Read South Giziga ISA 54 Bible Online

ISA 54 - South Giziga bible

ISA 54

¹Zeruzalem, ka dirlay, ka mayi mata zleˀe tuwa, ji salalay kiɗ kiɗ. Ka mayi mata zleˀe tuwa, widi, zluzluɓu. Ya Bumbulvuŋ i ɓuw na: ngwas mupula fuko, ziri naŋ mizileheye, t'ani zigiduw taˀa, taŋ haɗa fineˀ ziri ngi ngwas misi zile.

²Budaha guɗuk ɗike, gabaga ngi guɗuk ɗike, njira avra avra. Ki wulka gwat ka matika vurˀe ta. Juɓ zeweɗey ava, yo nga dum ngi jaha viŋheye kuy kuy.

³Asi kisa buduh tika tika gar. Dideˀ ɗikey a sa zumaka hirwuy ngi ciki ɗikeye, walahay ɗikey midaŋ daŋ na, a sa paka taŋ.

⁴Ki zluwun ta, asi k'anta sa pi mesem mata, k'anta sa gi ngaˀ mata, asi anta sa zukuw mata. Ka mipi mesem ti ka misi ti zuŋ zleˀe na, kisa puyuko hirnga naŋ. Taŋ misingiram ar ka wudiga zleˀe na, k'anta sa wulka keŋ mata.

⁵Asi mbur migi ɗike, zil ɗik i naŋ: slimiɗ naŋ, Bumbulvuŋ, misi gidaŋ wãˀ. Buymisemuŋ mipal ngi Israyele, mimbiɗi hirnga ɗik i naŋ. A zilaka ‹Buymisemuŋ ngi ruwuy keɗeɗe›.

⁶Ki ro zleˀe ar li liki, kaɓa ngwas mupula le fuku. Amma Bumbulvuŋ a wulkaɓi ɗike le, a ɓi na: «Ngwas muzuɓa paɗ ngi gawla ma na, a sa pulakaŋ fuk gisiŋ na, a gi kwa?»

⁷I puluw zleˀe ngi hin neˀ si, amma i sa tuɓuw a muŋ, i wuɗ ka haɗa, i puluw mata.

⁸Ya miji mevel haɗa zleˀe na, i ɗumo mihiri ɗu le avu ka ngi hin neˀe, amma, i ra buguw wuɗavu ɗu makiɗ mi ta na. Maɓuw hana i ya Bumbulvuŋ, ya mbur mimbiɗi hirnga ɗiki.

⁹I wuɗ i ga dana kaɓa ya miga ti hin ngi Nowe. Yi ɓa le ɗaˀ le, ko yam anta sa zuɓ sirit hirwuyo mata, ani wurenna, i ɓa le ɗaˀ le, y'anta sa ji mevel ar ka mata, yo y'anta sa gucuw mi mata.

¹⁰Da ko muwãhay a wusam, da ko li miɗingirey a kiraham ng'ar li mekelemeye tekeɗe kwana, wuɗ ya muwuɗuw na, anta sa kirih kileŋ avu ka ta ndiɗaˀa, yo jumoˀay ɗu ngi cifi zuy ati ka na, gwat masa wusa anta. Maɓuw hana i ya Bumbulvuŋ mawuɗow haɗa na.»

¹¹Zeruzalem, kay, bonoy a lumuw le, burkataŋ a zlumburuw hirnga le, ko mbur maɓuw ɓi ngi tuso didak anta, ya na, i sa ga wuya da ɗugur ngi mohol ɗikeye, i sa ɗuva virzi ɗike ti ɗugur mupuɗaw ngil ngiley.

¹²I sa kiɗa hirnga ngi mohol ɗike ti ɗugur mupuɗaw gagaza ndez, mizlingre ɗikeye, ti ɗugur mawucuɗamay, yo mohol mugun hirnga ɗike, zlar ti ɗugur ngi wuyahay.

¹³Ziri ɗik mizilehey gar a sa tiram gawla nga ya Bumbulvuŋ, yo a sa ndiram zuy zuy wãˀ.

¹⁴Ki sa cifi ti gi gwat mijeŋŋe, ko mbur masa wusuw gu anta. Yo k'anta sa zluwun ti gwat neˀ ta, gwat ngi muɗa didak anta sa ndiluw neˀ mata.

¹⁵Da mizli a soko le zlukuw ngi kiɗa vu na, ɓi nah a so tivi ya ta. Mbur gar masawa zluw ngi kiɗa vu na, a sa diɗ a mbuŋ ɗike.

¹⁶Pura ɗi, miga mbur gudi i ya, naŋ, mbur mafuro vu ar ivir ngir kukutu, ɓa ngi vuɗa gwat ngi vurum naŋ muwuɗ le gar. Yo mbur mihĩˀĩ ngi hirya gwat ngi vurum tayna vuna ma na, migaŋ i ya ma.

¹⁷Gwat ngi vurum gar miɗiyaka le ngi hiryi ɗik na, anta sa guw gwat neˀ ta, mbur gar misa widi ti ka le na, kisa jaŋ ti kiita. Gwat ya Bumbulvuŋ masa wi di vu da gawla ɗuwoy i hana. Gi jeŋŋe maso tivi ya, a sa gi kahana. I ya Bumbulvuŋ maɓi.»