaɓa mobor mahumbuɗ gwat. Buymisemuŋ, zle ti papas hã a ndila duvuɗ na, naɓa ɓi ɗik anta ati ya mata.

¹⁴Tuwuy ɗu a tiri le kaɓa mezlezleŋ pilis malla ngi magakgaka, yo i niˀic kaɓa tuwuy ngi goonoko. Y'anta zuɓa hiri ng'avi ka gu mata. Aw Bumbulvuŋ ɗu, i gir le kupuyah wãˀ, jiniˀis asi ya.

¹⁵Maga gwata i Buymisemuŋ, ani i sa ɓaŋ mbri ɓa a mbiɗiy di naka? Siifa ɗu mindire, i sa gi di jom ti bonoy ɗu so ta.

¹⁶Bumbulvuŋ, k'ada a ciki mizli ɗikeye, taŋ a sa ndiram ti siifa, yo ˀUf ɗik a sa vula taŋ gidaŋ gar. Ki sa ɗiyiy ya ya, waɗ kisa vuliy siifa.

¹⁷Bonoy ɗu tuwa, a tiri wuya le. Asi ki so le gumbaˀ avu ya ɓa yi muc ta, yo ki hiziga mungra ɗuwoyo le gar nga dirba ɗiki.

¹⁸Asi ar li ngi mizli mumucahaya, mbur mahunumuw gu anta ko loŋ ta, muco, anta guw muguzlumo gu ta. Mizli micam hirnga le ar vigiɗ si na, t'anta njaham hiri ar gi teŋteŋ ɗik na mata.

¹⁹Mahunumukuw i mizli misi ti siifahay tewle, kaɓa ya mahunumuw dana ani na. Yo cine ngi ziri, a sa dubuna gi teŋteŋ ɗike da ziri mizile naŋhay.

²⁰Bumbulvuŋ, ka milihiy na, ar zik ngi siifa ndra gar, i hurumoko gwat ngi dungur ndraˀahaya ar hay ngi ɗik ka Bumbulvuŋ.

²¹Akẽh na, Ezayi a ɓi: «Wuɗuko maɗaf ngi ˀuruf mutuso, sluruɓaka ngbaˀ ar hisl vuna, ɓa buy a mbul.»

²²Dar Ezekiyas a ɓi: «Gwat masa biga, i sa ci ng'ar hay ngi Bumbulvuŋ gu na, i gwat mike?»