Read South Giziga ISA 44 Bible Online

ISA 44 - South Giziga bible

ISA 44

¹Amma wurenna, kum mizli ngi Zakop, gawla ɗuwoy, cinam ɗi, kum Israyeley, ya muwunukum:

²Ya Bumbulvuŋ migi kum, mindir kum zle a kwacay mumuŋ kumoy, ya mijini kumo, i ɓukum: «Kum gawla ɗuwoy, mizli ngi Zakopoy, ki zluwunam ta, kum mizli ngi Yesuruŋhoy [6], ya muwunukum.

³Vur hirwuy manja yama, i sa ga ɓa a ɓul yam, li muˀulo, yam a sa ɓul ara. I sa slino ˀUf ɗu ar ziri kumoyo, yo i sa ɗuwula mi da dideˀ kumoyo.

⁴A sa gilam kutum kaɓa giziŋ a mi yam, kaɓa widis ar li ngi yam.

⁵Mbur mekelem a sa ɓi: ‹Yi mbur ngi Bumbulvuŋ›, mbur numuŋ, a sa cakaŋ slimiɗ ngi Zakopo. Mbur mekeleme ma na, a sa toho toh toh a hur haŋ naŋ: ‹Yi ngi Bumbulvuŋ›, yo a sa zila slimiɗ naŋ Israyel.»

⁶Israyeley, Bumbulvuŋ, buy madiɗa kum, mimbiɗi hirnga kum, Bumbulvuŋ, Misi Gidaŋ wãˀa, a ɓukum na: «Mudumbuŋ i ya, ngi dirba i ya ma. Mbak ya le na, Buymisemuŋ mekelem anta.

⁷Misi kaɓa ya i wa ska? Anja a ɓi so, anja a ɓa ɓi ngi gwatay misi ada, yo a bigiy pulaˀvra nah. Anja a slufiy ɓi ngi gwatay migam, zle ti ya mugo mizli mudumbuŋhoy na, anja a ɓa ndra ɓi ngi gwatay masa gam tumbuŋ ma.

⁸Kum mizli ɗuwoy, ki jijikam ta, ki zluwunam ta. I pulukum, ki cinaka ɓi nah le zlezle takwa? Kum i sedewo ɗuwoy takwa? Mbak ya le na, Buymisemuŋ mekelem ada kwa? Gisiŋ gisiŋ, ko mandazlay muwã purla, ɓa yi si na ta na, anta.»

⁹Mizli mavuɗam kulihey na, taŋ vuna gar i mizli ta, gwat taŋ mavuɗaka vuna, anta pula taŋ gir neˀ ta. kuli, sedewo taŋhay vuna, t'anta puram neˀ le ta. A sinam gwat neˀ le ta, taŋ mipam mesem na vurˀe.

¹⁰Vuɗa gwat ngi huruk huruk a mbuŋ naŋ, malla pi kuli ti pi na, i ɓi ngi gilaway wãˀ takwa?

¹¹Ani mizli migi gwat tayna gar, ara pam mesem, migi naŋhay vuna i mizli titirahay si. Anja a kusom cek, a soko. A sa zluwunam kir kir, a pam mesem gar taŋ.

¹²Gudi mavuɗa zlimbe, a ca ar zayvu munjulili, a kiɗa ti tele, i slra ngi gi mbar vu. Amma da may ara jaŋ na, naɓa gidaŋ anta mata. Da a si yama ta na, naɓa a kiɗ mi le.

¹³Miciɗa dumo, a wa ti zeweɗ, a toho li nah toh toh ti burkoɗok, a buko ti meceɗ, a sla puɗuwarra, a gaŋ deŋ ngi mburu, a ga ɓaˀ mbur titira si, ɓa a sa cifi ar hay mihĩˀĩ da naŋ.

¹⁴A ngum di i widis mezle ka miter, A wini di i dum migidaŋ ngi widis madiɗa, malla widis madiɗa mekelem ngi ɓuhoy. A ng'aka ɗuwuyo kaˀ, dar vuŋ a gila.

¹⁵Dum ngi ɗiya vu na, naŋ da mbur titira, mbur a zuɓa dumo, a ɗiy di vu ngi niˀi, malla ngi di ɗafa. Yo ma na, a ɗiy di gwat, a huruk huruk a mbuŋ naŋ, a ciɗ di kuli, dar a huruk a mbuŋ naŋ.

