Read South Giziga ISA 45 Bible Online

ISA 45 - South Giziga bible

ISA 45

¹Bumbulvuŋ a ɓa Sirus, mbur naŋ muwuna: «Yi jinuw, ɓa sukwi ngi mizli a hinam hirnga a mbuŋ ɗike, ɓa ki tiɓa gidaŋ ngi buy madiɗahaya da ka, ɓa mizlingre ngi walahay, migica kiɗasl kiɗaslaya, a ndiram baŋ baŋ a mbuŋ ɗike.

²Ya ti hirnga ɗu, i sa ru ɓaˀ a mbuŋ ɗike, li mijiɗngwil jiɗngwileye, i sa ga taŋ sinar sinar, mizlingre ngi ɓiri gazahaya, i sa ngila taŋ, faɓru ngi ɓiriheye, i sa waha taŋ meɗmeɗe.

³Gwat ngi lum mukulaˀ ar luvuŋ waɗ zlili muɗumo le ɗumo, i sa vuluw taŋ. Kanah na, kisa sina, yi Bumbulvuŋ, ya Buymisemuŋ ngi Israyel, ya miziluw daɗ ti slimiɗ ɗiki.

⁴Ya muziluw ti slimiɗ ɗik na, vur gawla ɗu Zakop, kanah, vur Israyel, ya muwunaŋ na. I guw le ɗongor, manja ki siniy.

⁵Bumbulvuŋ i ya, mekelem anta, mbak ya le na, Buymisemuŋ mekelem anta. I sirkuw le ngi vurumo, manja ki siniy.

⁶Kanah na, ɓa mizli a sa sinaka, zle tisi pas ngi miprik, yo zle tisi pas ngi pastaˀa, mbak ya le na, i wa ma ka? Bumbulvuŋ i ya, mekelem anta mata.

⁷I ga li minjahha, yo i ga luvuŋ ma, i go zuy da mizli, yo i go taŋ bonoy ma. Tayna cek na, maga taŋ i ya Bumbulvuŋ.

⁸Muŋ, go jeŋŋe ɗike paɗ a muŋ kaɓa wulngar, yo po gazlavaya kaɓa vuŋ. Anja hirwuy a wun, ɓa ɓi ngi laha vu a fuyuku, yo ɓa anja gi jeŋŋe a pusoko jom. Miga gwat tayna gar na, i ya Bumbulvuŋ.»

⁹Mbur matira mbur migaŋ na, kay, naŋ ar bonoy, dambalaka naŋ vuna i magayak a wuzla magayak calahay ngbaŋ. Hohoy a ɓa mbur mindir naŋ: «Ki gi mi hana ka?» na, a ɓaŋ gu kwa? Yo gwat ka miga le na, ɓa a ɓuw: «Ki giy kuy kuy ta!» na, a ɓuw gu kwa?

¹⁰Mbur maɓa cine ngi mangal: «Ki yi mangal mi hana ka?» yo maɓa ngwas: «Ki yi vuna i gwat mike» na, kay, naŋ ar bonoy.

¹¹Bumbulvuŋ, mipal ngi Israyeley, Buymisemuŋ migi taŋ, a ɓi na: «Macufuɗikiy vur ɓi ngi ziri ɗuwoy i kum kwa? Yo gwat ya maga ti haŋ ɗu, mavulikiy jiviɗ ngi gi naŋ i kum kwa?

¹²Miga hirwuy i ya, yo miga mizli titira ngi raˀahay, i ya. I ya ti haŋ ɗu minjira muŋ bilirre, yo wurzlaŋ ngi muŋhoyo, i ya muwa taŋ.

¹³I ya ti gi teŋteŋ ɗu, mislikiɗo mbur misenna ɓa a sawa, i sa ɗiya jiviɗe sinarra a mbuŋ naŋ. Walahay ɗu Zeruzaleme, masa ndira hiri naŋ a muŋ i naŋ, yo mizli ɗuwoy mijahay nga hirwuy mulaka, masa pula taŋ a cohom, i naŋ, ko naŋ anta sa cufuɗa taŋ a wurkam wuruk le ta, naŋ anta sa cufuɗa taŋ ngi gi slra geˀ le ta. i ya Bumbulvuŋ misi gidaŋ wãˀ maɓi.»

