Read South Giziga ISA 55 Bible Online

ISA 55 - South Giziga bible

ISA 55

¹Kum gar, yam magukum na, soko, yam ani. Da ko mburo, dala anta kwana, a sawa. Cufuɗam gwat ngi zum, zumam, soko sam gwata, hiɗikam mbaazla ati ɗuwa, i ngataraŋ, anta ngi wurka dala nah ta.

²Gwat ngi zum ti mbur kuɗaˀ ta, ki tikaka dala kumo vurˀe ngi mike? Yo gwat mambi vu mbeˀ ta, ki tikaka gidaŋ kum vurˀe ngi mike? Inga cinam so, cinikiy mingiɓi ɗu, yo zumam gwat mezle, anja gwat ngi zum mundumoy a curukum hiri.

³Jikoko slimiɗ, soko ng'avi ya, cinam, ɓa kisa ndiram ti siifa. I sa jumˀay ati kum wãˀ ngi sete. Gi mezle, ya miɓa ɗaˀ le da Davit na, y'anta sa pula teˀ ta.

⁴Yi cifaŋ naŋ le i sedewo ngi biga gidaŋ ɗu da sukwi ngi mizli, i buy, yo i madiɗa ngi mizli ma.

⁵Ani ka kwana, sukwi ngi mizli ka misina taŋ ta, kisa zila taŋ, yo sukwi ngi mizli ka misina taŋ ta, a sa kiloko ng'avu ka. Hana na, asi Bumbulvuŋ i Buymisemuŋ ɗiki. Haˀaw, asi Buymisemuŋ mipal ngi Israyele, a guw ɗongor le.»

⁶Sipaka Bumbulvuŋ, asi a pula vu naŋ le, ɓa ki lumakaŋ, zilakaŋ, asi naŋ gweˀe.

⁷Anja mbur misi moˀore, a pula gi moˀore naŋ, yo mbur migi malambaˀa, a pula wuluk naŋ malambaˀa. Anja mizli tayna a mam ng'avu Bumbulvuŋ, ɓa a pura taŋ ircece, a mam ng'avu Buymisemuŋ ndra, mapul mungra haɗa na.

⁸«Wuluk kumo, anta ka wuluk ɗu ta, yo gwat ngi gi ɗu, anta ka gwat ngi gi kum ta. I ya Bumbulvuŋ mabi.

⁹Muŋ, naŋ kileŋ haɗa avu hirwuyo. Naŋ kine ya, gwat ngi gi ɗu, naŋ kileŋ haɗa avu gwat ngi gi kumo, yo wuluk ɗu, naŋ kileŋ haɗa avu wuluk kumo.

¹⁰Vuŋ ati yam mapo buk buk ti muŋ na, anta mi nga muŋ, manja a luɓo hirwuyo ta, amma a ga ɓa hirwuy a gi gwat malla ɓa gwatay a ɗiɗam, a ya hilfa gwat da mizli ɓa a zligakaŋ, waɗ a vula gwat ngi zum da mizli, ɓa a zumakaŋ.

¹¹Mingiɓi ɗu naŋ kanah ya, da naŋ mubo le ti balam ɗu, manja a gi gwat geˀ le na, naŋ anta mo ng'avi ya ta, amma a ga gwat ya mawuɗo, a ga gwat maciriy hiri, waɗ a ga gwat, ya mislino di vurˀe na.

¹²Asi mike na, kum masa bam ti Babiloŋ na, ti mumul haɗa, a sa mam ti kum ti zuy. Kum masa cohom na, muwãhay ati li miɗingirey a sa jukum salalay, yo widis ngi ɓuhoy gar a sa kuɗukum haŋ proˀ proˀ proˀ.

¹³Widis migidaŋ mimezle [10] a sa pus ar li ngi sisim, yo giziŋ mazĩˀĩ ndum haɗa, a sa pus ar li ngi giziŋ mazligi vu mizlirep slirep a ruwuy [11]. A sa gi kanah na, ɓa slimiɗ ngi Bumbulvuŋ a zil, yo i gwat mabigi gwat ndrehhe masa kiɗ ta wãˀ.