Read South Giziga ISA 50 Bible Online

ISA 50 - South Giziga bible

ISA 50

¹Ya Bumbulvuŋ i ɓi na: «Da yi ɓula Zeruzalem, mumuŋ kumo le na, ɗerewol mabiga, i ɓula le vuna naŋ maka? Malla mbur muhuɗukukum avu ya, kaɓa bekehey vuna naŋ maka? Puraka ɗi, ya muhuɗukukum avra na, asi malambaˀ kum. Yo ya muɓula mumuŋ kum na, asi slikiɗa ɓi kum.

²A gi mbri kanah ka! Yi so na, i lum mbur pal le ta, vurmike? Yi zil vu na, mbur miziliy mi anta pal le ta, vurmike? Hirbazla ɗu naŋ dugule malla gbusl haɗa ngi tuɓukumo kwa? Gidaŋ a kic le avu ya ngi laha hirnga kumo kwa? Puraka ɗi, i buca mubuliye le ɓar na, mubuliy a hisik ngbasl. Mizaw misi yamaya, i tiri taŋ ɓuh kirɗak kirɗak, yam misi anta ar taŋ ta tuwa na, dar kilifey a micam, a zãˀãm hirɓislik hirɓislik.

³I luso muŋ titira gu, yo i kaŋ zana ngi vagay gu ma.»

⁴Ɓi ya maɓa na, Bumbulvuŋ Buymisemuŋ a dubuniy di le, a dubuniy mingiɓi le, ɓa i si na jaha mbur mihĩhĩy le. Vur miprik gar na, a giy ɓa i jika slimiɗe jakka, ngi cine ɓi, kaɓa gawla ngi mbur.

⁵Bumbulvuŋ Buymisemuŋ a winiy slimiɗe le. Ya i gi ava teteŋ teteŋ ta, yi mi nga dirba ta.

⁶I taha duba le da mizli makiɗikiye, i vula kwala ɗu le da mizli mamuɗikiy mazlamaya, mizli mazikiy, yo matufikiy tazlay na, i ɗumo mihiri ɗu ta.

⁷Amma Bumbulvuŋ Buymisemuŋ ara jiniy. Vurˀe, y'anta pula vu ɗu mbak a zikiy ta, yo i tiri le hirnga gidaŋ ka ɗugur. I si na le, y'anta sa pi mesem ta.

⁸Buymisemuŋ n'ani gweˀ avu ya, a sa ga, ɓa ɓi ɗu naŋ jeŋŋe. Masa zli tiri ati ya i waka? Mawidi ti ya gu i waka? Anja i ram cuwa ng'ar kiita so. Mbur mazlir ti ya ta i waka? Anja a so ng'avi ya so.

⁹Haˀaw, Bumbulvuŋ Buymisemuŋ ara jiniy. Masa ɓiy i gi malambaˀ le i waka? Haˀaw, mizli tayna gar a sa hiryam kaɓa zana, movroko a sa zuma taŋ.

¹⁰A wuzla kumo, mbur mazluwun ti Bumbulvuŋ ada kwa? Mbur macina ˀay ngi gawla naŋ ada kwa? Mbur maru ar luvuŋ, manja a lum li minjahha ada kwa? Anja mbur nah na, a pula vu naŋ mbak da Bumbulvuŋ naŋ, a jih jah ti Buymisemuŋ naŋ na.

¹¹Kum gar, kum mabulam vu, kum muroko jah jah ti luvut misi vu munduvuɗa avu mi taŋhay na, cam ng'ar vu kum munjulili vuna, nga wuzla luvut misi vu munduvuɗa avu mi taŋhay vuna. I ya Buymisemuŋ masa ga, ɓa gwat nah a ndilo kumo, kisa micam ti bonoyo.