Read South Giziga ISA 52 Bible Online

ISA 52 - South Giziga bible

ISA 52

¹Ka Zeruzalem, slikiɗi, slikiɗ kutum, cici gidaŋ gidaŋ a muŋ. Ka Siyoŋ, walahay ngi Buymisemuŋ, ka zana ɗik mimezleheye. Asi mike na, zle dana, mbur mulak, mbur misi dili, anta sa ɗuvoko sar taˀ le ngi hay ɗike mata.

²Ka Zeruzalem, walahay dangay, ka misi lagwada tullo na, slikiɗ deŋ ti deŋ, hira lagwada avra. Ka Siyoŋ, walahay dangay, mburca celelu ngi si ˀay ɗik avra,

³Kum mizli ɗuwoy, ya Bumbulvuŋ i ɓukum na: «A huɗukukum ng'ar beke manja dala, a sa mbuɗoko hirnga kumo manja dala ya.»

⁴Haˀaw, ya Bumbulvuŋ Buymisemuŋ i ɓi na: «Angi zli virzi naŋ na, mizli ɗuwoy a slikiɗam, ara cifam a Ezipte, ar kiɗa mi naŋ na, Asirihey a gaka taŋ bonoy.

⁵Ani wurenna, ya mulum i gwat mi ska? I ya Bumbulvuŋ maɓi. Asi mike na, a jaka mizli ɗuwoy, a ram taŋ ngataraŋ, joˀ miji taŋhay a jam salalay. I ya Bumbulvuŋ maɓi. Vur hin gar na, ara zikiy, anta mbak le ta.

⁶Vurˀe, zle wurenna, mizli ɗuwoy a sa sinaka slimiɗ ɗu muduba. Zle dana, a sa sinaka yi mbur maɓi: ‹Y'ani› na.»

⁷Mbur mitila mi ti ɓi mezle ara tuwuɗo ani ti hirnga muwã, ara so ndra ti ɓi ngi zuy, ɓi ngi jam ati ɓi ngi laha vu. A ɓuw ka Zeruzaleme na: «Buymisemuŋ ɗik ara zum buy.» Kayya, hana i gwat mukuy teˀe.

⁸Cinaka ˀay ngi mizli kum mucufaka taŋ ngi jiɗa li tuwa, ara tilam mi, taŋ gar taŋ, ara jam salalay. Asi Bumbulvuŋ mamo nga Siyoŋ na, ara puraka ti hiri taŋ.

⁹Diŋ ngi Zeruzalemey, jam salalay jom gar kumo. Asi Bumbulvuŋ ara vula gidaŋ da mizli naŋhaya, ara mbiɗa hirnga ngi walahay Zeruzaleme.

¹⁰Bumbulvuŋ ara biga gidaŋ naŋ mipala , a mbuŋ sukwi ngi mizli gar. Ko angi hirwuy mira kiɗo mi kwana, mizli a sa puraka Buymisemuŋ ndra malaha ndra.

¹¹Kum mijijira gazlanga ngi gi mezegweley da Bumbulvuŋ na, bam kutum ti Babiloŋ, zuɓaka dili kumoy avra. Ki jam haŋ avu gwat misi dili ta.

¹²Kum masa bam na, anja ti wusa vu ta, yo kisa ram ti zluwun kir kir kutum ta ma. Asi masa ru ɓaˀ a mbuŋ kumo, i Bumbulvuŋ, yo soje miɓaˀ a dirba kumo, i Buymisemuŋ ngi Israyel.

¹³Bumbulvuŋ a ɓi na: «Gwat mawuɗam ngi gi na, gawla ɗu a ga gu, a sa tiri ɗongor, madiɗa, a sa hunumakaŋ hunum muwãˀ naŋ.

¹⁴Zigiduw haɗa masa puraka na, a sa zluwunam di, asi mihiri naŋ a mbiɗi le, anta kaɓa ngi mbur mata, yo deŋ naŋ kwana, anta kaɓa ngi mbur titira mata.

¹⁵Wurenna, ɓi naŋ a zuma hirnga le da sukwi ngi mizli gar, buyoy a sa ndiram guɗum guɗum lek, asi gwat miɓaka taŋ ɓi nah zleˀe ɗaˀ ta na, ara purakaŋ, yo gwat taŋ micinaka zleˀe ɗaˀ ta na, ara singilakaŋ.