Read South Giziga ISA 43 Bible Online

ISA 43 - South Giziga bible

ISA 43

¹Wurenna, kum mizli ngi Zakopoy, kum Israyeley, ya Bumbulvuŋ mugukum, ya mbur mundurukumo, i ɓukum na: «Ki zluwunam ta, asi yi mbuɗo hirnga kumo le, i zulukum le daɗ daɗ ti slimiɗ kum, kum inga yahay.

²Da ki ra tuwuɗam yam na, y'ada ati kumo, da ki ra tuwuɗam mizaw ma na, anta sa ndukum ta. Da ko ki ra ram tir vu kwana, anta sa wurukum ta, yo irne vu anta sa zlumukum mata.

³Asi ya Bumbulvuŋ, yi Buymisemuŋ kum. Yi Buymisemuŋ mipal ngi Israyeley, yi Milih kum. Yi vula mizli Eziptehey le, ɓa ngi mbiɗa hirnga kumo, yi vula mizli Etiyopihey ati Sebahaya le ar deɗe kumo.

⁴Asi mike na, kum puɗaw haɗa a mihiri ɗu, kum ɗongor, yo i ra wuɗukum. Vurˀe, i vul sukwi ngi mizli taˀ ar deɗe kumo, zigiduw taˀ ngi mbiɗa hirnga kumo.

⁵Ko ki zluwunam ta, asi y'ada avu kumo. I sa mo ti dideˀ kumoyo zle tisi pas ngi miprike, i sa kuso hirnga kumo zle tisi pas ngi pastaˀa.

⁶I sa ɓa mizli vay muŋhoyo: «mikiy taŋ», yo mizli vay ruwuyoyo, i sa ɓa taŋ: ‹ki tikaka taŋ ta. Mikiy ti ziri mizile ɗuwoyo tir hirwuy mikileŋ kileŋ tayna, yo ziri diili ɗuwoyo, tir hirwuy mira kiɗo mi.

⁷I mizli gar mazilaka taŋ ti slimiɗ ɗu, mizli gar, ya miga taŋ, ya mindira taŋ, yo ya miɗiya taŋ, ɓa a gikiy dudok.»

⁸Mizli dangar tayna, hiri ada avu taŋ vuna ngbaŋ, yo midigizla tayna, slimiɗ ada avu taŋ vuna ngbaŋ na, boko taŋ.

⁹Anja sukwi ngi mizli gar a kusom, anja mizli gar a cikilam hirnga. Ɓi migam tayna, mitil mi ti ɓi nah ɗaˀ a wuzla taŋ i waka? [5]. Gwat mucohomoy na, a wuzla taŋ, miɓa ndra ɓi nah daf le i waka? Anja a bugoko sedewo taŋhaya, ngi biga naŋ jeŋŋe so, ɓa i cinaka taŋ di, dar a sa ɓam: «Hĩ, naŋ kaslsla!»

¹⁰«Sedewo ɗuwoy i kum mizli ɗuwoy, gawla ɗuwoy i kum, ya muwunukum, ɓa ki slaka wala ngi ɓi, ɓa ki tiɓikiy a mevel kumo, yo ɓa ki sinaka kuy kuy, yi Buymisemuŋ. Buymisemuŋ mekelem dumbuŋ ar ya, ɓa ki huruk hurukam a mbuŋ naŋ na, anta, yo a dirba ɗu kwana, anta ma. I ya Bumbulvuŋ maɓi.

¹¹Bumbulvuŋ i ya, i ya pal ɗu, mbak ya le na, milaha vu anta.

¹²Mitil mi ti ɓi ngi lahavu i ya, yo muso ti ɓi nah i ya. Mubiga ɓa mizli a cinaka i ya, i kuli mulak misi asi ruwuy kum na ta. Naŋ kine, kum i sedewo ɗuwoy, ya i Buymisemuŋ kum. I ya Bumbulvuŋ maɓi.

¹³Naŋ kanah, zle dana, y'ada nga ya nga yahha. Mbur malih mbur gu tisi haŋ ɗu anta loŋ ta, gwat ya miga le na, mbur mambuɗa gu anta.

