Read South Giziga ISA 5 Bible Online

ISA 5 - South Giziga bible

ISA 5

¹Pilikiy i zli dimis ngi hunuma ngama ɗu, i dimis ngi hunuma yeme ɗu ati guva ngi gudubun naŋ. Ngama ɗu ada ti guva ngi gudubun zleˀe ar li miɗingir magi gwat haɗa.

²A hufa li naŋ, a guɗuma ɗuguroy avra, waɗ a wini hilfa ngi gudubun, a nga taŋ. A wuzla guva, a ndir hay musubur, yo a li vigiɗ ngi ɗuco yi ngi gudubuno. A ra kutuko ɓa a sa yi gudubun mezle zleˀe, amma a sa lum i malambaˀhay.

³«Wurenna mizli Zeruzalamey, yo kum mizli Zudahay, cifam migi kiita ar wala ndra ati guva ɗu.

⁴Guva ngi gudubun ɗu, anja i gi mi fineˀ ya migaŋ di na aruŋ maka? I ra kutuk ɓa a yi zinga mezleŋ, na a sa yi zinga malambaˀ vur mike?

⁵Wurenna, i sa ɓukum ɓi ngi ya masa gi ti guva ngi gudubun ɗu. I sa turo zluɓ mugun hirnga naŋ, ɓa ginewey a zumam araŋ. I sa slina moholo ɓa mizli a cam, a kirpaka.

⁶I sa tiri di li micay ngatara, ko anta sa kilahaka ta, a sa hufaka si virzi naŋ mata. Hadaw ati sisimey a sa pusam ara, yo i sa tika gazlavaya, ɓa a go vuŋ ng'ara ta.»

⁷Guva ngi gudubun ngi Bumbulvuŋ, misi gidaŋ wãˀa, i sukwi Israyel. Widis naŋ muwuɗ taŋ haɗa, i mizli Zudahay. A kutuk zle ɓa a gam gwat mikaslsla, amma a sa gam di i gwat mijeŋ ta. A kutuk zle ɓa a gam gwat mijeŋŋe, a sa lum di i widi ngi mendere.

⁸Kay! Mizli taŋ ar bonoy. A zliraka hayaya da cala da cala, guvahaya da cala da cala, hã a tiɓaka li cek, yo a cifam pal taŋ a wuzla walahaya.

⁹Bumbulvuŋ, migidaŋ wãˀ muhudum na, i cine le. A ɓi na: «Hadam, hay madiɗa ati mukuyteˀhey na, a sa ndiram njoŋ njoŋ manja mizli.

¹⁰Guva ngi gudubun kare kuruˀ nga cuw na, a sa ɗuc litir kukur mufaɗ tewle. alkamari mizliga kilo skat na, a sa ɗuk kilo kuruˀ tewle.»

¹¹Mizli maslikiɗam ti li, ati masipam barasa, hã pastaˀ kwana, may mbaazla ara ja taŋ na si na, kay, taŋ ar bonoy.

¹²A wam tulus ar li kiɗa garaya ati gangaŋ waɗ ar li fi bozloro. Amma gwat Bumbulvuŋ maga na, anta jaka a hirnga ta, yo gwat naŋ maga ti haŋ naŋ na, anta puraka ɗeŋ ɗeŋ ta.

¹³Vurˀe, ya Bumbulvuŋ i ɓa njah: «A sa jaka mizli ɗuwoyo nga ruwuy mulak, asi taŋ micinikiy mi ta. Mizli hirngahay a sa micam ti may, yo vendeke ngi mizli, madalyam a sa kiɗa taŋ.»

¹⁴Li ngi mizli mumucahay a sa wun firndiw, a buto mi boŋ, Mizli miɗongoroy ati vendeke ngi mizli ar li gi muguzlum taŋ, a sa ndilam ng'ara.

¹⁵Mizli titiraˀahaya, sey a huruk hurukam ti poporok, sey mizli a hurukom huruk huruk a ruwuy. Mizli mahuhumom vuhoy, sey a hinam ˀay.

¹⁶Bumbulvuŋ, misi gidaŋ wãˀa, a sa zil slimiɗ ti gi kiita naŋ. Buymisemuŋ mipala, a sa biga naŋ pala, ti jeŋŋe naŋ.

