Read South Giziga ISA 41 Bible Online

ISA 41 - South Giziga bible

ISA 41

¹Ya Buymisemuŋ i ɓi: «Kum mizli mikileŋ kileŋhey, taˀaka mi a mbuŋ ɗu. Anja mizli gar, a cicam zil zil, anja a kirohoko ɗagay so, ɓa a sa ɓama! Akum jom gar ndra, i ra zliram ar kiita.

²Tisi pas ngi miprik a diga, mislikiɗo mbur mijeŋŋe, ɓa a lum bugawla ar li naŋ mucuh le gar na, i waka? A gaŋ ɓa sukwi ngi mizli a hinam hirnga a mbuŋ naŋ, yo ɓa buy madiɗahay a luɓomˀay a mbuŋ naŋ. A ga ɓa maslalam taŋhay a tiram murɓuk, yo ɓa lek taŋhay, a tiram kaɓa giziŋ, burkataŋ makil di.

³Mbur nah, a ɓula mizli mekelemeye, a cuh waŋŋa, ko a ɗuva sar a ruwuyo taˀ le ta.

⁴Miga gwat tayna ɓa a gam vuna i waka? I mbur miga gwatay zle ar zlivirzi naŋ na. Ya Bumbulvuŋ, yi mbur mudumbuŋ, yo i sa ndir nga ya nga ya ati mizli ngi dirbahaya ma.

⁵Mizli mikileŋ kileŋhey mupuraka na, a zluwunam kir kir. Mizli ngisi gazlavay kuɗgulumo, ara jijikam, ara sipaka cirre, ara wusam haɓar haɓar.

⁶Mbur gar a jina cil naŋ, yo a ɓam ar wala taŋ: «Cici zil zil!»

⁷Mbur miciɗa gwata, a vula gidaŋ da mbur mipi ɓiri tapasl tapasl, mbur mingirzla ɓiri ti tele, a vula gidaŋ da mikiɗa kukutu, a ɓa mbur mujuɓo ɓiri: «Naŋ kuy!» Dar a cicaka kuli tuwa dar dar ti ponti ɓa a wus ta.

⁸Amma kum Israyel, gawla ɗuwoy, kum ziri ngi Zakopoy, ya muwunukum, kum dideˀ ngi ngama ɗu Abraham,

⁹kum, ya musupokum hã asi ruwuy mira kiɗo mi, kum, ya muzulokum zle ar li mikileŋ kileŋhey, kum, ya muɓukum: «Kum i gawla ɗuwoy, i wunukum le, i zliɗukum avra ta.»

¹⁰Ki zluwunam ta, asi y'ada avu kum, ki puram a ciki kumo ti zluwun ta, asi yi Buymisemuŋ kum. Yi tiri ti kum gboŋgboŋ, naŋ kanah, i ra jiniˀis asi kum. Gisiŋ, i ra jiniˀis asi kumo ti gidaŋ ɗu ngi luuma bugawla na.

¹¹Mizli gar mislikiɗoko ti himaˀ ng'ar kum na, a sa pam mesem, a sa mbam ti zi. Mizli mazliram ti kum ta na, a sa tiram gwat lambaˀhay, a ngizlam.

¹²Mizli makiɗam vu ati kum na, kisa sipaka taŋ, amma kum anta sa lumaka taŋ ta. Mizli magam vurum ti kum na, a sa tiram gwat ngatara lambaˀhay.

¹³Asi mike na, ya Bumbulvuŋ, yi Buymisemuŋ kum. Yi ra jukum kaw avu haŋ hazumo, yi ra ɓukum: «Ki zluwunam ta, i ra junukum.»

¹⁴Kum dideˀ ngi Zakopoy, mizli magam ti kum kaɓa mumuyuŋ na, ko ki zluwunam ta, Israyeley, mizli magam ti kum kaɓa mizli mumucahay na, i sa jiniˀis asi kum. Mimbiɗi hirnga kumo, i ya Buymisemuŋ Mipal ngi Israyel. I ya Bumbulvuŋ maɓi.

