Read South Giziga ISA 53 Bible Online

ISA 53 - South Giziga bible

ISA 53

¹Mingiɓi ndra micinaka na, mitiɓa asi ndra i waka? Bumbulvuŋ muso jina ndra na, misina i waka?

²Asi mike na, Buymisemuŋ, gawla naŋ a gil a mihiri naŋ kaɓa kalaf, sluwraŋ kaɓa slaslalak muɗuɗo kalaf ar li papala. Kuy malla gwat ngi ngilawuy, ɓa a ga ndra kuy ngi puraŋ na, anta ava ta. Ko deŋ naŋ kwana, anta kaɓa ndra mawuɗam ngi pur na ta.

³I mbur mizli mihirsakaŋ le, mupulakaŋ le fuku, i mbur ngi bonoy, misirik le ti vu ngi ji, naŋ kaɓa mbur ngi ɗuf hiri ng'ar naŋ mata, kanah, i mbur mihirsa le, ko i slufakaŋ kaɓa i mbur mata.

⁴Dambalaka na, a jijir di i bonoy ndrahay, a ɓus di i vu ngi ji masa ja ndra zleˀe na. Amma ndra, i puraka kaɓa mukutaŋ, mikiɗaŋ, yo mimaŋ a ruwuy na, i Buymisemuŋ.

⁵Amma naŋ, a gakaŋ waˀa na, asi mungra ndrahay, a guzuvurakaŋ na, asi malambaˀ ndrahay. Kuti ti bonoy maso ndra ti zuyo, i naŋ muluma, ndra i mbulom le, asi naŋ mulum waˀa.

⁶Ndra gar zleˀe, zlaɗ lambaˀ kaɓa tumuŋhoy, mbur gar aru ti sipi jiviɗ naŋ, malambaˀ ndra gar migaka na, Bumbulvuŋ a paŋ di nga hirnga naŋ.

⁷A pula vu naŋ mbak, a guzuvurakaŋ, ko a wun mi ta, kaɓa tumuŋ maram di nga sli ˀay, kaɓa madiya tumuŋ a mbuŋ mbur maslaŋ ngwice. Naŋ teˀ teˀ, ko a wun mi ta.

⁸A jaka ti gidaŋ, a gakaŋ kiita, a kiɗaka vagay, Ar hin nga naŋ na, mbur muwulkaŋ ada kwa? Haˀaw, a bam di le avra ti wuzla mizli misi ti siifahaya, naŋ mulum kiɗ na, asi slikiɗa ɓi ngi mizli naŋhay.

⁹A dikaka a wuzla misi moˀorehey, zivi naŋ ati misi zlilihey, na a gi moˀore ɗaˀ ta ngbaŋ, mi ngi gi gilaw da mbur a bo ɗaˀ ti balam naŋ ta ngbaŋ.

¹⁰Bumbulvuŋ a wuɗ ɓa a kutaŋ kanah ti bonoyo. Naŋ muvula vu naŋ ngi gi mikuli ngi ɗiya ɓi na, a sa pura dideˀ naŋhaya, hin ngi siifa naŋ a sa giɗ nga mbuŋ, naɓa gwat Bumbulvuŋ muwuɗ na, a sa gaŋ.

¹¹Ya Buymisemuŋ i ɓi na: Naŋ misi bonoy haɗa tuwa na, a sa pura dideˀ naŋhaya, hin ngi siifa naŋ a sa giɗi. Naŋ gawla ɗu, mizli a sa sinakaŋ, naŋ jeŋŋe, akẽh, a sa dubuna gi jeŋŋe da zigiduw haɗa, joˀ naŋ vuna a sa ɓusa jijira malambaˀ taŋ.

¹²Vurˀe, i sa cufaŋ a wuzla mizli madiɗahay, yo gwat muluma ngir vurumo, a sa lum mi nga naŋ, a wuzla mizli migidaŋhay. Asi i naŋ ti haŋ naŋ tehhe a muŋ muvula hirnga naŋ, hã a mucu, yo a pula vu naŋ, a slufakaŋ a wuzla migi mungrahay, asi mike na, a zuɓa malambaˀ ngi zigiduwo le nga hirnga naŋ, yo a cik vu le ar migi mungraˀahaya.»