¹⁴Israyeley, ya Bumbulvuŋ i ɓukum na: «Ezipteheye, migir ngi slra, taŋ migaka ti haŋ taŋ ati lum ngi Etiyopihey ti terere taŋ, waɗ mizli Sebahay, mizli jejeke tayna, a sa cohom asi ruwuy kumo, a sa ndiram da kum. Mizli tayna a sa supukum, i mujuwahay le kaˀ kaˀ ti celelu. A sa huruk hurukam a mbuŋ kumo, a sa tumbulukum ani: ‹Buymisemuŋ naŋ asi ruwuy kum tewle si, ko mekelem anta. Kulihey i gwat lambaˀhay.›»

¹⁵Amma ka Buymisemuŋ ngi Israyele, ka malih vu na, ki Buymisemuŋ muro ɗum.

¹⁶Pura mizli muvuɗa kuli tayna ɗi, a pam mesem le, zi a mba taŋ le ndus. Naŋ kanah, ara cohom ti zi mumba taŋ le ndus.

¹⁷Israyeleye, Bumbulvuŋ a laha taŋ le, a laha taŋ ngi wãˀa. Kum Israyeleye, kum anta sa pam mesem mata, anta sa zukum mata ngi set, hã ngi surmutu.

¹⁸Bumbulvuŋ, i naŋ miga muŋ, naŋ i Buymisemuŋ, mukutumo hirwuy, naŋ mitiri di gidaŋ gidaŋ. A ga hirwuyo ɓa a ndir njoŋ kine ta, amma a ɓa mizli a pam ara. A ɓi na: «Bumbulvuŋ i ya, ko mekelem anta.

¹⁹Ya miɓa ɓi ɗu na, i ɓa ɗum ti ɗum ta, i ɓa ar luvuŋ mukulkuc ngi ruwuy ta. Dideˀ ngi Zakopoyo, ɓa a sipikiy ar li munjoŋ kine na, i ɓa taŋ ta. Bumbulvuŋ i ya, yi ɓi di i ɓi mijeŋŋe, i til mi ti ɓi mikaslsla.

²⁰Kum sukwi ngi mizli mindiram ar sifa, kusom, soko. Soko jom arleˀe. Mizli mijijira kuli dum taŋhay na, a sinam gwat ta. A ra tumbuloko kuli taŋ tayna, malahaka taŋ gu ta na.

²¹Tilam mi ti ɓi kumo! Soko ti ɓi kumo nga mbuŋ mizli! Gam kus ngi ngilawuy gar kumo. Miga ɓa mizli a sinaka ɓi nah zlezle na, i waka? Yo mitil mi ti ɓi nah zle misi ngadana ta na, i waka? I ya Bumbulvuŋ takwa? Mbak ya le na, Buymisemuŋ mekelem anta mata. Da i ya mata na, Buymisemuŋ mekelem, mijeŋŋe, yo malih vu, anta mata.

²²Kum mizli ngi si duniya gurzluˀ gar, mbuɗoko hiri ng'avi ya, ɓa kisa lahama. Asi mike, Buymisemuŋ i ya, mekelem anta.

²³Ya Buymisemuŋ vuna, i hudum le ti hirnga ɗu, mabo ti balam ɗu i ɓi mijeŋŋe, i mingiɓi mambiɗi ta wãˀ. I ɓi na: «Mizli gar a sa huruk hurukam ti miliwis a mbuŋ ɗu, a sa hudumom ti slimiɗ ɗu.

²⁴A sa ɓam: ‹Slra mijeŋŋe ati gidaŋ gar na, naŋ avu Bumbulvuŋ tewle.› Mizli gar mijam mevel ar ya na, a sa soko ng'avi ya, hirnga a ruwuy a ruwuy ti mesem.

²⁵Amma dideˀ ngi Israyeleye, a sa ndiram jeŋŋe, yo a sa mumulom na, mbele ya.»