Read South Giziga ISA 59 Bible Online

ISA 59 - South Giziga bible

ISA 59

¹Ki waka na, Bumbulvuŋ a luhukum ti haŋ naŋ gu ta kwa? Malla slimiɗ naŋ a suk le, naŋ anta cin ta kwa?

²Amma na, gwat muwuɗka wala kum ati Buymisemuŋ kumo, i kum muzluɓam ɓi na, yo muɗumo mihiri naŋ avu kumo, i malambaˀ kum, a ɗum kileŋ avu kum, kileŋ haɗi wãˀ, ɓa a cine mingiɓi kumo mata.

³Asi mike na, haŋ kumoyo cih cih ti pumbusu, yo muzuŋ haŋ kumoyo, i mihiryahay le ti gi gwat malambaˀ mukuytahay wãˀ, mi ngi balam kumo, i ngi ziza mbur tewle.

⁴Vur kiita na, mbur mawidi ti jiviɗ mijeŋŋe anta, mbur macik vu asi mburo ti jiviɗ mikaslsla anta. Ki cicam zlilak zlilak ar ɓi ngatara lambaˀ, mingiɓi kum anta sli wala ta, ki kuluwam ɓi malambaˀhay a hur kumo, dar ki yam mendere da mizli.

⁵Gwat ngi gi kumo, naŋ kaɓa tesl ngi kaway, kaɓa gugumay ngi monjoronjoro. Tesl ngi kaw nah na, mbur muzuma le na, a mucu. Da mbur muwuha le wah si na, i kaw mabawa.

⁶Ɓi kum makuluwaka kaɓa gugumay ngi monjoronjoro vuna anta bo ti zana ta, mbur a sirta vu naŋ ti gi gwat nah vuna gu ta ma kini, gwat ngi gi kum i slra ngi gi malambaˀ da mburu, haŋ kumo, ki wuɗam sey gi di moˀore.

⁷Ki kilam kutum nga gi gwat malambaˀa, mbur migi gwat ta si na, ki kilam nga kiɗ naŋ vagay, wuluk kumo, i ngi gi malambaˀ tewle, baraf kumo, gwat mihiryahay ati muwahahay saɓaɓa araŋ.

⁸Jiviɗ ɓa mizli a ndiram zuy na, ki sinaka ta, gwat anja mbur a ga zuy na, anta ar gwat ngi gi kumo ta. Gi gwat kumo, sloh kini, sloh kini lambaˀ, mbur maru ti raˀa na, anta si na ɓi ngi vula zuyo ta.

⁹Vurˀe, ɓa Buymisemuŋ a cik vu ar ndra na, hin naŋ zar aruŋ, ɓa a ɓa ndra, ndra jeŋŋe na, ɓi nah a gumboˀo ndra ɗaˀ t'aruŋ. I njaham hiri zleˀe asi li minjahha, ani mana, i luvuŋ, asi li miciɗak ciɗak, ani ma na i roko ar luvuŋ.

¹⁰I roko tiɗkam tiɗkam kaɓa dangaray, i tutumam li kpaˀ kpaˀ kaɓa mizli manja hiri. Ti wuzla papas kwana, sar a ba ndra kaɓa ar luvuŋ titira. Ndra muroko jam jam ti vu ndra kwana, ndra kaɓa mizli mumucahay.

¹¹Ndra gar i wudam kaɓa luˀufoy [13], i tuwam ko teˀ le ta, kaɓa gonokoy. I njaham hiri ɓa Buymisemuŋ a ɓi ar ndra, amma ndiɗaˀ. I njaham hiri, anja ɓa a sla ɓi ndra, amma gar ngataraŋ, anja ɓa a laha ndra, amma naŋ a cifi kileŋ avu ndra jaka.

¹²Naŋ kine Buymisemuŋ, i cunukuw mi ta ndrehhe, yo malambaˀ ndra, ara mbiɗi ng'ar ndra. Haˀaw, slikiɗa ɓi ndra, ara slupuˀ avu vu ndra, i sinaka zluɓ ndraˀahaya le kuy kuy muduba.

¹³Bumbulvuŋ, i cunukuw mi ta, i jam ti ka mi le, i ngumam ɓa i supukuw ka Buymisemuŋ ndra ta. Misi a mevel ndra i ɓi ngi guzuvura vu ati ngi slikiɗa ɓi tewle, ɓi ngi tikina vu kilaw kilaw, kaw a hirnga ndra.

¹⁴Naŋ kine, ɗumburo ɓi mikaslsla na, i mihiziga le nga dirba, yo ɓi mijeŋŋe, naŋ kileŋ, anta gi slra ta. Ar li ngi luuma kwana, ɓi mikaslsla ara diɗi, yo ɓi mikaslsla anta ci ng'ara gu mata.

¹⁵Haˀaw, ɓi mikaslsla a susuyum le, yo mbur mawuɗ gi gwat malambaˀa ta jak na, a vakaŋ gwataya. Bumbulvuŋ a pura na, ɓi mijeŋŋe anta mata, ɓi nah a gaŋ kuyta wãˀ.

¹⁶Buymisemuŋ a pura na, mbur macik vu ar mizli anta loŋ le ta, asi mbur macik vu loŋ le anta tuwa na, a zumaŋ hirnga le. Dar a juwa a mevele, a ci ar ɓi nah, gi jeŋŋe naŋ a vulaŋ zil.

¹⁷A ka gi jeŋŋe avu vu kaɓa libiti, yo laha vu, tiɗeˀ a hirnga kaɓa jiiku ngi gandaf, zana ngi pula cuwala, gijaw avu vu, waɗ vekeɗ vekeɗ naŋ ngi kiɗa vu, gijaw kaɓa godo.

¹⁸Gwat mizli magaka na, a sa mataŋ di weˀe ava ya, a pa himaˀ naŋ ar mizli mazliram ti naŋ ta, yo a sa pula cuwal naŋ ar mesene naŋhay. Ko mizli mikileŋhey kwana, a sa pula cuwal naŋ ar taŋ.

¹⁹Akẽh na, zle tisi pas ngi miprik, hã asi pas ngi pastaˀ na, mizli a sa zluwunam ti Bumbulvuŋ, waɗ ti dudok naŋ. Asi a sa ndilo kaɓa mizaw maɓul ti gidaŋ, himiɗ ngi Buymisemuŋ mahizigiɗaŋ.

²⁰Buymisemuŋ a sa so ngi mbiɗa hirnga ngi Zeruzaleme, waɗ ngi mizli a wuzla Israyeley mapulaka slikiɗa ɓi taŋ na. I ya Bumbulvuŋ maɓi.

²¹Ya Bumbulvuŋ i ɓi ma: «Jumoˀay ɗu, ya masa jumo ati mizli, n'ani: ˀUf ɗu misi ar kum, ati mingiɓi ɗu, ya mica a balam kum na, anta sa kirih kirah le ti balam kumo ta, ko ti balam dideˀ kumoy, ko ti balam dideˀ kum mukuturtikuturoy kwana, anta sa kirih kirah le ta ma, zle wurenna hã ngi sete.» I ya Bumbulvuŋ maɓa.