Read South Giziga ISA 39 Bible Online

ISA 39 - South Giziga bible

ISA 39

¹Ti di nah na, buymadiɗa ngi Babiloŋ mazilaka Merodak-Baladaŋ, mangal ngi Baladaŋ, a slin ti letirey ati gwatay ngatara da Ezekiyasa, asi a cine na, Ezekiyasa naŋ gu ta zleˀe, ani a mbul le.

²Ezekiyas a cin ndum haɗa ti so ngi mislineye, a biga taŋ li wi vu ti zlili naŋhay gar, ɓiri bara ati ɓiri tapasl tapasl, urdihey ati mal mazãˀãm ndum haɗa. A biga taŋ li wi vu ti gwat ngi vurum naŋhay ati gwat ngi wi vu ti zlili naŋhay gar. Ɓa gwat a hay naŋ, yo angi zumabuy naŋ, mindir manja a biga taŋ di na, anta.

³Mijiviɗ Ezay a so luuma buy Ezekiyasa, a ɓaŋ na: «Mizli tayna a ɓukuw mbrike? A soko vuna ti damaka?» Ezekiyas a mbiɗaŋ di: «A soko ti Babiloŋ, hirwuy mikileŋ.»

⁴Ezay a ɓaŋ ma: «A puram mi a hay ɗike ka? Ezekiyas a mbiɗaŋ di: «A puraka gwat misi a hay ɗuwoyo le gar: zlili ɗu mindir manja yi biga taŋ di na, anta.»

⁵Ezay a ɓa Ezekiyasa: «Cina mingiɓi ngi Bumbulvuŋ misi Gidaŋ wãˀ ani:

⁶‹Hin ani a sa ndilawa, gwat misi a hay ɗik gar, yo gwat dideˀ ɗikey micikilaka taŋ gar na, a sa hilaka taŋ nga Babiloŋ. Bumbulvuŋ a ɓi, ko gwat masa ndir loŋ anta.

⁷A sa hilam a wuzla dideˀ ɗikey, ziri muboko ti kwacay ɗike haɗi, a sa ram taŋ nga diga. A sa nguɗoko taŋ a hay buy madiɗa ngi Babiloŋ.»

⁸Ezekiyas a mbiɗa da Ezaya: «Mingiɓi ngi Bumbulvuŋ ka miɓa na, i ɓi mezle.» Asi mike na, a ɓi a kwacay naŋ: «Angi siifa ɗu gar na, mizli a sa ndiram zuy zuy, a sa cifam setette takwa?»