Read South Giziga ISA 46 Bible Online

ISA 46 - South Giziga bible

ISA 46

¹Kuli Bel ara guɓu, kuli Nebo ara wuɗ a diɗi. Foto taŋhay a roko a duba gwat misãmi mijijira gwatay. Gwat kum mazuɓaka taŋ ti zuɓ a muŋ ng'ar li gi mezegweley zleˀe na, ani wurenna i ginew migirahay le majijiraka taŋ.

²Kuli tayna ara wuɗ a ndilam, ara dilkam a ruwuy, t'anta lahaka foto taŋhay vuna gu ta, a jaka taŋ vuna le, ara ram taŋ nga hirwuy mulak.

³Kum mizli ngi hay Zakopoy, kum mizli Israyeley mindiram ti siifa, kum mizli, ya muzuɓa ɓi kum, zle a kwacay mumuŋ kumoy, yo ya muzuɓukum a muŋ zle ti bo kum put ti kwacay mumuŋ kumoy na, cinaka mingiɓi ɗu ani.

⁴Y'ada nga ya nga yahha, hã hin ngi gi gal kum, i junukum, hã avu kum masa pusoko hol. Mugukum i ya, masa ja haŋ kum i ya. Masa ɓusukum, yo masa luhukum i ya.

⁵Ki sa wikiy ati waka? Ndra rak rak ati waka? Ki sa wam ndra ati wa, ɓa i bam vu le na ka?

⁶Mizli mekelemey ara hiryaka ɓiri tapasl tapasl ngir birtete taŋhaya, a waka ɓiri bara taŋhaya ti kilo. A cufuɗam mbur mipi ɓiri ngi vuɗa gwataya, ɓa a vuɗa taŋ di kuli, a huruk hurukam, a hurukom a mbuŋ kuli vuna.

⁷I taŋ vuna a muŋ mazuɓaka a gagalaˀay, a jijirakaŋ, mavulakaŋ muskavu i taŋ, anja zleˀe i kuli vuna jak ayɗi. Kuli naŋ da ngbimme: anta kirih tir li nah gu ta. Da mbur ara widi ng'ava kwana, naŋ anta mbiɗaŋ di gu ta, naŋ anta laha mbur ar bonoyo gu ta.

⁸Wulkaka ɓi nah kuy kuy, ndiram zil zil, kum mizli mislikiɗa ɓihey, wulkam kuy kuy wãˀ a hur mevel kumo.

⁹Gwat mudumbuŋ, misi zleˀehey na, wulkaka taŋ keŋ keŋ. Kanah, Buymisemuŋ i ya, mekelem anta. Buymisemuŋ misi kaɓa ya anta.

¹⁰Gwat masa gi tumbuŋ na, i ɓa ɓi nah zle ar zli virzi naŋ, gwat migi t'aruŋ na, naɓa i til mi ti ɓi nah le daf dumbuŋ si. Yi ɓi: «Gwat ya muwulka le ɓa a gi na, a sa gi, yo gwat maciriy hiri gar na, i gaŋ.»

¹¹I zilo mbur migidaŋ kaɓa kuromo, zle tisi pas mabawa, gwat ya muwuɗ le ngi gi cummo, gwat ya mujuwa le a mevel ngi gi jeŋŋe, yo gwat ya miɗiya le ngi gi na, i zilo mbur ngi gi nah zle tir li mikileŋ.

¹²Kum mizli micin tahay, kum mizli mikileŋ avu ɓi mijeŋŋe na, cinaka mingiɓi ɗu ani:

¹³Gi jeŋŋe ɗu, naŋ gweˀe, naŋ anta kileŋ ta, ɓi ngi ya malih vu na, naŋ anta mur mata. I sa vulo ɓi ngi laha vu da mizli Siyoŋhoyo, i sa ga ɓa Israyeley a lumam dudok ɗu.