¹⁵Ani i sa gi ti kum kaɓa ɓiri ngi siɗila guva [4]. nawaya naŋ kine, misi sliŋ yoŋ yoŋ. Ki sa ngurfoko muwãhaya meɗmeɗe, li miɗingireye, kisa tiram taŋ kaɓa cekwesl.

¹⁶Ki kufaka taŋ, himiɗ a sa kil taŋ, musuure a sa zliɗa hirnga taŋ mber mber. Kumo na, kisa zluzluɓam vur Bumbulvuŋ, kisa ngilam wuy ti Buymisemuŋ Mipal ngi Israyele.

¹⁷Mizli muvusohoy ati migeˀ ircecehey, maram ti sipi yam, amma anta lumam ta, yo misi madalyam mingbaˀa taŋ irneˀ le na, ya Bumbulvuŋ, i sa zila taŋ mi, ya Buymisemuŋ ngi Israyele, y'anta sa pula taŋ zlaɗ ta.

¹⁸Ar li miɗangar ɗangaray, manja widisey na, i sa bo ti yam vil vil, li mikirɗak kirɗakaya, i sa tiri taŋ futuŋhoy, yo li papala, i sa tiri di menjeɓ.

¹⁹Ar li mikirɗak kirɗakaya, i sa ngi miterey, ngalalayay, giziŋ mandir tukuzo tukuzo, waɗ tutumburoy. Ar li manja yamaya, i sa ngi widis migidaŋ mimezle ati pin waɗ buwi jom arleˀe.

²⁰Ɓa mizli gar masa puraka na, a sa sinaka, a sa singilaka, a slaka wala naŋ, gwat nah gar na, i gidaŋ ngi Bumbulvuŋ miga, i Buymisemuŋ Mipal ngi Israyel miga.

²¹Kum kuli ngi sukwi mekelemey, ya Bumbulvuŋ, buy madiɗa ngi Zakopo, i ɓukum na, ɓaka ɓi ngi kiita kumo, yo bigaka sli kiita kumo.

²²Anja ki soko, ɓa ki ɓam ndra ɓi ngi gwat masa gi.

²³Ɓam ndra ɓi ngi gwatay masa gam tumbuŋ, ɓa i sa sinaka, kum i kuliheye. Soko, inga gam gwat mezle malla mendere neˀ ɗagay, ɓa ndra jom gar ndra, i sa puraka hiri ngal ngal.

²⁴Dambalaka, kum ani i gwat lambaˀhay, gwat ngi gi kum i ngataraŋ. Mbur muwunukum ɓa ki tiram kuliheye, naŋ vuna kwana, i mbur mupuɗaw ta ya.

²⁵I ɓo mbur le tir vay muŋ, ɓa a sawa, ani ara sawa. I ra zilo di ti slimiɗ naŋ tir vay si pas ngi miprike, ara cinaŋ. A ra kurpa miwi liheye kaɓa ndileɓ asi sar, kaɓa mbur mindira gwat makulup hohoy ti sar.

²⁶Mitila ndra mi ti ɓi hana zle ar zlivirzi naŋ, ɓa ndra i sinaka na, i waka? Miɓa ndra di daf le zleˀe, ɓa i ɓam: «A ga le jeŋŋe» na, i waka? Kay, ko mbur miɓa ndra ɓi nah anta, ko mbur miga ɓa i cinaka anta, yo ko mbur micina ɓi kum anta ma.

²⁷Ani ya, i ra ɓa ɓi naŋ da Siyoŋ daf dumbuŋ, i ra slin ti mijiviɗ da walahay Zeruzaleme.

²⁸I pura kuli tayna keɗ keɗ na: ko loŋ anta, a wuzla taŋ, ko mukuti vu loŋ anta. Da ko i cufuɗa taŋ le zleˀe kwana, t'anta mbiɗikiy di gu ta.

²⁹Taŋ gar taŋ na, i migi malambaˀ da mizli! Gwat ngi gi taŋ i ngatara. Taŋ minge mikaˀ kaˀ na, i himiɗey, yo taŋ njoŋ njoŋ ngatara.