Read South Giziga ISA 58 Bible Online

ISA 58 - South Giziga bible

ISA 58

¹Bumbulvuŋ a ɓi: «Widi ˀay ngar ngar, ki tika vu ɗike ta. Anja ˀay ɗik a cin kileŋ kaɓa tulum. Mizli ɗuwoy mimbiɗam hirnga avu ya na, njika taŋ di, dideˀ ngi Zakopoy migam malambaˀ na, njika taŋ di.

²Taŋ ara sipikiy vur hin gar, a wuɗam na, ɓa a sinaka gwat ya mawuɗ avu taŋ. Taŋ kaɓa sukwi ngi mizli migam gwat mijeŋŋe le, yo gwat ya Buymisemuŋ taŋ mawuɗ ɓa mbur a ga zuy na, a pulaka ta. A wuɗam sey i ga taŋ kiita mijeŋŋe, yo a wuɗam anja t'ada gweˀ avu ya.

³Amma a ɓikiy na: «Da k'anta pura ndra ta na, gi dalyam vuna a pula ndra gir mike? Yo da k'anta pura gwat ngi gi ndra vuna ta na, i gaka bonoy da vu ndra ngi mike?» Dar ya Buymisemuŋ i mbiɗa taŋ di: «Kum magam dalyam vuna na, dambalaka ki roko welele ti gwat ngi terere kumoy, yo kum gar kumo, ki ra gaka bonoy da migi slra kumoyo.

⁴Ar kum magam dalyam vuna, ki ra jiginam mi, ki ra tiram, yo haŋ turɓus turɓus, ki ra kiɗam vu ma. Kum magam dalyam ti gi gwat misi kahana na, diradibiɗ kum anta ndiliy ta.

⁵Dalyam ya mawuɗo, naŋ kanah kwa? Hin ngi ga bonoy da vu kumo, naŋ kanah kwa? Ki guɓoko hirngahaya nga ruwuy kaɓa lavaɗ, ki kam zana ngi vagay, yo ki hinam ar fucu na, kum mazilam gi dalyam vuna i nah kwa? Kum matilam mi ti ɓi ngi dalyam vuna vur nah kwa? Kum matilam mi ti hin ngi gi dalyam, ɓa ya Bumbulvuŋ i gukum mezle vuna, vur nah kwa?

⁶Gi dalyam ya mawuɗo, n'ani: mizli kum majuwaka taŋ ngi moˀore ti celeluhoy na, pulaka taŋ, cukoko taŋ galalaŋ ngi si ˀay taŋ avra, mizli muguzuvuraˀahaya, vulaka taŋ diimu. Wãˀ naŋ na, anja ki ngilaka galalaŋ ngi gi beke ti mizli na gar avra.

⁷Anja zleˀe, mbur gar a zumaka ɗaf naŋ ati mbur misi may majaŋ na takwa? Waɗ ma na, mbur misi murga manja hay na, ki vulaŋ hay ngi hine. Yo da ka mupura mburo le, zana anta na, vulaŋ zana ngi ki, yo anja ki mbiɗa duba da sukum ɗike ta.

⁸Kanah na, li minjahha ɗik a sa pur kaɓa li mawun, yo kisa luuma vu ɗik a muŋ kutum ma. Ki sa sipi di cirre i gi gwat mijeŋŋe, yo dudok ngi Bumbulvuŋ a sa gi i soje ɓaˀ a dirba ɗike.

⁹Akẽh so na, da ka misa zila Bumbulvuŋ le na, a sa ziluw mi, Da ka misa wuɗ jini le na, a sa ɓuw «Y'ani!» Asi hirwuy ɗike, da k'anta gi beke ti mizli mata, k'anta gil ɓi da mbur ta, k'anta ɓi ɓi malambaˀ ar mbur ta,

¹⁰gwat ngi zum ɗike, da ki ra zumaka ati mbur misi may majaŋ, yo da ki ra vula gwat ngi zum da mizli misi viyahay na, naɓa li minjahha ɗike, a sa pusluɗo tir luvuŋ, li mitimbiɗim ka misi ara na, a sa tiri njahha kaɓa wuzla papasa.

¹¹Bumbulvuŋ a sa kuw mbuŋ, ko mbak le anta, ko ar li mikirɗak kirɗak kwana, a sa vuluw gwat ngi zumo, A sa tira tesl ngi vu ɗike selek. Ki sa tiri kaɓa jarne mipakaŋ yam le gwesl gwesle, kaɓa miviɗiviɗi ngi yam mahisik ta.

¹²Diŋhey mindiroko zlezle zleˀe na, mizli a sa paka taŋ a muŋ, mbele ka, virzi ngi hayay, dideˀ ɗikey mupuloko taŋ zlezle zleˀe na, kisa slikiɗa hiri taŋ a muŋ. Mizli a sa zulukuw: «Midisla mifiliw ngi moholoy, miɗiya jiviɗ ngir walahayay, hiri naŋ a muŋ.»

¹³Kaɓa ani: «Tapas sabata, da k'anta gi slra ta, ar hin ɗu mipala , k'anta gi terere ta, da ki ra zila hin ngi sabata, i hin ngi «mumul», yo hin mipal nga ya Bumbulvuŋ, ki ra zila hin «mupuɗaw», da ki ra ɗuva hirnga da hin nah kuy kuy, ti pula gi slra ati pula gi terere, waɗ pula gi mi kuliŋ kuliŋ na,

¹⁴naɓa hiri a sa curuw ti ya Bumbulvuŋ, i sa ru ti ka nga dadala muŋ, ar mota ngi vurumoy, hirwuy ngi dideˀ ɗik Zakop zleˀe na, i sa vuluw di, ki cir aseˀeŋ.» Haˀaw, i ya Bumbulvuŋ maɓa ti balam ɗu.