Read South Giziga ISA 6 Bible Online

ISA 6 - South Giziga bible

ISA 6

¹Ar vi ngi buy Oziyas mumuc na, i pura Bumbulvuŋ a ro joˀ ar janga munjuroŋ nga naŋ buyo. Mi ngi zana naŋ a naha hay naŋ wãˀ.

²Modro naŋ misi vuhoy a roko a hirnga naŋ. Modro gar ti kirpasl merkeɗ merkeɗ: cuw ngi sirta mihiri, cuw ngi sirta saray, waɗ cuw ngi slikiɗi.

³Taŋ gar a wudam da cala da cala: «Bumbulvuŋ misi gidaŋ wãˀa naŋ pal , naŋ pal , naŋ pal , dudok naŋ a naha hirwuyo le gar!»

⁴ˀAy ngi taŋ mawudama, hã a wusa miviŋheye ŋgbir ŋgbir, hay ngi Bumbulvuŋ a nih ti cunju tirslik.

⁵Dar yi ɓi: «Kay, ya ar bonoy! Yi zizi le, asi mi ɗu ya mazum, di gwata, i malambaˀa, ya a wuzla mizli misi mi taŋ i malambaˀ vuna ya. Ani Buy madiɗa, Bumbulvuŋ misi gidaŋ wãˀa, hiri ɗu a pura le.»

⁶Modro purla misi vu ava, a slikiɗo faw ng'avi ya, kaw ti zayvu a haŋ. A zuɓo di ti megec ar li ngi gi mikuli.

⁷A dukiy di duk avu mi, waɗ a ɓiy: «Zle dana, gwat hana muwusa mi ɗik na, gwat malambaˀ ɗik a puy le avra. Mungra ɗik i muzuɓa le avra.»

⁸Dar i cin ˀay ngi Bumbulvuŋ. A ɓi: «I sa slin waka? Masa gi mijiviɗ ndra i waka?» Joˀ yi mbiɗaŋ di: «Y'ani, ka sliniy.»

⁹A ɓiy ma: «Aru, ɓa mizli: ‹Ki sa cinam kuy kuy ɓula, amma kum anta sa slaka wala naŋ ko neˀ ta, kisa puram kuy kuy ɓula, amma kum anta sa sinam gwat ko neˀ ta.›

¹⁰Ga ɓa mevel ngi mizli tayna a tiri gidaŋ, disla taŋ slimiɗeye, hulufo taŋ! Anja a puram ta, a cinam ta. Anja a slaka wala ngi gwata ta. Anja a mbiɗaka mevele ta, a mbulom ta.»

¹¹Yi cufuɗaŋ so: «Ɓa hã tuvunaka Bumbulvuŋ?» A mbiɗiy di: «Sey walahayay a ngizlam kap kap, a ndiram manja mizli, hayay a tiram njoŋ njoŋ, hirwuy a tiri daŋ daŋ manja mizli.»

¹²Bumbulvuŋ a sa zliɗa mizli kileŋ, avu ruwuy taŋ, li manja hufoy a sa ndiram haɗa asi ruwuyo.

¹³Mizli ngisi ruwuyo, muwuɗka taˀtaˀ kuruˀo, da ko taˀpal a ndir le tekeɗe kwana, vu a sa wura na si kaɓa mawuram widis madiɗa ka miter ati widis madiɗaŋ munguma le. A sa ndir sey i digɓirɓizli naŋ. Digɓirɓizli naŋ nah na, a sa ɗiɗo kaˀ a ruwuy kaɓa Buymisemvuŋ muwuɗu.