Read South Giziga ISA 40 Bible Online

ISA 40 - South Giziga bible

ISA 40

¹Buymisemuŋ kumo a ɓi: «Tislaka mevel da mizli ɗuwoyo.

²Mizli Zeruzalemeye, ɓaka taŋ ɓi ngi si mevel taŋ, yo tilaka taŋ mi, ɓaka taŋ na: slra taŋ magaka mitakˀay le na, a kiɗ mi le, kuti taŋ ti bonoyo, anta mata, gwat malambaˀ taŋ miga taŋ na, Bumbulvuŋ a wurka taŋ di le makaw cuw.

³Mbur ara til mi: «Ɗiyaka jiviɗ da Bumbulvuŋ, a wuzlaɓuh, ciraka jiviɗ ngi cuh da Buymisemuŋ ndra, ar li mikirɗak kirɗaka.

⁴Li mukutik kutik ngir sozohoyo, anja ki dikaka taŋ, muwã ati li miɗingirey na, anja ki tiram taŋ sinarra, Li mujurzlolzohoyo, siɗilaka taŋ, li ɗigaraya, tiram taŋ sozo madiɗahay.

⁵Akẽh na, dudok ngi Bumbulvuŋ a sa bugo vu, dar mizli gar a sa sinaka muduba, i Bumbulvuŋ miɓa ti mi naŋ.»

⁶Mbur ara ɓi: «Til mi!» Numuŋ a ɓi: «I sa til mi ti ɓi mike?» «Til mi ani: ‹Mizli gar taŋ kaɓa giziŋ, yo taŋ anta zikam ta kaɓa mufuyuk a ɓuh.

⁷Da Bumbulvuŋ muˀufo himiɗ naŋ le fir na, giziŋ a muˀul, mufuyuk a diɗi. Haˀaw, mizli taŋ kaɓa giziŋ.

⁸Naŋ kanah, giziŋ a muˀul, mufuyuk a diɗi. Amma mingiɓi ngi Buymisemuŋ ndra a ndir ngi sete.›»

⁹Kum mizli Siyoŋhoy, mitilam mi ti ɓi mezlehey, jiɗam nga muwã madiɗa, tilam mi ˀay bok. Kum Zeruzalemey, mitilam mi ti ɓi mezlehey, zuɓaka ˀay a muŋ, ki zluwunam ta. Ɓaka walahay Zudahaya: «Buymisemuŋ kumo n'ani.

¹⁰Bumbulvuŋ Buymisemuŋ n'ani, ara sawa, i bugawla. A sa zuma buyo ti haŋ naŋ. A ra so jom ti lum naŋ a haŋ, waɗ migir naŋ ava ma.

¹¹Naŋ kaɓa mijigin maru ti ginewey ng'ar li zum, a ska haŋ sik na, a kuso taŋ arleˀe. A hila ziri tumuŋhoyo jup a didak, yo tumuŋ misi ziri asi taŋ na, aru taŋ ti sekvu.»

¹²Yam mitaˀ ngir mubuliye, miwa ɗaˀ ti hur haŋ naŋ i waka? Muŋ micaya, miwa ɗaˀ ti hur haŋ wuɗak i waka? Murɓuk ngi ruwuyo, miwa ɗaˀ ti sikiɗ i waka? Muwã ati li miɗingireye, miwa taŋ ti kilo ɗaˀ i waka?

¹³Misina wuluk ngi Bumbulvuŋ i waka? Yo muvulaŋ kuti ɗaˀ i waka?

¹⁴Buymisemuŋ a cufuɗ kuti ɗaˀ avu wa, ngi sla wala ngi gi gwata ka? Mubigaŋ sli kiita ɗaˀ i waka? Mudubunaŋ si na gi gwata ɗaˀ i kwa? Yo mudubunaŋ ɓi ngi lesle ɗaˀ i waka?

¹⁵Ani sukwi ngi mizli, taŋ avu Bumbulvuŋ kaɓa yam magico tes purla tir jugulguy. Taŋ kaɓa muyuŋ leŋ purla ar kilo. Pura maturaˀahaya, taŋ kifilew kifilew ava kaɓa murɓuku.

