Read South Giziga ISA 48 Bible Online

ISA 48 - South Giziga bible

ISA 48

¹Kum mizli ngi Zakopoy, cinam ayɗi. Ki zilaka vu kumo Israyeley, ki boko tir tizer ngi Zuda, ki hudumom ti slimiɗ nga ya Bumbulvuŋ, yo ki hunumikiy ya Buymisemuŋ ngi Israyele, amma ki gaka njah kuy kuy ta, ki gaka ti jiviɗ mikaslsla ta.

²A zulukum ‹Mizli ngir walahay Mipal› ngbaŋ, ki ra cufuɗam hirdam hirdam ɓa Buymisemuŋ ngi Israyel, misi slimiɗ naŋ ‹Bumbulvuŋ misi gidaŋ wãˀ› na, ɓa a junukum.

³Gwat migam mudumbuŋhoyo, yi til taŋ mi le diga zlezle, yi ɓukum ɓi nah le ti balam ɗu, ki cinaka le. Gurjik si na, yi ga slra ɗu le, joˀ gwatay a gam.

⁴Amma yi sinukum le, kum i mizli mukuwahay, kum i mizli micin tahay wãˀ, hirnga kumo gidaŋ ka ɓiri gaza.

⁵Yi ɓukum ɓi ngi gwatay masa gama diga zlezle. Ɓa taŋ masa gam na, yi fukum ɓi nah le dumbuŋ, vur kum masa ɓam: «Maga gwat hana, i kuli ndra, i kuli dum malla kuli ɓiri ndrahay muwuɗam ɓa a gam kanah.»

⁶Ya miɓa ɓi ngi gwatay daf le na, ki cinaka ɓi nah le: ani gwat tayna a gam le. Na kumo, ki tilam di mi ta walkwa? Ani wurenna, yi ra til mi ti ɓi ngi gwat nawayahay masa gama, i gwat ya miwi taŋ vu zleˀe ɗum, misi ki sinaka taŋ zleˀe ta.

⁷I ɓi ngi gwat misi zlezlehey ta, i gwat ya mawuɗ i ga taŋ wurenna, i wuɗ i ga taŋ ar zli virzi ngi hin hana vuna si, ki cinaka ɓi nah ɗaˀ t'aruŋ. Vur kum masa ɓam: «I puraka taŋ le, i cinaka ɓi nah le.»

⁸Ko ki cinaka ɓi nah ta, ko sinaka ɓi nah neˀ le ta. Ki jikam slimiɗ macin nah diga zlezle ta wãˀ gisiŋ, asi yi si na le, kum i mizli muvula mizli ngi ji ngi jihey, yo slimiɗ kumo ‹mislikiɗa ɓihey zle ti zuŋ›.

⁹Ya matisla mevel na, asi yi Buymisemuŋ. Ya maɓusukum, i ngizlukum ta na, asi kum mahunumikiy na.

¹⁰Ani i luwuslukum le ar vu, anta kaɓa ɓiri bara ta ɓula, amma i purukum ar kukutu ngi bonoy.

¹¹Ya miga kanah na, vur i ya, vur i ya vuna si. Asi mike na, y'anta wuɗ a zaka slimiɗ ɗu ta. Y'anta sa vula dudok ɗu da mbur mekelem ta.

¹²Ya Buymisemuŋ i ɓi: «Mizli ngi Zakopoy, cinaka mingiɓi ɗu, kum Israyeley, ya muzulukum na, ya nga ya nga yahha: mudumbuŋ i ya, yo ngi dirba wãˀ kwana i ya ma.

¹³Haˀaw, muɗuva hirwuyo taˀa, i ya ti haŋ ɗu, minjira muŋ bilirre, i ya ma. Da ya mizila taŋ le daɗ na, a soko dedeŋ a mbuŋ ɗu.

¹⁴Kum cek, kusom, cinaka ɓi ani: Ngama ɗu ada,[7]. Gwat ya mawuɗ i sa ga da walahay Babiloŋ na, i naŋ masa gaŋ, masa biga gidaŋ ɗu ar Babiloŋhoy i naŋ. Amma i wa a wuzla kumo mitil mi ti ɓi nah ɗaˀ ka?

¹⁵I ya, miɓa ɓi nah i ya pal ɗu, naŋ kanah, i zilo di le. Yi so di le, a sa ga slra naŋ cummo.

¹⁶Girjohoko ng'avi ya, cinam: Zle angi zli virzi ngi gwatay na, yi ɓi ɓi ɗum ti ɗumo ɗaˀ ta, zle ti hin ngi gwat tayna mizlam ngi gi na, y'ada, Na wurenna i Bumbulvuŋ, Buymisemuŋ maslino ya, a vuliy Musuwun- ˀUf naŋ--[8].

¹⁷Ya Bumbulvuŋ, mimbiɗi hirnga kum, ya Buymisemuŋ mipal ngi Israyele, i ɓukum na: «Bumbulvuŋ Buymisemuŋ kumo i ya. I ya madubunukum gwat mupuɗaw vur kumo, i ya makusukum a jiviɗ kum marama.

¹⁸ˀAkka, ɓi ya muɓukum di zleˀe na, da ki jikaka slimiɗ le vurˀe zleˀe na, cifi kum zuy zuyo, a sa ɓul kaɓa mizaw madiɗaŋ, gi jeŋŋe kum a sa gi kaɓa diɓel ngi yam ar mubuliy.

¹⁹Dideˀ kumoy anta sa slufam slaf le ta kaɓa muyuŋ a mizaw, ziri ngi ziri taŋhay kwana kaɓa ɗugur memeɗe. Ko slimiɗ taŋ anta sa susuyum a mihiri ɗu ta, anta sa kiɗ ta.»

²⁰Bam avra tir walahay Babiloŋ! Cohom le tisi hirwuy nah. Mingiɓi ani, tilam di mi ˀay kaˀ a muŋ, njahaka ɓi nah, hã ar hirwuy mira kiɗo mi, ɓam na: «Bumbulvuŋ a mbiɗa hirnga ngi Israyel gawla naŋhaya le.»

²¹Naŋ muru ti taŋ tir li mikirɗak kirɗak na, ko madalyam a kiɗa taŋ ta. A budugo taŋ yama vil vil tir mandazlay, naŋ kanah, a cira taŋ mandazlaya kpah, dar yam a bo vil vil.

²²Na ya Bumbulvuŋ i ɓi na, cifi zuy vur misi moˀorehey anta.