Read South Giziga ISA 42 Bible Online

ISA 42 - South Giziga bible

ISA 42

¹Buymisemuŋ a ɓi na: «Gawla ɗu n'ani, i ro haŋ kaw ava. I ya muwuna ti haŋ ɗu, hiri ara ciriy ti naŋ, i ca ˀUf ɗu le ng'ar naŋ. A sa ga kiita da sukwi ngi mizli gar.

²N'anta sa widi lambaˀ ta, anta sa cinam ˀay naŋ ta. N'anta sa gi mi lambaˀ ar jiviɗ madiɗahay ta.

³Lavaɗ muguduɗoŋ na, naŋ anta sa ngila wãˀ ta, vu ngi lampe muro mbuˀ mbuˀ na, naŋ anta sa muca wãˀ ta. Amma a sa ga kiita ti jiviɗ mijeŋŋe.

⁴N'anta sa hĩhĩy ta, anta sa pula vu naŋ mbak a vus ta, sey da naŋ muɗuva ɓi mikaslsla le asi ruwuyo, yo mizli mikileŋ kileŋhey gar, a sa kutukoko ɓi ngi dubun naŋhaya.»

⁵Bumbulvuŋ, Buymisemuŋ, miga muŋ i naŋ, yo minjira bilirre, i naŋ, miga hirwuy ati gwat mikaˀ kaˀ ngi raˀahay gar i naŋ, muvula siifa da mizli ngi raˀahay i naŋ, yo muvula musuwun da gwatay malaˀam a ruwuy gar i naŋ.

⁶A ɓi na: «I ya Bumbulvuŋ muziluw ti jiviɗ mijeŋŋe, i ya mujuw kaw avu haŋ, i ya mucufuw baˀ pal, yo i cufuw hĩˀĩ ɓa ki jumoˀay ngi mizli, yo ɓa ki tiri li minjahha ngi sukwi ngi mizli.

⁷Ki sa wuna hiri ngi dangaray, kisa bo ti dangayay avra, mizli migicahay ar luvuŋ, kisa bo taŋ avra.»

⁸Bumbulvuŋ i ya, slimiɗ ɗu naŋ kanah, y'anta vula dudok ɗu da mbur mekelem ta, ko da kulihey kwana, hunum, mahunumikiy na, y'anta vula taŋ di ta.

⁹Ani gwat mudumbuŋhoy a gam le si, amma ya i ra til mi ti ɓi ngi gwat nawayahay ma. Ɓa a sa gam tikeˀe na, yi wuɗ ki cinaka cin le.

¹⁰Kum mizli ngi mi mubuliy ati gwat ngi raˀahay gar, kum mizli mikileŋ kileŋ ngir maturahay, zlam dimis nawaya ngi hunuma Bumbulvuŋ. Hunumakaŋ zle ar zli virzi ngi ruwuy.

¹¹Wuzla ɓuh misi mizli ara ati walahay ngi raˀahay, waɗ walahay meciɗek ngi Kedaraya, anja a zlam dimisi. Anja mizli ngir mandazlay muwãhaya, a zluzluɓam, anja mizli ngi hirnga muwãhaya, a jam salalay.

¹²Anja mizli a gaka dudok da Bumbulvuŋ, yo anja a tilam mi ti hunum naŋ ar maturaˀahaya.

¹³Bumbulvuŋ ara bawa kaɓa bugawla, a gaŋ kiɗ vu kiɗ vu, kaɓa mbur ngi vurum. A hiziga widi ngi vurum fuk, a buc, dar a lum bugawla ar mesene naŋhaya.

¹⁴Buymisemuŋ a ɓi: yi ro teˀ teˀ diga zlezle, y'anta ɓi ta, i ngum gi gwat ta. Amma wurenna, i ro niˀic, i ro hinpat hinpat, kaɓa ngwas mawuɗ a yi, yo ara guzuvurikiy cici ma.

¹⁵Muwãhay ati li miɗingireye, i sa slira taŋ avra, gwat tukuzo ngir taŋhay gar na, i sa ga taŋ a muˀulom. Mubuliyeye, i sa tiri taŋ maturahay, futuŋhoyo, i sa ga ɓa a hisikam.

¹⁶I sa ga ɓa dangaray a ram tir jiviɗ taŋ misinaka ta, ɓa a cohom tir jiviɗ misler sler taŋ misina ka ta Li luvuŋ ngi mbuŋ taŋ, i sa tiri di li minjahha, jiviɗ muguduɗoŋ guduɗoŋhoyo, i sa cica taŋ cir cir. Gwat ngi gi hanayna, i sa ga taŋ cummo, ko y'anta sa pula taŋ manja gi ta.

¹⁷Mizli mapulaka vu taŋ mbak mbak da kulihey, yo mizli maɓam vur ɓiri mipa ti piheye: «Gwat ngi huruk huruk ndra a mbuŋ taŋ, i kum!» na, puraka, i mupula taŋ le zlaɗ nga dirba, a pam mesem le gar taŋ.

¹⁸Kum midigizlahay, cinam! kum dangaray, wunaka hiri, puram!

¹⁹Mbur dangar i wa mbak gawla ɗu le na ka? Midigizla kaɓa mijiviɗ ɗu, ya mawuɗ i slina na, i wa maka? Dangar kaɓa mbur muzuy zuy i waka? Midigizla kaɓa gawla nga ya Bumbulvuŋ i waka?

²⁰Kum mizli Israyeley, ki puram gwatay le haɗa, amma ko ki jam neˀ le a hirnga ta, ki wunaka slimiɗe le, amma ko kum anta cinam ta.

²¹Bumbulvuŋ, hiri a ciraŋ le asi jeŋŋe naŋ na, ɓa a biga ɓimujuwa naŋ, i madiɗa, yo naŋ mezle.

²²Ani a tiɓaka zlili kumoyo le, a vaka gwat kumoyo le. A gucukum le kap kap ar vigiɗey, kum ɗum ɗum kaɓa ar hay ngi dangayay. Kum i muvulahay le ɓa a tiɓaka gwat kumoyo, ko mbur milih kum anta, kum i muvulahay le ɓa a nguzlukum kap, ko mbur miɓi: «Mikiy taŋ a muŋ!» na, anta.

²³A wuzla kumo, masa jika slimiɗ vur ɓi hanayna i waka? Masa ki slimiɗ ngi cine ɓi hanayna tumbuŋ i waka?

²⁴Muvula mizli ngi Zakopoy ɓa a ngizlaka taŋ na i waka? Muvula Israyeley, ɓa a hilaka gwat taŋhay na i waka? I Bumbulvuŋ ndra migakaŋ malambaˀ na takwa? I naŋ, ndra mungumam sipi jiviɗ naŋ ta, yo ndra micinam mi ka ɓimujuwa naŋ mawuɗ ta tuwa takwa?

²⁵Vurˀe, a vunaha mevele ati himaˀ naŋ ngi vurumo ng'ar Israyeleye. Mevel naŋ a tiɓi ka vu ngi hay mawur, gun hirnga taŋ, amma ko Israyeley a ngumam sin naŋ ta, a zluma taŋ zlam zlam kap, amma ko a wulkam neˀ le ta.