¹⁶Gwat misãmi ngi Libaŋhaya, a gam mikuli mizlam zlam geˀ da Bumbulvuŋ ta, yo widis ngi raˀahaya, a ɗiyam vu ɗiyeˀ ta.

¹⁷Sukwi ngi mizli gar, taŋ a mbuŋ naŋ ka gwat lambaˀ, t'anta puɗaw ta, i gwat ngatarahay lambaˀ.

¹⁸Ki wuɗam ki waka Buymisemuŋ ati waka? Gwat mubam vu ati naŋ neˀ ada kwa?

¹⁹Kuli kwa? Kuli i mbur mipi ɓiri mipa ti pi, mbur mupuyaŋ ɓiri tapasl tapasl kor kor, waɗ muluwaŋ ɓiri bara danjak.

²⁰Mbur misi murga mavula gwat kanah gu ta na, a sipi dum manja zum. A sipi mbur misina ciɗa dum, ɓa a ciɗaŋ kuli mideŋ gidaŋ gidaŋ.

²¹Ki sinaka zleˀe ta kwa? Ki cinam ɓi nah ɗaˀ ta kwa? A fukum ɓi naŋ zle avu zli virzi naŋ ɗaˀ ta kwa? Ki slaka wala ngi mbur muɗuva virzi ngi hirwuyo ta kwa?

²²Buymisemuŋ, li cifi naŋ a hirnga birngiŋ misi ka viŋ a hirnga hirwuy na. A puro mizli ti diga kaɓa yukoy. A njira muŋ njar kaɓa zana, a binjira muŋ binjar kaɓa guɗuk ɓa ngi cifi a seˀe.

²³A tiri ti buy ngir duniyahaya, ka gwat lambaˀhay, a gi ti migi kiita ngi si ruwuyoyo, ka gwat ngatarahay.

²⁴A zilaka taŋ ng'ar slra vuna ti zil aruŋ, a cifam ar slra taŋhay vuna t'aruŋ, a diram virzi a ruwuy t'aruŋ si! Amma Buymisemuŋ a furo himiɗ naŋ fur ng'ar taŋ sina, a muˀulom sok sok, dar misuwre a kil taŋ fir kaɓa haslaɓ.

²⁵Buymisemuŋ mipal a ɓi: «Ki sa wikiy ati waka? Misi rak rak ati ya i waka?»

²⁶Zuɓaka hiri nga muŋ kuy kuy, puram ɗi: miga gwat ngi muŋhoy vuna i waka? I mbur micinjaha taŋ kaɓa sojehey, yo mazila taŋ gar ti slimiɗ taŋ ti slimiɗ taŋ na. Naŋ gidaŋ haɗa, naŋ solok haɗa ma, ko pal mindir manja zil ti slimiɗ naŋ anta.

²⁷Israyel, dideˀ ngi Zakopoy, ki ɓam na: «Bumbulvuŋ anta si na gwat ngi gi ndra ta, yo naŋ anta cik vu asi ndra ɓa i gam gwat ngi gi zuy na ta», ki ɓam kahana vur mike?

²⁸Bumbulvuŋ, i Buymisemuŋ vur hin gar, i naŋ miga hirwuyo zlar wãˀ na, ki sinaka ta kwa? Ki cinaka ɓi nah ta kwa? N'anta hĩhĩy ta, naŋ anta gir ta. Ko mbur masla wala ngi si na jileŋ ngi lesl naŋ anta.

²⁹A vula gidaŋ da mbur hĩhĩy, a tiri wirwir ti mbur migir le kupuyah wãˀa.

³⁰Gawla ati diilihey a hĩhĩyam, a giram. Ko bugawlahay kwana, pas numuŋ a ndilam.

³¹Amma mizli manjaham hiri asi Bumbulvuŋ na, a lumam gidaŋ a muŋ, a jiɗam kaɓa kuromoy. A kilam, ko t'anta giram ta. A ram, ko t'anta hĩhĩyam ta.