¹⁴Ya Bumbulvuŋ, ya mbur mimbiɗi hirnga kum, ya Buymisemuŋ mipal ngi Israyele, i ɓukum na: «I ra slin mbur vur kum nga Babiloŋ, i sa ngila magandaŋ ngi mizlingre ngi walahay taŋ avra, i sa ga ɓa mizli a kilam kwatak, Dar salalay macino tir walahay Babiloŋ, a sa tiri tuwuy.

¹⁵I ya Bumbulvuŋ, Buymisemuŋ kumo mipal, miga Israyeley, yi Buy kum madiɗaŋ.»

¹⁶Bumbulvuŋ a ɓi ani: «Zleˀe na, i ki jiviɗ le a wuzla mubuliye, i ki li cuh le a wuzla yam mijileŋ.

¹⁷I bi ti mota ngi vurum ati pilisey, soje ati madiɗa taŋhaya, ɓa a ram ng'ar vurum. Taŋ gar a ndilam le, a slikiɗam gu mata, a micam le, zlizlar zlizlar kaɓa zeweɗ ngi lampe.

¹⁸Ki wulkam ar gwatay migam dumbuŋ zleˀe na mata, ki kam slimiɗ ar ɓi mucuh zleˀe na mata.

¹⁹Asi mike na, wurenna, i wuɗ i gi gwat nawayahay, ara go vuna si, ki sinaka takwa? Naŋ kanah, i sa ki jiviɗ a wuzlaɓuh mikirɗak kirɗaka, ar li papala, i sa ki mizaw.

²⁰Gwat misãmi ngi ɓuhoy: sundu ati maduulihey a sa gikiy dudok, asi i sa ɓa yam a ɓul a wuzlaɓuh mikirɗak kirɗaka, i sa ki mizaw ar li papala, ɓa mizli ɗuwoy, ya muwuna taŋ na, a sam yam.

²¹I mizli ya miga taŋ da ya, ɓa a gikiy dudoko.»

²²Bumbulvuŋ a ɓi na: «Israyeley, ki zilam di i ya ta, mizli ngi Zakopoy, ani ki giram ti ya le gar ngi tumbul ɗu.

²³Kum migaka mikuli mizlamzlam wãˀ ti ziri tumuŋhoy na, da ya ta, kum mihunumam kanah na, i ya ta. Ya muwuɗ ɓa ki vulikiy gwat ngi mikuli na kwana, i gi ti kum beke ta, yo ya muwuɗ ki wurikiy ˀurdi na, i girukum ti gir ta.

²⁴Mal mazĩˀĩ ndumvur ya, ki hiɗikaka ti hiɗik ti dala ta, ki mbikiy ti mungul ngi ginew, kum mikiɗaka taŋ ngi giy taŋ mikuli na ta. I kum mitiram ti ya beke ti malambaˀ kum migaka na jaka, i kum migirikiy ti mungra kum migaka na jaka.

²⁵Amma ya, y'ada nga ya nga yahha, kum mislikiɗam ɓi avu ya na, i pula ɓi nah le, ko y'anta ja ɓi ngi gwat malambaˀ kumoy na a kwacay ɗu mata.

²⁶Mikiy hiri ngi ɓi ngi gwat kum mambiɗikiy hirnga vurˀe na so, ɓa ndra jom, i ɓam ara, yo kum ti hirnga kum vuna, slufaka, ɓa kisa ɓam naŋ kaslsla.

²⁷Ani dideˀ kum mudumbuŋ a gi malambaˀ le, mislin kumoy a slikiɗam ɓi le avu ya.

²⁸Mizli madiɗa kumoy ngir hay nga ya Buymisemuŋ, yi vuso taŋ vus vus, yi vula mizli ngi Zakopoyo le, ɓa a ngizlaka taŋ ar slimiɗ ɗu, yo Israyeleye, yi pula taŋ le mbak, ɓa mesene taŋhay a zaka taŋ.