Read South Giziga ISA 60 Bible Online

ISA 60 - South Giziga bible

ISA 60

¹Zeruzalem, slikiɗ deŋ, gi njahha, asi li minjahha ɗik ara ndilawa, dudok nga ya Bumbulvuŋ ara so ng'ar ka, kaɓa pas mabawa.

²Pura ɗi, luvuŋ ada sirta hirwuyo, yo kutuɓ ada sirta mizli. Naŋ kanah ya, Bumbulvuŋ ara slikiɗo ng'ar ka, yo dudok naŋ ara pusluɗo ng'ar ka.

³Sukwi ngi mizli a sa ram ng'ar li minjahha ɗike, yo buy madiɗahay a sa ram ng'ar vu miciɗak ciɗak ɗike.

⁴Inga ka hiri ɓaˀ ɓaˀ, gun hirnga ɗike, pura ɗi, ziri ɗikey ara kusom gar, ara soko ng'avi ka. Ziri mizile ɗikey ara soko zle kileŋ, mizli a zuɓoko ziri mongoso ɗikeye le kaw kaw a haŋ taŋhaya.

⁵Dar ka masa pura taŋ na, kisa mumul haɗi, mevel ɗik a sa kiɗ gbeŋ gbeŋ ti cine ndum. Asi zlili ngir mubuliy a sa so da ka, yo lum ngi sukwi ngi mizli, a sa ndilo hã avu ka.

⁶Hirwuy ɗike, zlogomo a sa sirta sirit, i zlogomo njawal ngi ruwuy Madiyan ati ngi Efahay, mizli masa soko taŋ ti Saba, joˀ ar taŋ. A sa jijiroko ɓiri tapasl tapasl waɗ urdi ngi zlum ti zlum, dar a sa tilam mi ti ɓi ngi hunumiy ya Bumbulvuŋ a mbuŋ mizli gar.

⁷A sa kusoko ginew ngi ruwuy Kedara cek da ka, zlengerek ngi Nebayotoyo, a sa ndiram da ka, a sa jiɗam taŋ ng'ar li gi mikuli da ya Bumbulvuŋ, dar i sa tiɓa mikuli tayna. Haˀaw, i sa biga dudok ngi hay ɗu.

⁸Mizli tayna gar i waniy ka? A ram sikikih kaɓa gazlavay, kaɓa gonokoy mamam ng'ar hay taŋhay.

⁹Naŋ kanah, mizli mikileŋ kileŋhey a roko hiri lawwa ng'avi ya, palalam madiɗahay ara ram a mbuŋ, ɓa ngi mo ti ziri ɗik mizileheye, zle kileŋ, a soko taŋ jom ti ɓiri bara ati ɓiri tapasl tapasl taŋhay a haŋ, ɓa ngi giy dudok da ya Bumbulvuŋ Buymisemuŋ ɗiki, dudok da ya Buymisemuŋ mipal ngi Israyeley, asi ya muɗuvuw hirnga na.»

¹⁰Ziri mizile ngi mizli mulakay a sa ndirukuw mohol ɗikeye hiri naŋ a muŋ, yo buy madiɗa taŋhay a sa gukuw slra ɗikeye, asi ti ya miji mevel zleˀe na, i kiɗuw le, amma tisi gi mezle ɗu na, i ra buguw wuɗ, ya mawuɗow na.

¹¹Mizlingre ɗikey a sa ndiram baŋ baŋ ndrehhe, ti duvuɗ, ti papas gar na, ko anta sa gicaka taŋ ta ndiɗaˀ, ɓa a coko ti sukwi ngi mizli ng'asi hirwuy ɗike, waɗ buy taŋhaya a duba cala a duba cala.

¹²Sukwi ngi mizli malla hirwuy mazumam buyoy gar mangumam gukuw slra ta na, a sa ngizlam, sukwi tayna a sa ngizlam pay wãˀ.

¹³Zeruzalem, dudok ngi dum ngi Libaŋ a sa so ng'asi hirwuy ɗike, i dum ti sukwi wal wal haɗa, ɓa ngi ga wuya da virzi ngi li gi mikuli ɗu. Haˀaw, i sa tiri ti li ɗuva sar ɗu puɗaw teˀe.

¹⁴Ziri mizile ngi mizli muguzuvurukuw zleˀe tuwa, a sa soko ng'avi ka hirnga guɓ guɓ a ruwuy, mizli mugukuw bonoy zleˀe, a sa hurukom a mbuŋ ɗiki. A sa zulukuw «Walahay ngi Bumbulvuŋ», «Siyoŋ ngi Buymisemuŋ mipal ngi Israyel».

¹⁵A pulukuw le zleˀe fuku, ko mbur mawuɗ ka anta, ko mbur maso pur ɗik anta. Amma wurenna, i sa ga ɓa mizli a jijaham asi ka, yo ɓa a sa mumulom asi ka vur dideˀ vur dideˀ.

¹⁶Ki sa sa ɗuwa ngi sukwi ngi mizli, kisa zuma zlili ngi buyoyo, dar kisa si na muduba, milih ɗik i ya Bumbulvuŋ, yo mbur mambiɗa hirnga ɗike, i ya Buymisemuŋ migidaŋ ngi Zakop.

¹⁷I sa suw ti ɓiri tapasl tapasl ar deɗe ngi ɓiri gaza, ɓiri bara, ar deɗe ngi ɓiri ho gar, ɓiri gaza, ar deɗe ngi dum, ɓiri ar deɗe ngi ɗugur, ar deɗe ngi jigina li na, i sa ɗuvuw ɓi ngi cifi zuy, waɗ gi jeŋŋe, ar deɗe ngi tikaˀaya.

¹⁸Zle dana, anta sa cinam ɓi ngi moˀore asi hirwuy ɗike mata, ko ar maakway ngi hirwuy ɗike kwana, hirya gwatay ati waha walahay gar na, anta sa cinam ɓi nah mata. Amma kisa zila mohol ɗikeye ‹Laha vu›, yo mizlingre ɗikeye, ‹Hunuma Bumbulvuŋ›.

¹⁹Zle wurenna, masa pusluɗuw li ti papasa, i pas mata, yo masa pusluɗuw li ti duvuɗo, i kiya mata, masa tiri li minjahha ɗik ngi wãˀa, i ya Bumbulvuŋ, masa pusluɗuw li, i ya Buymisemuŋ ɗiki.

²⁰Pas anta sa diɗ vur ka mata, yo kiya anta sa susuyum vur ka mata. Asi masa gi li minjahha ɗik ngi wãˀ na, i ya Bumbulvuŋ. Dar hin ngi vagay ɗik a sa kiɗ mi.

²¹Naŋ kanah, mizli ɗikey gar taŋ, a sa tiram mizli mijeŋŋehey, taŋ a sa zumaka hirwuyo da taŋ ngi wãˀ, kaɓa mazumam hay. Taŋ na, i ya miga taŋ hĩˀĩ ti haŋ ɗu, ɓa ngi biga dudok ɗu, a sa ndiram kaɓa widisey ar jarne.

²²Metetek ngi si taŋ wãˀ na, a sa ji mizli durmuku, misi viya ngi si taŋ wãˀ na, a sa tiri sukwi ngi mizli durmuk durmuk mbeˀmbeˀe. Ya Bumbulvuŋ, da pas naŋ misa ndulo le na, i sa wus vu kutum ngi ga gwat nah.