¹⁷Ziri tumuŋhoy a sa zumam ara kaɓa ar li zum taŋ. Ziri ˀaw muzlumbrahay a sa zumam ar diŋheye.

¹⁸Kay! Taŋ maɗiɗaka mungra ti zeweɗ ngi slir, yo taŋ maɗiɗaka gi gwat malambaˀa, kaɓa maɗiɗam saret na, taŋ ar bonoy.

¹⁹Taŋ a ɓam: «Anja Buymisemuŋ a wus vu, anja a ga gwat naŋ na kutum, ɓa i puraka. Anja gwat ngi gi ngi Buymisemuŋ ngi Israyele, a gi, a bugo vu, ɓa ndr'i sinakaŋ.»

²⁰Gwat malambaˀa, taŋ maɓam naŋ kuy, yo gwat mezle, taŋ maɓam i malambaˀa na, kay taŋ ar bonoy! Luvuŋ, a ɓam i li mijahha, li mijahha, a ɓam i luvuŋ. Gwat mundumo, a ɓam naŋ ɗalaka, yo gwat miɗalaka, a ɓam naŋ ndum.

²¹Mizli mapuraka vu taŋ kaɓa taŋ ti sinmijileŋ, yo mawulkam kaɓa taŋ ti lesl haɗa na, kay, taŋ ar bonoy.

²²Mizli, bugawla ngi mbaazlahay, yo misina gi mbaazla miɗalakay na, kay, taŋ ar bonoy.

²³Mbur muzluɓa ɓi, a vul gwat, a susuyumo ɓi naŋ, mbur muzluɓ ɓi ta, anta cinaka mingiɓi naŋ ta.

²⁴Vurˀe, a sa wuraka taŋ kaɓa giziŋ mawur ar vu. A sa zloko muco tivi dambaslay, himiɗ a sa kil ti mufuyuk taŋhaya, ka naŋ makil ti lagwada. Asi gwat Bumbulvuŋ misi gidaŋ wãˀ mudubuna taŋ di na, a hizigaka le avra. A hirsaka mingiɓi ngi Buymisemuŋ mipal ngi Israyeley na le. (v. 25: pura 9. 7-20)

²⁵Vurˀe, Bumbulvuŋ a sa ji mevel ar mizli naŋhaya. A sa puka haŋ ng'ar taŋ, hã muwãhay a sa wusam hiɓik hiɓik, joˀ vagay taŋhay a sa ndiram kaɓa gwatay misaɓaɓa a jiviɗ madiɗahay. Amma bam ti nah kwana, Buymisemuŋ a tisla mevele t'aruŋ, haŋ naŋ a ro pak ng'ar taŋ aruŋ na si.

²⁶Buymisemuŋ a tila mi da sukwi ngi mizli mikileŋheye. [2] A fa tulum da mizli ngi si diˀisey gar ɓa a soko. Ani ara wusoko vu, ara ndiloko kutum kutum.

²⁷A wuzla mizli tayna, ko mbur migir pal anta, sar a bi mbur ko pal ta, mbur misi hiri ziriɓ ziriɓ malla mahinje ko pal anta. Kanda ngi mbur mipusuk anta ko pal ta. Zeweɗ ngi tarak mupusuka, anta ko pal ta.

²⁸Luvut taŋhay i mimbisahay le, lek taŋhay i mihilahay le cek. Zlenek ngi pilis taŋhaya gidaŋ gidaŋ kaɓa ɗuguroy, sar ngi mota ngi vurum taŋhaya, lagwada sewwe kaɓa musure.

²⁹So taŋ a hurum kaɓa tuwuy ngi madiya mobor, kaɓa tuwuy ngi ziri moboroy, a ja gwata, a cuh di, ko mbur matiɓa ava gu anta.

³⁰Amma ti hin nah na, vuŋ a sa ndisl ar taŋ ti gidaŋ, kaɓa hurum ngi yam majuruf ar mubuliy. A sa puram hiri kini ng'asi ruwuyo, keɗ na, luvuŋ timbiɗim waɗ bonoy, joˀgazlavay titira a sa sirta papasa timbiɗim.