Read South Giziga ISA 47 Bible Online

ISA 47 - South Giziga bible

ISA 47

¹Walahay Babiloŋ, ya Buymisemuŋ i ɓuw na: «Pi sar tir janga ɗik ngi buyo, cifi a ruwuy. Walahay ngi Babiloŋhoy, cifi ndirɗaɗ a ruwuy, janga ɗik ngi buy anta. Taŋ mahunumukuw ‹Babiloŋ walahay mezle ngi cira hiri› zleˀe na, anta sa zilukuw kanah mata.

²Zuɓa ngurvuŋ, yiˀi daw, zana ngi mihiri ɗike, turo avra, fuɗa mi ngi rop ɗike, yo pula saraya ndaw ndaw, ɓa ki tuwuɗa mizawa.

³Kanah na, mizli a sa purukuw, ka gulndiŋ kine, a sa puraka gwat mapuw meseme. I sa pula cuwala, ko mbur masa tikiy gu anta.»

⁴Milih ndra, a ɓi kahana, a zilaka Bumbulvuŋ misi gidaŋ wãˀ, Mipal ngi Israyel.

⁵Buymisemuŋ a ɓa walahay Babiloŋ ma: «Cifi joˀ teˀ teˀe, ci ng'ar luvuŋ, asi taŋ mazulukuw ‹Madiɗa ngi zuma buyoy› na, anta sa zulukuw kanah mata.

⁶I ji mevel le zleˀe ar mizli ɗuwoyo, mizli nga yahaya, i mataŋ le a ruwuy, i vula taŋ le asi haŋ ɗiki. Amma ko ki pura taŋ ircece neˀ le ta, ki luwa galalaŋ mududok fineˀ gidaŋ le liw da mbur midigila.

⁷Ki ɓi zleˀe na: «I sa ndir maˀãy maˀãy ndrehhe, hã ngi sete.» Gwat mucuhom tayna, ko ki ki slimiɗ ar taŋ ta, ki wuluk ar misi nga mbuŋ ta.

⁸Amma wurenna, ka mawuɗ gwat ngi cira hiri haɗa na, cin, ka ki ɓi ti kwacay ɗike: «Mbur mupuɗaw i ya pal ɗu, mizli mekelemey gar na, i ngataraŋ. y'anta sa cifi wudiga ta ndiɗaˀa, y'anta sa ziza ziri ɗuwoyo ta.»

⁹Mendere mucuw hanayna, a sa lumukuw gurjik, ar hin purla si. Ziri ɗikey a sa micam, joˀ ki kiɗa mi nah ti cifi wudiga. A sa ndilukuw cummo, ko ti lum ɗik haɗa ti gi cekene ati pur ɗik ti njol ati daˀas na tekeɗe kwana, anta tikaka mendere tayna gu ta.

¹⁰Ki pula vu ɗike le mbak wãˀ da wer malambaˀ ɗike, ki ɓi na: «Mbur mapiriy anta.» Amma sin ɗik mijileŋ ati sin ɗik ngi gi gwat vuna, muguw gilaw i nah. Dar ka ki ɓi ti kwacay ɗike: «Mupuɗaw i ya pal ɗu, mizli mekelemeye gar na, i ngataraŋ.»

¹¹Mendere ara ndilawa ani ng'ar ka, k'anta sa si na sumuɗ a mbuŋ naŋ ta. Ɓi madiɗa a sa lumuw, k'anta sa ɗum ava gu ta. Naŋ kanah, mendere madiɗa a sa ndiluw gurjik, mendere misi ɓi nah a suw keŋ ɗaˀ ta.

¹²Ka ndir ti pi daˀas ɗik, ati cucuk ɗik mihaɗa na so. Ki giro vu le gar ngatara vurˀe, zle ti zuŋ. Ki wa zleˀe, zliv kisa lum di gwat, malla kisa ɓul di hiryi masa lumuw kwani!

¹³Ki giro le wãˀ ngi tiɓi mi ngi kutihey haɗa. Mizli mupura wurzlaŋhay a muŋ tayna, kiya muslo le gar na, ara ɓam ɓi ngi gwat masa gi. Na, anja mizli tayna vuna a bugoko vu, a soko, a luhukuw so ayɗi.

¹⁴Ani taŋ vuna, a sa tiram kaɓa giziŋ, vu a sa wura taŋ. Tˀanta sa laham avu irne vu gu ta. Vu nah vuna, anta sa so i zayvu ngi tuso gwat a hudul mata, i vu mubula urusso ngi niˀi mata.

¹⁵Naŋ kine, gwat masa ndilo avu taŋ na, naŋ kahana, i mizli ka migir vu gar ngatara ngi pura daˀas avu taŋ, mingizlaka si haŋ ɗik, diga ti ka misi ki zuŋ aruŋ. Mbur gar a sa ru ng'ar li naŋ, ko mbur pal masa lihuw anta.»