¹⁶Dumo cah, a bul di vu, a ka useˀ ngi humbuɗo ɓaˀ ara, a fukoŋ, a tuso useˀ, a humbuɗ, a mbi. Yo ma na, a niˀi vu, a ɓi: «Yawwa, i ra niˀi vu! vu hana, naŋ ndum.»

¹⁷Dum mindire, a ciɗ di gwat ngi huruk huruk a mbuŋ naŋ, i kuli naŋ. A tumbuloŋ, a ɓaŋ: «Ka ki gwat ɗu, ya mahuruk huruk a mbuŋ ɗik, lihiy takwa?»

¹⁸Mizli tayna, anta cinam ta, anta slaka wala ngi gwata ta. Asi hiri taŋ i mislirɓa le, mbak ko a puram mata, mevel taŋ kwana kanah ma, mbak ko a sinaka ɓi gu mata.

¹⁹Ko mbur loŋ mawuluk a mevele anta, mbur misi lesl malla misli wala ngi ɓi, ɓa a ɓi: «Dumo cah, i ɗiy di vu le, zayvu naŋ, i di di ɗaf le, i tus di useˀ le, i ra humbuɗa. Yo is ngi dumo, i sa ciɗ di kuli, i sa huruk huruk a mbuŋ misliŋvu ngatara mbrike?» na, ko anta loŋ ta.

²⁰Kay, mizli tayna a vulaka vu taŋ da fucu ngataraŋ, gilaw ngir mevel taŋ a ziza taŋ le. Kuli taŋ anta laha taŋ ta. Ɓa mbur a ɓi: «Misi a haŋ ɗu hana, i gwat puɗaw ngi huruk huruk a mbuŋ naŋ ta» na, ko a ɓi ta.

²¹Kum mizli ngi Zakopoy, wulkam ani: Israyeley: kum i gawla ɗuwoy. Ya mindirukum na, ɓa ki cifam gawla ɗuwoy. Kum Israyeleye, anja ki pikiy mesem ta.

²²Kum mimbiɗam hirnga na, yi susuyumo ɓi nah le kaɓa gazlavay masusuyum, malambaˀ kumo, i susuyumo le kaɓa mulbuɗu. Moko ng'avi ya, asi yi mbuɗo hirnga kumo le.»

²³Muŋ, zluzluɓu, asi Bumbulvuŋ a ga slra naŋ le, mijileŋ ngi ruwuy, ji salalay, Muwãhay, ɓuh ati widis mingiriɗ ngi raˀahay, jakaŋ salalay ngi ngir ngi ngir, asi Bumbulvuŋ a mbiɗa hirnga ngi mizli ngi Zakopoyo le, yo a biga dudok naŋ le da Israyeleye.

²⁴Israyeley, Bumbulvuŋ mimbiɗi hirnga kum, yo mukicuwukum zle a kwacay mumuŋ kumoyo, a ɓukum na: «Gwatay misi ada gar na, i ya Bumbulvuŋ miga taŋ. Minjira muŋ bilir i ya pal ɗu, i ciya hirwuyo cay pal ɗu, mijiniy i waka?

²⁵Wurenna, ɓi ngi misi slireye, i tiri di ɓi ngatara le, i gi ti mihiziga njoloyo, ɓa a ɓam lambaˀ lambaˀ, i hizigiɗa misi sinmijileŋheye le nga dirba, yo sin taŋ ngi gi gwata, i tiri di le i ɓi ngi gilaway.

²⁶Ɓi ngi gawla ɗu maɓa na, yi gaŋ. Gwat ngi gi, mislin ɗuwoy mitilam di mi na, yi ga ɓa a gi kanah. Yi ɓi vur Zeruzaleme: «Anja mizli a pakaŋ.» Vur walahay Zudahaya, i ɓi: «Anja a ndiraka hiri taŋ a muŋ.» Gwat mihiryahay le zleˀe gar na, i sa slikiɗa hiri taŋ a muŋ.

²⁷Yi ɓa mubuliy madiɗa: «Hisiki, mizaway maɓuloko ng'ar ka, i sa hisika taŋ.»

²⁸Yi ɓi vur Siruso: «Naŋ i mijigina mizli ɗuwoy.» Gwat maciriy hiri gar na, i sa ga ɓa a gi kasl kasl avu naŋ. Yo i ɓi vur Zeruzaleme ma na: «Anja a ndiraka hiri naŋ a muŋ», yo hay nga ya Bumbulvuŋ: «Anja a ɗuvaka virzi naŋ a muŋ.