Read South Giziga ISA 56 Bible Online

ISA 56 - South Giziga bible

ISA 56

¹Bumbulvuŋ a ɓi na: «Gwat ngi gi zuy na, jaka kaw kuy kuy, yo gi jeŋŋe kwana, gam di slra, asi laha vu ya maso di na, a wuɗ a ndilo gweˀ, yo gi jeŋŋe ɗu, a wuɗ a njik gweˀ.

²Mbur maga gwat ya miɓa hana, macici zlak gidaŋ gidaŋ ar ɓi nah, maja ɓi ngi hin ngi sabat a hirnga, waɗ mazuɓa haŋ naŋ ngi gi malambaˀ ta na, naŋ ar mumul.»

³Mbur mulak mujum le ng'avu Bumbulvuŋ, ɓa a ɓi: «Bumbulvuŋ a sa guhiy tivi mizli naŋhaya» na, anja a ɓi kanah ta. Yo mbur munguɗo, ɓa a ɓi: «Yi dum muˀulo» na, anja a ɓi kanah ta ma.

⁴Ya Bumbulvuŋ i ɓi na: «Mizli munguɗoho majaka ɓi ngi hin ngi sabat ɗuwoy a hirnga, mawuɗam gi gwat maciriy hiri, yo midedeŋ ndrehhe ar ɓi ngi jumoˀay ɗu na,

⁵mizli tayna, i sa wa taŋ vu ti li a hur hay ɗu, i sa nga taŋ ɗugur kaˀ ngi toho slimiɗ, nguɗ nguɗ araŋ, a sa gi avu taŋ i gwat mimezle, fineˀ ziri mizile ati ziri mongosohoy. Slimiɗ ya masa ca taŋ di na, a sa ndir ngi sete, anta sa vuvuy avra ta ndiɗaˀ.

⁶Mizli mulakay mujumom le ng'avi ya Bumbulvuŋ, ɓa a hunumikiy, yo ɓa a wuɗam zila slimiɗ nga ya Bumbulvuŋ, ɓa a gam gawla ɗuw, yo mizli gar majaka ɓi ngi hin ngi sabata, manja a hiryakaŋ, waɗ mizli ɓi micicam le deŋ ndrehhe ar ɓi ngi jumoˀay ɗu na,

⁷i sa so taŋ nga muwã ɗu mipal , i sa ga ɓa a sa mumulom haɗa ar hay ɗu ngi diradibiɗe. Mikuli taŋ mizlamzlamay wãˀ ati mikuli taŋhay muho gar, taŋ magikiy taŋ ar li gi mikuli na, i sa tiɓa taŋ. Asi mike na, hay ɗu a sa zilaka: ‹Hay ngi mizli gar madiram dibiɗ araŋ.›

⁸Ya Bumbulvuŋ Buymisemuŋ, micikilo hirnga ngi Israyel muɓulahaya, i ɓi ma: «I cikilo hirnga ngi mizli le si, i sa cikilo hirnga ngi mekelemey jom ng'avi taŋ ava ma.»

⁹Kum gwat misãmi ngi ɓuhoy, kum gwat ngi si dumoy, soko zumam.

¹⁰Mijigina Israyeley i dangaray, a sinam gwat ta. Taŋ kaɓa kiri miteˀteˀhey, t'anta wudam gu ta. Tˀada tup tup gwat taŋ, ara musuwunam ti gwatay, i mofonohoy ma.

¹¹Yo taŋ vuna kaɓa kirihey mawuɗam humbuɗa gwat gar, ɓa a ɓam: «Muk muduba» na, a sinaka ɓi ɓi kanah ta. Mijiginey i taŋ vuna ngbaŋ. A sinaka sli wala ngi ɓi ta. Mbur gar na, a sipi jiviɗ nga naŋ. Mbur gar na, a pur di i pula gir da hirnga naŋ tewle si.

¹²Ko wa gar na, a ɓi: «Soko, supukum mbaazla, i sa sam arge. Ti prik kwana, kanah ma, mbaazla a ndir le haɗa teˀe.»