Read South Giziga ISA 57 Bible Online

ISA 57 - South Giziga bible

ISA 57

¹A ra kiɗaka mizli mijeŋŋeheye vagay vagay, amma ko mbur loŋ malika taŋ anta. A ra ngizlaka mizli mezleheye, amma ko mbur maki slimiɗ ar taŋ anta. Haˀaw, mangizlaka mizli mijeŋŋehey vuna, i misi moˀorehey.

²Amma cifi zuy zuy a sa ndilawa, mizli masipam gi gwat mikaslsla na, a sa musukam vu ar li hin taŋ.

³Kum ziri mizlile ngi ngwas misi cucukoy, kum dideˀ ngi ngwas migi madama, ngi ngwas sulome, kirohoko ng'aka,

⁴Ki singiram ar waka? Ki singiram kuɗok kuɗok, yo irne virlek virlek ng'ar waka? Kum i ziri mislikiɗa ɓihey takwa? Kum i sukwi migi gilaw da mizli takwa?

⁵Ki wusam jaɓ jaɓ a ciki widis madiɗahaya, waɗ asi virzi ngi widis mingiriɗ gar, joˀ ki slaka ˀay ngi ziri kumoyo ngi gi taŋ mikuli ar hurjijiŋhey, waɗ ar butumoy.

⁶Kikirzleŋhey kum maguɗumaka taŋ ar hurjijiŋ na, mi ngi kum i nah so. Ki puslam di i taŋ ti mbaazla, ki zlumam taŋ gwat ngi mikuli. Bumbulvuŋ a cufuɗu: «Tayna gar na, ɓa a tislikiy mevel sukwa?»

⁷Ki ɗiyaka li hin kumo a muwã mesengel, dar ki jiɗam nga diga nga gi mikuli.

⁸Ki ɗuvaka kuli kumoyo a dirba dum ngi miviŋ kumoy. Haˀaw, ki ɗumom ɗum avu ya, dar ki cukoko zana kumoyo, Ki jiɗam ng'ar arngawo kum madiɗahaya, Ki jumomˀay ati mangasl kumoy, kum mawuɗam hin ti taŋ haɗa na, dar ki puraka mbuŋ taŋ.

⁹Ki gam mal geˀgeˀ, dar ki pam sar ng'avu buy madiɗa [12]. Ki pam urdi avu vu, ki slinam mizli zle kileŋ, dar ki pam sar hã sesẽŋ ng'ar li cifi ngi mizli mumucahay.

¹⁰Kum miram haɗa tuwa na, ki giram le kupuyah kupuyah. Amma ɓa ki ɓam: «Ingatara» na, ki ɓam ta. Ki lumam gidaŋ a muŋ ma, ki ɓulaka gire le avra.

¹¹Mugukum zluwun haɗa i wa, ɓa hã ki gikiy gilaw kahana, ki wulkam keŋ ar ya mata na ka? Ki kikiy ɓaˀ le a mevel kumo ta. Yi ndir teˀteˀ, a zik le, kum mazluwunam ti ya mata na vurˀe.

¹²Amma kum mawaka kaɓa kira gam gwat mijeŋŋe na, i sa njika ɓi nah, yo gwat ngi gi kumo, kum anta sa lumam di gwat neˀ le ta.

¹³Da kum mira wudam na, kuli, kum micikilaka taŋ vuna, anja a kiloko widi kumo so ayɗi! Himiɗ a sa kil taŋ kwetek, musuwun fur a sa hila taŋ pay. Amma mbur maɗum ti ya na, a sa lum mi nga naŋ i hirwuy, yo muwã ɗu mipala inga naŋ.

¹⁴Bumbulvuŋ a ɓi zleˀe na: «Siɗilaka buwala, baˀaka gwataya, ɓa jiviɗ a ndir fawwa. Gwat matika mizli ɗuwoy a jiviɗ gar na, pukoko taŋ avra.»

¹⁵Ya mbur madiɗa, mifineˀ gwatay gar, mandir ngi set, yo slimiɗ ɗu mipala , i ɓi na: «Ya Buymisemuŋ, mua muŋ, ya mipal, ya misi ati mizli muroko ar bonoy, waɗ misi membezleŋ ngi vu taŋ anta mata. I wuɗ i vula siifa da mizli misi membezleŋ ngi vu taŋ anta mata, waɗ da mizli muroko ar bonoyo.

¹⁶Y'anta mbiɗa hirnga da mburo ngi caˀa ta, y'anta ji mevel ngi wãˀ ta, da kine zleˀe ta na, naɓa mizli ati gwat misi titirihey, ya miga taŋ na, a sa zizaka siifa taŋ a mbuŋ ɗu.

¹⁷Israyeley hĩhĩyam gwatay gar na, a jiy mevel le. Mevel mijiy na, i kiɗa taŋ, ko y'anta wuɗ pur taŋ avu hiri zleˀe mata. Amma a ndiram teŋteŋ ta na si, a gam gwat ngi si mevel taŋ.

¹⁸I pura gwat ngi gi taŋ le kuy kuy. Amma i sa mbulo taŋ, i sa ka taŋ mbuŋ. I sa vula taŋ gidaŋ, taŋ vuna waɗ da mizli mutuwa vagayay a wuzla taŋ.

¹⁹I sa ga ɓa a zlam dimis ngi hunuma vu. Mizli mikileŋ kileŋhey ati migweˀ gweˀheye, a ndiram zuy zuy, Haˀaw, i sa mbulo taŋ. Maɓi i ya Bumbulvuŋ.

²⁰Amma mizli misi moˀoreheye, taŋ kaɓa mubuliy mawus, anta ndir teˀ teˀe gu ta. Yam ngi raˀa, a bo ti ndileɓ ati gwat malambaˀ ngi si virzi naŋhaya gar.

²¹Buymisemuŋ ɗu a ɓi: «Mizli misi moˀoreheye, t'anta ndiram zuy zuy ta.»